aliquot hymnorum dedi ad fidem librorum manuscriptorum, qui in hac urbe tum in Museo Britannico, tum in bibliotheca mercatorum in Indiam commeantium asservantur: illustratum translatione Latina paucisque notis, que vereor ne inscientiam meam prodant magis quam celent.
In Sayanacharyæ scholiis Paninisque preceptis iterum iterumque perquirendis, et in evolvendis diligenter ipsis Vedarum voluminibus, etiamnunc quod datur otii consumo: sperans fore ut aliquando vetusti hi libri, tanto honore a Brachmanis habiti, accuratius per me nostratibus innotescant. In quibus sermonis inculta solemnitas delectabit multos, qui ad linguarum analogiam indolemque explorandam animum applicuerunt: dum alios mecum juvabit cognoscere, quonam religionis genere prisci mortales in conspectu altorum Imai cacuminum, ad sacrati Gangis ripas, vel ubi sancta ficus patulis se diffundit ramis, creditam numinis presentiam reveriti fuerint.
