Migne Patrologia Latina Tomus 138
Acta conventus Erfordiensis
Acta conventus Erfordiensis
- 3.
Acta conventus Erfordiensis (Auctores varii), J. P. Migne cc_id: cps_2.AucVar.AcCoEr, cc_idno: 9653
Acta conventus Erfordiensis
¶
138.0819A| Anno ab incarnatione domini nostri Jesu Christi 932, anno etiam domini Heinrici regis christianissimi XIV, indictione V, sub die Kalendarum Juniarum congregata est apud Erphesfurt sancta et universalis synodus, ut rex sapientissimus cum consilio primatum 138.0819B| suorum decrevit, inspirante omnium Salvatoris clementia pro utilitate et statu sanctae matris ecclesiae. Cujus rei solertiam prudentissimi viri Hiltiberti archiepiscopi studium gubernabat, considentibus religiosissimis sacerdotibus, id est Ruoperto sanctae Treverensis sedis archiepiscopo, Unni sanctae Hammaburgensis aecclesiae archiepiscopo, Adalwardo Fardunensis sedis episcopo, Riquino Argentinae civitatis episcopo, Notingo Constantiensis aecclesiae episcopo, Unwano Padarbrunnensis sedis episcopo, Uodalricho Augustudunensis aecclesiae episcopo, Bernhardo Halvarastetensis sedis episcopo, Burchardo Wirziburgensis aecclesiae episcopo, Tuotone Osneburgensis sedis episcopo, Rumaldo Mimigartenovurdensis 138.0819C| aecclesiae episcopo, Eberiso Mimidensis aecclesiae episcopo, necnon et abbatibus, aliisque sacri ordinis viris. Porro cum eorum unanimitate ac primum Deo favente capitula infra notata, tam pro nostra quam pro populi christiani correctione, collecta sunt.
- Cap. 1. Ut deinceps natalitia 12 apostolorum summa veneratione solemniter celebrentur; et in vigiliis antiquitus statutis atque hactenus ab antecessoribus nostris servatis jejuniorum vota omni diligentia persolvere decernimus; quia quos coelitus sublimioris meriti scimus, hos et amplioris dignitate honoris a nobis colendos esse non dubitamus.
- 2.
138.0820A| Placita saecularia dominicis vel aliis festis diebus, seu etiam his in quibus legitima jejunia celebrantur, secundum canonicam institutionem minime fieri volumus. Insuper quoque gloriosissimus rex ad augmentum christianae religionis concessit, 138.0820B| ut nulla judiciaria potestas licentiam habeat christianos sua auctoritate ad placitum bannire 7 diebus ante natalem Domini, et a quinquagesima usque ad octavas paschae, et 7 diebus ante nativitatem sancti Joannis Baptistae, quatenus adeundi ecclesiam orationibusque vacandi liberius habeatur facultas.
- 3.
Praecipimus namque, ut nullus christianus ecclesiam pro reverentia petendo, ibique manendo, indeque revertendo, alicujus publicae potestatis banno ibidem constringatur, ne forte, dum ad ecclesiam causa orationis properat, per bannum impediatur pro salute animae devote insistere.
- 4.
Si quis presbyter aut diaconus, negligens vitae suae, mala de se suspicari permiserit, et ejus infamia 138.0820C| coram episcopo canonice denotatur, admoneatur ab episcopo semel, bis, ac tertio, ut vel prodendo reatum culpabilem se esse cognoscat, et sic justae correptionis sententiam excipiat, aut adhibitis secum collegis juramento se expurgando innocentem se esse demonstret.
- 5.
Ut nemo nisi consentiente proprio episcopo, aut ejus misso, jejunium sub optentu religionis sibi imponat, unum diem prae aliis excipiendo, omni modo interdicimus. Quod et factum displicet, et in futurum fieri prohibemus, quia plus causa ariolandi esse dinoscitur quam supplementum catholicae legis.