Si quis, Papa superstite, pro Romano Pontificatu cuiquam quolibet modo favorem praestare convincitur, loci sui honore privetur, et infra. Si quis Presbyter, aut Diaconus, aut Clericus Papa incolumi, et eo inconsulto, aut subscriptionem, pro Romano Pontificatu accommodare, aut pyctacia promittere, aut sacramentum praebere tentaverit, aut aliquod certe suffragium polliceri, vel de hac causa privatis conventiculis factis deliberare aliquid, atque decernere praesumpserit, loci sui dignitate, vel communione privetur, et infra.
Propter occultas fraudes, et conjurationum secretas insidias, quas sententia hujus distinctionis persequitur, si quis ad Ecclesiasticam pertulerit notitiam consilia eorum, qui contra hanc Synodum de Pontificali egerint ambitu, et rationabili probatione convicerit, particeps hujusmodi actionis, non solum purgatus ab omni culpa fit, sed etiam remuneratione, quae non indigna sit, sublevetur.