Migne Patrologia Latina Tomus 94
VI formulae orationis (Auctor incertus (Beda?)), J. P. Migne
ORATIO PRIMA.
(0559B) Rectorem mundi Christum Regem ex virgine natum, Dominum precibus peculiariter et apostolos rogemus. Petrus mihi apostolus aperiat januam vitae, et Paulus praedicator gentium introducat in coelum. Andreas virtutem tribuat ante tribunal Christi. Jacobus atro prostrato agmine, angelorum me sinibus tradat. Joannes cum gratia me potet ab omnipotentis pectore. Philippus me lampadibus ornatum, laetum ad Regem perducat. Thomas mihi organorum laudibus in aevum cantet triumphalia merita. Bartholomaeus me mellifluis mandet alloquiis, ubi Angelorum amator agmina delectet secum. Jacobus mihi Alphaeus auream reddat coronam, variisque floribus gemmarum in fulgido splendescat lumine. Simon mihi monilia tribuat zelotes sancta, unde angelica celsitudo admirabilis videbitur omnibus. Judas me confessis vocibus ad ineffabilem patientiam vehat, ubi Trinitas divina ternis adoratur vocibus: Patrem (0559C)et Filium, et Spiritum uno ore omnes collaudant Dominum.
ORATIO II. O Jesu Nazarene, fili Mariae, reus tibi sum regum Regi, cujus regnum est sine fine. Deus Domine meus, tibi sum reus mortis; esto mihi nunc patiens, qui es fortis et potens. Adjuro Dominum verum, unum semper et trinum, ut adire tantum possim S. Martinum. Rogo nunc regem regum, qui est lumen divinum, ut valeam sanctum visitare Martinum. Christe Deus deorum, cujus est numen mirum, fac me lugere sanum, juxta S. Martinum. Viam dirige plane, o Jesu Nazarene, ut valeam pure ibi peccata flere. Mihi adjutorium erit per naufragium, Christi militis miri suffragium Martini. Volo te visitare; fac me ad te venire, qui es virtutis tantae, o mi S. Martine. O S. Martine, nunc intercede, quaeso, pro me dolente; male labe culparum presso. O mi sancte Martine, pro me nunc intercede, ne me contingant (0559D)comae flammae perennis poenae. O mi sancte Martine, turbae coelorum chare, ne sim particeps poenae, mihi auxiliare. O sancte Martine, mihi auxiliare, ut fruar in fine vitae perenni pane. Gloria tibi pater, qui es frater et mater.
ORATIO III. Dominator Dominus Deus omnipotens, qui es Trinitas una, Pater in Filio, et Filius in Patre, cum Spiritu sancto, qui es semper in omnibus, et eras ante omnia, et eris per omnia Deus benedictus in saecula. Commendo animam meam in manus potentiae tuae, ut custodias eam diebus ac noctibus, horis atque momentis, miserere mei Deus angelorum. Dirige me rex archangelorum, custodi me per orationes patriarcharum, per merita prophetarum, per suffragia apostolorum, per victorias martyrum, per fidem confessorum, qui placuerunt tibi ab initio mundi. Oret pro me sanctus Abel, qui primus coronatus est martyrio. Oret pro me sanctus Enoch, qui ambulavit cum Deo, (0560B)et translatus est a mundo. Oret pro me sanctus Noe, quem Dominus servavit in diluvio propter justitiam. Roget fidelis Abraham, qui primus credidit Deo, cui reputata est fides ad justitiam. Intercedat pro me sanctus Isaac, qui fuit obediens Patri usque ad mortem, in exemplum Domini nostri Jesu Christi, qui oblatus est Deo Patri pro salute mundi. Postulet pro me felix Jacob, qui vidit angelos Dei venientes in auxilium sibi. Oret pro me sanctus Moyses, cum quo locutus est Dominus facie ad faciem. Subveniat mihi sanctus David, quem elegisti secundum cor tuum, Domine. Deprecetur pro me sanctus Elias propheta, quem elegisti in curru igneo usque ad coelum. Oret pro me sanctus Eliseus, qui suscitavit mortuum post mortem. Oret pro me sanctus Esaias, cujus