Saturae (Persius, Monti)/Prologus

E Wikisource
Vincentius Monti curavit
1803

PROLOGUS.


Nec fonte labra prolui caballino ,
Nec in bicipiti somniasse Parnasso
Memini, ut repente sic poeta prodirem.
Heliconiadasque, pallidamque Pirenen
Illis relinquo, quorum imagines lambunt 5
Hederae sequaces: ipse semipaganus
Ad sacra vatum Carmen affero nostrum.
     Quis expedivit psittaco suum Χαῖρε?
Picasque docuit verba nostra conari?
Magister artis, ingenîque largitor 10
Venter, negatas artifex sequi voces.
Quod si dolosi spes refulserit nummi,
Corvos poetas, et poetrias picas
Cantare credas Pegaseïum melos. 14