Migne Patrologia Latina Tomus 138
Acta synodi apud Vermeriam (Auctores varii), J. P. Migne
cc_id: cps_2.AucVar.AcSyApV, cc_idno: 9682
- 1.
¶
Omnibus sanctae dilectionis fratribus ad quorum 138.0595D| haec poterunt pervenire notitiam, Wenilo Senonum, Hincmarus Remorum, Paulus Rotomagensium, Amalricus Turonum, archiepiscopi, Pardulus Lugdunensium, Teutboldus Lingonum, Hucbertus Meldensium, Ansegaudus Abrincatum, Hrothadus Suessionum, Immo Noviemagensium, Hilmeradus Ambianensium, 138.0596C| Yrminfridus Belvacensium, Erpeinus Silvanectensium, Baltfridus Bajocacensium, Guntbertus Ebrocensium, Eirardus Lixoviensium, Erloinus Constantiae, Hildebrannus Sagorum, Godelsadus 138.0596D| Cabillonensium, Jonas Aeduorum, Braidingus Matisconensium, Agius Aurelianensium episcopi, apud Vermeriam palatium jussu gloriosi principis Karoli, anno ab incarnatione Domini 853, indictione prima, 6 Kalend. Septembris, in nomine ejusdem domini nostri Jesu Christi synodaliter congregati, 138.0597A| salutem. Notum fraternitati vestrae fieri volumus, quia nuper instanti anno per praesentem primam indictionem apud urbem Suessionum, decimo Kalendas Maias, ad synodum convenientes, cui sacro conventui idem gloriosus rex suam est dignatus exhibere praesentiam, inter caetera ecclesiastica negotia, de venerabili fratre nostro Herimanno, Nivernensis urbis episcopo, quaestionalis est ratio nobis oblata. Videlicet quia infirmitate praeoccupatus seu praepeditus corporea, saepe ineptire, et quaedam quae ad naufragium rerum et facultatum ecclesiasticarum pertinere, atque ad salvationem ac debitam seu rationabilem dispensationem impedire poterant, nisi celeri remedio subventum foret, agere indiscrete soleret. Cujus suggestionis certa experimentorum documenta evidentius 138.0597B| perquirentes, aliquanta invenimus, quae nobis fidem fecerunt aliis quae audieramus sensum accommodare. Unde secundum quod in decretalibus epistolis beati Gregorii exemplo reperimus, statuimus illi oeconomum persuadere, qui ei suffragium et ecclesiae sibi commissae custodiam debitam et canonicam exhiberet, donec annuente Domino isdem frater venerabilis a sua infirmitate optabiliter convalesceret. Sed quoniam intimatum est nobis, in sua ecclesia neminem posse reperiri qui interim eundem venerabilem, partim indebita forte pietate, partim reverentia seniorali, secundum modum a nobis constitutum custodire aut vellet aut posset, consilii consultu illum hortati sumus, ut cum domno Wenilone praenominato, scilicet reverendissimo 138.0597C| confratre nostro et archiepiscopo suo, maneret, illeque ei conveniens studium impertiri curaret, et ecclesiae Nivernensi ea quibus indigeret visitatorio officio impenderet et ordinaret, quousque aestivum tempus, quod hujusmodi infirmitati, qua impediri dicebatur, valde contrarium est, pertransiret, et saepefatus dilectissimus ac venerabilis frater noster, ut praediximus, a sua infirmitate inmelioraretur, et suae potestati suaeque ipsius custodiae, suaeve ecclesiae dispositioni, ut est debitum, restitueretur. Quae quoniam, gratias Deo, ad votum juxta divinam ordinationem, ut fuerant disposita, sunt quoque perducta, et canonica jubet auctoritas, ut ab uno quilibet rejectus episcopo, non dicamus a 138.0597D| tantis pro tempore et ad tempus remotus secundum quendam modum episcopis, non recipiatur sine testimonii aut litterarum evidentissimo documento, per hos nostrae humanitatis apices plerunque dictum venerabilem fratrem nostrum suae ditioni et potestati, atque episcopali custodiae, suaeque ecclesiae gubernationi debite restituimus, et nos eum non morum vitiis, aut peccatis publicis, quae censura damnat ecclesiastica, a sua illum ecclesia aliquantulum removisse, quod sine aperta convictione vel manifesta confessione fieri non licet, qua de re et non libet, sed corporeae suae infirmitati, et ecclesiae 138.0598A| sibi commissae necessitati pietative, consuluisse manifestissime demonstramus. Quod ut praesentibus scilicet et futuris temporibus enucleatius cognoscatur, his gestis manibus propriis subterfirmare decrevimus.