labia mundata sunt igni coelesti. Adsit mihi beatus Hieremias, quem sanctificasti in utero matris. Oret pro me sanctus Ezechiel, qui vidit visiones mirabiles Dei. Deprecetur pro me electus Daniel, desiderabilis Dei, (0560C)qui solvit somnium regis, et interpretatus est, et bis liberatus est de lacu leonum: et tres pueri liberati ab igne: duodecim prophetae, Ozeas, Amos, Micheas, Joel, Abdias, Abacuc, Jonas, Nahum, Sophonias, Aggaeus, Zacharias, Malachias, Esdras. Hos omnes invoco in auxilium meum. Assistant mihi omnes apostoli Domini nostri Jesu Christi, Petrus et Paulus, Joannes et Andreas: tres Jacobi, Philippus, Bartholomaeus, Thomas et Matthaeus, Barnabas et Matthias, et omnes martyres tui. Depelle a me, Domine, concupiscentiam gulae, et da mihi virtutem abstinentiae; fuga a me spiritum fornicationis, et da mihi amorem charitatis; exstingue cupiditatem, et da mihi voluntariam paupertatem. Cohibe iracundiam meam, et accende in me nimiam suavitatem, et charitatem Dei et proximi. Abscinde a me, Domine, tristitiam saeculi, et auge mihi gaudium spirituale. Depelle a me jactantiam mentis, et tribue mihi compunctionem cordis. Minue superbiam meam, et perfice in me humilitatem veram. Indignus ego sum, et infelix homo, quis (0560D)me liberabit de corpore mortis hujus peccati, nisi gratia Domini nostri Jesu Christi; quia peccator ego sum, et innumerabilia sunt delicta mea, et non sum dignus vocari servus tuus. Suscita in me fletum, mollifica cor meum durum et lapideum, et accende in me ignem timoris tui; quia ego sum cinis mortuus, libera animam meam ab omnibus insidiis inimici, et conserva me in tua voluntate: doce me facere voluntatem tuam, quia Deus meus es tu, tibi honor et gloria, per omnia, etc.
ORATIO IV. Deus meus, et Pater meus, rex meus, protector meus, munda me a peccatis meis, et ab iniquitate mea lava me, Domine, et salva me; quoniam peccata multa feci coram te, et non sum dignus vocari servus tuus, propter iniquitates meas, quae sunt innumerae. Dimitte, Domine, debita mea, quia deprecor cum omni diligentia, et intimo cordis amore: supplico (0561A)tibi, Domine, immitte veram dilectionem in cor meum, et amorem coelestem in sensum meum, et obumbrent me misericordiae tuae, Domine Deus; revoca mihi ad memoriam agonem, ut merear videre in regno coelesti, ubi Pater regnat cum Filio et Spiritu sancto, in saecula saeculorum. Amen.
In nomine Patris, et Filii, et Spiritus sancti: Gabriel, esto mihi lorica; Michael, esto mihi baltheus; Raphael, esto mihi scutum; Uriel, esto mihi protector; Rumiel, esto mihi defensor; Paniel, esto mihi sanitas; et omnes sancti ac martyres, deprecor ut juvent me apud justum judicem, ut dimittant mihi in die judicii peccata mea, in nomine Domini nostri Jesu Christi. Oro vos et deprecor, ut me in orationibus vestris dignemini habere, ut nunquam inimicus vel adversarius (0562A)nocere possit. Peccavi, Domine, coram te et coram angelis tuis; fac cum servo tuo misericordiam tuam, tibi, Domine, justitia; tibi, Domine, misericordia. Sana me, Domine, et sanabor, quoniam salus mea tu es, et veniat oratio mea ad templum sanctum tuum; tibi honor et gloria, per omnia saecula saeculorum. Amen.
ORATIO VI. Aperi mihi pulsanti januam vitae, princeps tenebrarum non occurrat mihi, nec veniat mihi pes superbiae, et manus extranea a te non contingat me; sed suscipe me secundum verbum tuum, et perduc me ad convivium epularum tuarum, ubi epulantur tecum omnes amici tui. Tu es Christus Filius Dei vivi, qui cum Patre tuo vivis et regnas in saecula saeculorum. Amen.