Aprosdionysa, siue Absurda. IV
Personae:
Cornelius Corneliades Hornanus., Iacobus Henrici Nouiomagus..
C.
Quo te fers Iacobe tam praemature? Quo rursum praecipitas? Quo tam praefestinus ruis? Quo tam praematurus abis? Quo tibi tam praepropera abitio? Quo tam praeceps is? Cur aedem sacram adire praecipitas? Cur tempus ad serotinum diuae virginis sacrum accedendi praecipis? Cur non persequeris studium? Cur non pergis in haerere chartis? Cur non perseueras legendis operam dare libris? Quae mobilitas animi tuis te libris ante tempus auellit? Cur non permanes in studio? Cur non studendi officio manes? Quid deseris mutos magistros? Qui fit cur interrumpas, cur intermittas studium? Quin continuas studium? Quidnam a libris auocaris? Quin continenter studes? Cur non permanes in continenti studio? Cur non libris assidere pergis? Cur maturius aequo, cur temporius quam parsit, acceleras gradum ad templum? Nondum enim tempus est sacrum serotinum virgineae matris adeundi. Praematurum est, praeproperum est, si iam nunc aedem sacram adeas. Necdum est tempus ad hymnos serotinos deiparae matris adire. Nondum signo dato ad vesperos hymnos maternae virgini decantandos vocamur. Necdum est datum signum accedendi templum ad laudes virgineas. Nondum hora vocat, neque dum postulat tempus, vt vespertinis gratulationibus Christiparae virgini faciendis interesse festines. Non est nisi medium quintae horae auditum. Campana non sonuit nisi medium quintae. Nondum sacri lebetes nisi medium quintae reddiderunt. Nondum templares lebetes nisi dimidiatam quintam locuti sunt. Necdum horoscopa aera nisi quintae medium cecinerunt. Horologium nec dum nisi dimidiatae quintae signum dedit. Vide gnomona, is non nisi medium quintae monstrabit.
I.
Non sum id nescius. At nescis, quo sim functurus munere?
C.
Quo nam?
I.
Est mihi verrendum ludi nostri solum. Nescis me vobis nunc iam esse a scopis? Nescis id esse mearum partium, vt procurem, quo niteat totius domus pauimentum? Nescis, quid sit mei muneris? Opera mihi danda est verrendo pauimento.
C.
Nesciebam. Dii coepta secundent.
I.
Ex animo cupio, mea omnia semper prosperent superi. Abiit. bene quidem precatus, at nihil opitulatus. Maluissem, suam mihi nauasset operam, quam diuinam modo precatus esset opem. Quid iuuat bene precari, quando quod precaris, ipse praestare quidem commode possis, at nolis? Huiusimodi precatores non magni facio. Video quid sit, mihi soli danda est haec opera, nisi ille, qui huc videtur affectare viam nescio quo iturus, operam mutuam det, atque mihi hunc laborem adiuuet. Nisi suam offerat operam vltro, animum eius ipse attentabo, et ad mutuam solicitabo operam, periculum ita facturus quid nomine meo facturus esset, si maior necessitas vrgeret.
————————
Aprosdionysa, siue Absurda. III