- 2.
In nomine Patris, et Filii, et Spiritus sancti. Episcopi qui jussu gloriosi principis domni nostri Karoli ad synodum in Vermeriam palatium convenimus, id est, Wenilo archiepiscopus, Paulus archiepiscopus, Amalricus archiepiscopus, Hincmarus archiepiscopus,, Teutboldus episcopus, Ansegaudus episcopus, Pardulus episcopus, Hrothadus episcopus, Immo episcopus, Yrminfridus episcopus, Erpoinus episcopus, Hilmeradus episcopus, Agius episcopus, Erloinus episcopus, Baltfridus episcopus, 138.0598B| Guntbertus episcopus, Eirardus episcopus, Hildebrannus episcopus, Ionas episcopus, Godelsadus episcopus, Braidingus episcopus, Chuonrado inclyto et nobilissimo viro praesentem et aeternam optamus in omnium salvatore salutem. Cum inter caetera ecclesiastica negotia de ordinabili dispositione monasterii sancti Dyonisii disponeremus, venerunt monachi ipsius sacri coenobii in praesentia venerandae synodi, deferentes auctoritates, videlicet testamentum quod sanctae recordationis abba Fulradus de monasterio Lebraha, ubi sanctus Alexander martyr quiescit humatus, et de cella quae ad sanctum Yppolitum nominatur, seu de rebus aliis quas per idem testamentum isdem venerabilis abbas sancto Dyonisio contulerat, necnon et privilegium 138.0598C| quod exinde sancta sedes apostolica per beatum Stephanum papam eidem monasterio super praefato testamento fecerat, dicentes quod venerabilis abbas illorum domnus Hludowicus, ex praecepto gloriosi regis domni nostri Karoli, eos consuluisset, ac consensum eorum quaesisset, quatinus praescriptum monasterium vobis in precariam, acceptis rebus vestra traditione ad eandem casam Dei delegandis, concessisset: quod consentire sine consultu sui episcopi atque archiepiscopi, immo sacrae synodi, non auderent. Quam causam subtiliter investigantes, et ad liquidum cognoscentes, diffinivimus juxta sacram et divinam auctoritatem, atque secundum testamentum praefati piae recordationis Fulradi, 138.0598D| necnon et secundum decretum apostolicae sedis, nullo unquam tempore jam dictum monasterium sancti Alexandri cum rebus sibi pertinentibus a majore monasterio sancti Dyonisii quocumque ingenio divellendum, nec beneficiario neque precario jure distrahendum. Subjunxerunt etiam idem monachi, quod vestra commendatione ac jussione, immo etiam actione, idem monasterium cum rebus sibi subditis in vestram ditionem redactum et assumptum, quin etiam usurpatum habuissetis. Quod quam absurdum et contra legem atque justitiam sit, si tamen ita se res habet, ipsi etiam pervidetis. Unde 138.0599A| vestram paterna et caritativa seu auctoritativa cum interpositione divini nominis et episcopalis auctoritatis nobilitatem hortamur et obtestamur, ut hoc nullatenus agere ulterius attentetis; sed et si molitum est, ab hujusmodi molitione vel actione vos vestrosque compescatis; quia et contra Deum et contra omnem auctoritatem contraque vestram salutem esse dinoscitur. Sciatis etiam, quia domnum et seniorem nostrum regem gloriosissimum Karolum et humili suggestione et divina auctoritate 138.0600A| obsecravimus, praefatoque venerabili abbati et monachis suis praecepimus, ut in hoc nulli adsensum praebeant, quoniam nec vobis nec cuiquam fidelium expedit talia postulare. Valeto, vir nobilissime, et admodum nobis in Christo carissime.
- 3.
Sed et capitula quae synodali consultu domnus rex Karolus in concilio memorato apud Suessionis civitatem sacro proposuit conventui, coram fidelibus suis in eodem palatio Vermeria relegi fecit, et ab omnibus consonanter suscepta sunt et accepta.
Apparatus
- NOTA. Haec quae sequuntur diffinitiones in synodo apud Vermeriam palatium habita, actae sunt anno suprascripto, in mense Augusto, indictione praefata.
p. 0600A