So. Recte ais. Age et de rhetorica similiter mihi responde, quorumnam scientia sit. Gor. Sermonum. So. Qualium, o Gorgia, sermonum? num eorum, qui ostendunt qua ratione vivendi aegrotantes convalescere possint? Gor. Non. So. Non igitur circa sermones omnes versatur rhetorica. Gor. Nequaquam. So. Veruntamen circa eos sermones qui dicendi facultatem praestant. Gor. Procul dubio. So. Nunquid rhetorica in quibus dicendi, in eisdem et intelligendi vim praebet? Gor. Quidni? So. Nonne medicina, de qua modo dicebamus, efficit ut de aegrotantium curatione et intelligere, et loqui possimus? Gor. necesse est. So. Et medicina igitur, ut apparet, circa sermones versatur. Gor. Sic est. So. Eos videlicet, qui ad morbos pertinent. Gor. Maxime. So. Nonne et gymnastica circa sermones est de bona malave corporum habitudine? Gor. Certe.
