Pronostica temporum

E Wikisource
 EPUB   MOBI   PDF   RTF   TXT
Pronostica temporum
Auctor incertus
saeculo VIII

editio: Migne
fons: Corpus Corporum

Pronostica temporum (Auctor incertus (Beda?)), J. P. Migne

(0951B)Si prima feria fuerint Kalend. Januarii, hiems bona erit, ver ventuosum, aestas sicca, vindemia bona, boves crescent, mel abundabit, vetulae morientur, abundantia et pax erit.

Si secunda feria, hiems mista erit, ver bonum, aestas sicca, et ventuosa tempestas, et vindemia non bona, et valetudo hominum, apes morientur, et prodigia quae dabit hominibus Deus.

Si tertia feria, hiems umbrosa erit, ver tempestuosum, et ventuosum et pluviosum, aestas sicca, vindemia laborabit, et visa erit, et mulieris morientur, naves periclitabuntur, et reges peribunt.

Si quarta feria, hiems dura et aspera erit, ver malum et ventuosum, aestas bona, vindemia bona et laboriosa, et frumentum bonum, juvenes morientur, et qui navigabunt satis laborabunt.

Si quinta feria, hiems bona, ver ventuosum, aestas sicca, vindemia bona; abundantia erit, et principes sive reges peribunt.

(0951C)Si sexta feria, hiems mutabilis, et ver bonum, aestas sicca et bona, dolor oculorum, vindemia bona, et copia magna erit, et oves peribunt.

Si septima feria, hiems turbinosa, ver ventuosum, et fructus laboriosus erit: oves peribunt, homines vetuli morientur, et casae cremabuntur.

DE PRAECOGNITIONE COPIAE AUT PAUPERTATIS FUTURAE. Si quis est qui ignoret aut copiam aut paupertatem futuri anni, animadvertat in prima nocte mensis Januarii, qui caput probatur totius anni, et inspiciat primam horam primae noctis ejusdem mensis; et sicut hora solis praevalebit, eodem anno siccitas in terra erit. At si est Veneris hora, regnabit eo anno magna hominum rixa, et mulierum pestilentia, et erunt sex menses pluvia temperati, et residui sex calidi. Quod si autem Mercurii hora primitus effulserit, erunt quatuor menses pluviales, sed Aprilis et Maius praecipue. Si autem surrexerit luna prima hora (0951D)Januarii, et in capite Arietis, praevalebunt pluviae, et eradicabunt segetes pluviarum inundationes, et pluet sex mensibus, et bellorum erunt variae perturbationes, et vilescet mercatorum merces, et erit multa hominum strages. Quod si in ventre Arietis invenitur, (0952B)periclitabuntur nautae, et praeliabuntur in Occidente, Corduba praeliabitur inter se, et lugebit sex menses. Quod si prima hora Januarii invenitur in capite Tauri, florebunt segetes cum ubertate multa, et septem anni caristia carebit, et reges peribunt. Quod si in ventre Tauri prima nocte Januarii luna emicuerit, Orientalis plaga multa affligetur pluvia, et regum erit pestilentia. At si in cauda Tauri invenitur, erit annus mediocris. Si autem invenitur in capite Geminorum, regnabit Cordubensis pestilentia, et in Seraguga et cis citra. Quod si eadem nocte emicuerit in Geminorum cauda, erit fames in media terra, et principum ejus novem mensibus praevalebit persecutio pestifera. Si autem erit in capite Cancri, erunt pluviae et segetes multae. Et si erit in ventre vel cauda Cancri, erit annus pacificus cum ubertate magna sex annis. Quod si erit in Leone prima hora noctis Januarii, erit judicum perturbatio, multiplicabitur latronum exaggeratio, annus mediocris. Si autem invenitur in ventre Leonis, erit mortalitas (0952C)multa hominum. Si autem in cauda Leonis, quadrupedum et parvulorum mors eo anno regnabit, et pauperes ditabuntur. Cum autem in Virgine emicuerit, Corduba fame peribit. Si autem in fine Virginis, copia eodem anno frugum erit. At si in capite Librae effulserit, paucitas denuo redibit. Cum autem in ventre Librae, erit mutua regum perturbatio. Si autem in capite Scorpii prima nocte Januarii fuerit, multus tumultus hominum erit. Quod si in ventre Scorpii, XL diebus non cessabit pluvia. At si in cauda, erit omnium bonorum copia. Si vero in capite Sagittarii prima hora Januarii luna venerit, iterum perturbatio regum redibit, et IX annis fames praevalebit. Quod si in cauda Sagittarii effulserit, Christianorum maxime pestilentia regnabit, et Saracenorum terram fames videbit. Si autem in capite Capricorni, vel in cauda evenerit, fames erit in tota terra. At si in capite Aquarii, erit siccitas in Oriente; si est in ventre, erit persecutio gladii; si autem in cauda, erit perturbatio (0952D)illius anni. Quod si in capite Piscium erit luna, praevalebit malitia. Si vero in cauda luna erit prima hora noctis in Kalendis Januarii, multi peribunt fame.