Migne Patrologia Latina Tomus 78
GreI.Benedi2 78 Gregorius I 540-604 Parisiis J. P. Migne 1849 early modern edition, no apparatus this file was encoded in TEI xml for the University of Zurich's Corpus Corporum project (www.mlat.uzh.ch) by Ph. Roelli in 2013 Classical Latin orthography latin
Benedictio in vigilia Natalis Domini.
Omnipotens Deus, qui incarnatione Unigeniti sui mundi tenebras effugavit, et ejus gloriosa Nativitate hanc sacratissimam noctem irradiavit, effuget a vobis tenebras vitiorum, et irradiet corda vestra luce virtutum. Amen. Quique ejus sacratissimae Nativitatis gaudium magnum pastoribus ab angelis voluit nuntiari, ipse super vos Benedictionis suae gratissimum imbrem infundat, atque ipso pastore vos ad aeternorum gaudiorum pascua aeterna perducat. Amen. Et qui per ejus Incarnationem terrena coelestibus sociavit, internae pacis et bonae voluntatis vos nectare repleat, et coelestis militiae consortes efficiat. Amen. Quod ipse praestare dignetur, cujus regnum et imperium sine fine permanet in saecula saeculorum. Amen. Benedictio Dei Patris et Filii et Spiritus sancti, et pax Domini sit semper vobiscum.
Benedictio in die Natalis Domini.
Benedicat vos omnipotens Deus, vestramque ad superna excitet intentionem, qui hanc sacratissimam diem Nativitate Filii sui fecit esse solemnem. Amen. Et qui eum qui panis est angelorum in praesepi Ecclesiae cibum fecit esse fidelium animalium, ipse vos et in praesenti saeculo degustare faciat aeternorum dulcedinem gaudiorum, et in futuro perducat ad satietatem aeternorum praemiorum. Amen. Quique ejus infantiam vilibus voluit indui pannis, ipsa vos coelestium vestimentorum induat ornamentis. Amen. Quod ipse praestare dignetur, etc.
Benedictio in nativitate sancti Stephani martyris.
Deus qui Beatum Stephanum protomartyrem coronavit, et confessione fidei, et agone martyrii, mentes vestras circumdet, et praesenti saeculo corona justitiae et in futuro perducat vos ad coronam gloriae. Amen. Illius obtentu tribuat vobis Dei et proximi charitate semper exuberare, qui hanc studuit etiam inter lapidantium impetus obtinere. Amen. Quo ejus et exemplo roborati, et intercessione muniti; ab eo, quem ille a dextris Dei vidit stantem, mereatur benedici. Amen. Quod ipse praestare dignetur, qui cum, etc.
In nativitate sancti Joannis evangelistae.
Omnipotens Deus dignetur vobis per intercessionem beati Joannis apostoli et evangelistae benedicere, qui per eum arcana verbi sui voluit Ecclesiae revelare. Amen. Concedat nobis ut quod ille Spiritus sancti munere afflatus vestris auribus infudit, ejusdem Spiritus dono capere mente valeatis. Amen. Quo ejus documento de divinitate nostri Redemptoris edocti, et amando quod tradidit et praedicando quod docuit, et exsequendo quod jussit, ad dona pervenire mereamini quae idem Jesus Christus Dominus noster repromisit. Amen. Quod ipse praestare dignetur, etc.
Benedictio in nativitate sanctorum Innocentum.
Omnipotens Deus, pro cujus Unigeniti veneranda infantia, infantum innocentum catervas Herodis funesti peremit saevitia, suae vobis Benedictionis tribuat dona gratissima. Amen. Et qui eis concessit ut unicum Filium ejus Dominum nostrum non loquendo, sed moriendo confiterentur, concedat vobis, ut fidem veram, quam lingua vestra fatetur, etiam mores probi et vita inculpabilis fateantur. Amen. Quique eos primitivum fructum sanctae suae suscepit Ecclesiae, cum fructu bonorum operum vos faciat pervenire ad gaudia aeternae patriae. Amen. Quod ipse praestare, ut supra.
Benedictio in octava D. N.
Omnipotens Deus, cujus Unigenitus hodierna die, ne legem solveret, quam adimplere venerat, corporalem suscepit circumcisionem, spiritali circumcisione mentes vestras ab omnibus vitiorum incentivis expurget, et suam in vos infundat Benedictionem. Amen. Et qui legem per Moysen dedit, ut per Mediatorem nostrum Benedictionem daret, exuat vos mortificatione vitiorum, et faciat perseverare in novitate virtutum. Amen. Quo sic in senarii numeri perfectione in hoc saeculo vivatis, et in septenario inter beatorum spirituum agmina requiescatis, quatenus in octavo resurrectione renovati, Jubilaei remissione ditati, ad gaudia sine fine mansura perveniatis. Amen. Quod ipse praestare dignetur, etc.
Benedictio in Theophania.
