Migne Patrologia Latina Tomus 52
AucVar.ApVeMo 52 Auctores varii Parisiis J. P. Migne 1846 early modern edition, no apparatus this file was encoded in TEI xml for the University of Zurich's Corpus Corporum project (www.mlat.uzh.ch) by Ph. Roelli in 2013 Classical Latin orthography latin
I. Ex autographo tabularii Canonicorum Aquileiensium de anno 1183.
Nos Liuprandus Aquileiensis Ecclesiae decanus, Oto diaconus, Joannes diaconus, Hermannus diaconus thesaurarius, Gompertus diaconus, Joannes diaconus, Rambaldus diaconus, Otacus diaconus, Mainardus subdiaconus, Artuicus subdiaconus, Rempotus presbyter, Petrus subdiaconus, Hermeinardus subdiaconus, Wernerius presbyter, Rodulfus diaconus, Megenardus presbyter, Eliseus presbyter, Leonardus diaconus, Magister Aldigerius acolythus, Thomas acolythus, Petrus presbyter de Utino, et Vodescalcus subdiaconus, omnes canonici ejusdem Aquileiensis Ecclesiae, Bertoldus vicarius Domini patriarchae, Natalis presbyter vicarius Concordiensis episcopi, Dominicus presbyter vicarius Tergestini episcopi, Joannes presbyter vicarius comitis, sicut jamdudum proposuimus, ita coram Deo et sanctis ejus promittimus manutenere justitiam Aquileiensis Ecclesiae, et prosequi ipsam coram Domino papa contra Gabrielem praepositum, qui contra privilegium institutionis communis vitae a Vodalrico patriarcha apostolicae sedis legato, consentiente cuncto capitulo, confectum, et contra privilegium beati patris nostri Lucii papae de confirmatione ejusdem communis vitae per nuntios nostros nobis directum veniens, administrationem communis totius vitae per comminationem propinquorum suorum, nobis propter timorem personarum nostrarum consentientibus, abstulit, et injuste detinet; et quidquid Domino papae super hac controversia statuere placuerit, nos cum omni obedientia et devotione volumus recipere.
Et ego Liuprandus presbyter Aquileiensis decanus dico, etc. Omissis. Ego Dominicus presbyter vicarius Wernardi Tergestini episcopi dico, etc. Omissis. Ego Natalis presbyter vicarius Concordiensis episcopi dico, etc. Omissis.
Nos omnes praenominati canonici addimus ad haec, et uno ore testificamur, quod per mediatores nostros obtulimus praeposito redditus duodecim marcarum annuatim, si ipse vellet quiescere et non auferre nobis administrationem. Sed ipse nobis, consilio fratrum suorum et aliorum qui in rusticos nostros modo dominantur et bona eorum diripuerunt, respondit quod nihil reciperet nisi sibi administrationem traderemus. Quod ipse praepositus praeter debitum factum indebita exactione rusticos exspoliavit, et idem fecit sacerdotibus postquam accepit administrationem, unde multi ex rusticis nostris, sicut ipsi dixerunt, jam de mansis nostris aufugissent, nisi ad manus et potestatem nostram umquam redire sperarent. Et damus licentiam nuntiis sic jurandi in animabus nostris. + Signum suprascriptorum canonicorum, qui hoc rogaverunt fieri.
Petrus Vener. Caprulanae Ecclesiae presbyter et canonicus atque palatii Venet. notarius rogatus a decano et ab aliis fratribus suprascriptis, sicut ex ore eorum singillatim audivi, ita scripsi, complevi, et roboravi, anno Domini millesimo centesimo octuagesimo tertio, octavo die exeunte mense Octobr., indictione secunda, Caprulis.
II. Actus Capituli Aquileiensis de anno 1260. Nos Asquinus decanus cum capitulo Aquileiensi, videlicet venerabilibus episcopis Bonacursio Emoniensi et Conrado Justinopolitano, Artico de Castelerio, Vuodolrico decano civitatensi, Vuarnerio de Cucanea, Magistro Henrico de Pulcinico, Magistro Valtero, Alberico cantore, Rozio de Osopio, Bonafide, Rodulfo de Moruzio, Magistro Villielmo scholastico, Conrado de Brazaco, Ricoldo praeposito Concordiensi, Vuodalrico de Cucanea, Ferrarino, Leonardo de Feugnaco, Berardo praeposito sancti Felicis, et Hermanno de Utino canonicis Aquileiensibus, statuimus et juramento interposito firmiter promittimus servare indulgentiam diminutionis numeri canonicorum usque ad 24 factam in Ecclesia Aqui leiensi per venerabilem patrem D. G. patriarcham Aquil. auctoritate sedis apostolicae, nec contrafacere vel venire aliquo modo vel ingenio, aliquem eligendo vel recipiendo in canonicum, et in fratrem, communiter vel divisim, vel alicui assignando praebendam aliquam seu locum in choro et capitulo atque stallum in praejudicium numeri supradicti canonicorum. Immo nos praedictam indulgentiam diminutionis numeri canonicorum usque ad 24 factam, pro posse bona fide, quantum de jure poterimus, defendemus. Si quis autem canonicorum contra hoc fecerit, vel attentare praesumpserit, per annum sit a praebenda Aquil. suspensus. Ad cujus rei certitudinem et stabilem firmitatem praesens statutum fecimus nostri sigilli pendentis munimine roborari. Actum in capitulo Aquileiensi, currente anno Domini 1260, die sexto intrante Martio, sexta indictione.