Deus lumen verum, qui Unigenitum suum hodierna die stella duce gentibus voluit revelare, sua vos dignetur benedictione ditare. Amen. Quo exemplo magorum mystica Domino Jesu Christo munera offerentes spreto antiquo hoste, spretisque contagiis vitiorum, ad aeternam patriam redire valeatis per viam virtutum. Amen. Detque vobis veram mentium innocentiam, qui super Unigenitum suum spiritum sanctum demonstrari voluit per columbam, eaque virtute mentes vestrae exerceantur ad intelligenda divinae legis Arcana, qua in Cana Galileae limpha est in vinum conversa. Amen. Quod ipse praestare dignetur, etc.
Benedictio in Purificatione sanctae Mariae.
Omnipotens Deus, qui Unigenitum suum hodierna die in assumpta carne in templo voluit praesentari, Benedictionis suae vos munere fultos, bonis operibus faciat exornari. Amen. Et qui eum, ut legem adimpleret, ministrum voluit effici legis, mentes vestras instruat legis suae spiritalibus documentis. Amen. Quo ei et pro turturibus castitatis seu charitatis munera offerre valeatis, et pro pullis columbarum Spiritus sancti donis exuberetis. Amen. Quod ipse praestare dignetur, etc.
Benedictio in annuntiatione sanctae Mariae.
Dominus Jesus Christus, qui in saeculorum fine processit ex Virgine, cor vestrum virginitatis incorruptae corona clarificet. Et qui annuntiante angelo Virginis ingressus est uterum, ejus vos ministerii et instruat et muniat sacramento. Amen. Quique hodie Virginis conceptionem devotissime celebratis, ad Nativitatem nostri Redemptoris exultantibus animis et mundo corde perveniatis. Amen. Quod ipse praestare dignetur, qui cum, etc.
Benedictio in Septuagesima.
Deus omnipotens, qui unicuique nostrum ita currere ut comprehendamus jussit per Apostolum suum, infundat cordibus vestris Paracletum Spiritum, quo et felicissimum valeatis consummare cursum, et in ejus vinea, licet diversis vocationibus laborantes, promissae tamen ab eo mercedis mereamini recipere nummum. Amen. Ejusdem sancti Spiritus illustrati gratia, vegetati clementia, taliter flagitia relinquatis, atque plangatis praeterita, devitetis praesentia, caveatis futura, qualiter digne a vobis observanda hic inchoetur, et dignius etiam consummetur sacratissimae quadragesimae abstinentia ventura. Amen. Quatenus peragentes competenter ipsum tempus quadragesimale, purificatis mentibus ab omni vitiorum labe, mereamini mundi venire ad celebrandum solemniter festum paschale. Amen.
Benedictio sacrosanctae Eucharistiae.
Omnipotens Deus, opifex totius fabricae mundi, qui in principio condidit omnia opera sua perfectione senarii numeri, dignetur vobis per ineffabilem gratiam suam largiri ut omni vitae vestrae tempore continua suae Benedictionis mereamini protectione muniri. Amen. Concedatque vobis illa opera per sex dierum curricula patrare, per quae in septimo tantam et talem gratiam ejus valeatis impetrare, ut et ipsius possitis laudibus delectabiliter vacare, et sine crimine sincerissima devotione sacrosancto corpori et sanguini dominico ad remedium communicare. Amen. Quo spiritali alimonia recreati, ejus optabili custodia tutati, perpetualiter placeatis ei, ab omni opere servili penitus liberati et ab universo facinore pariter mundati. Amen. Quod ipse praestare dignetur, etc.
Benedictio in Quadragesima.
Benedicat vos divina pietas et ejus aeterna Majestas, qui per legislatorem Moysen famulum suum praecepit Judaicae plebi ut anno jubilaeo terrae foret remissio, et servorum etiam libertas. Amen. Liberet vos a jugo diabolicae servitutis, et superaddens vobis vigorem pristinae salutis, effundat super vos clementer spiritum servitutis. Amen. Quo tales egredi mereamini de corpore ab omni scelerum contagione purgati, quales per Christi roseum cruorem redimendo fuistis misericorditer expiati. Amen. Quod ipse praestare dignetur, etc.
Benedictio initio Quadragesimae.
Benedicat vobis omnipotens Deus, qui quadragenarium numerum in Moysi et Heliae, necnon et Mediatoris nostri jejunio consecravit, concedatque vobis ita transigere praesentis vitae dispensationem, ut, accepto a Patrefamilias remunerationis denario, perveniatis ad peccatorum omnium remissionem, et ad gloriosam cum sanctis omnibus resurrectionem. Amen. Detque vobis spiritualium virtutum invictricia arma, quibus exemplo Domini devincere valeatis antiqui hostis sagacissima tentamenta. Amen. Quo non in solo pane, sed in omni verbo, quod de ore ejus procedit, spiritatem sumentes alimoniam, per jejuniorum observationem et caeterorum bonorum operum exhibitionem percipere mereamini immarcescibilem gloriae coronam. Amen. Quod ipse praestare dignetur, etc.
Hebdomadis secundae in Quadragesima Benedictio.
Omnipotens Deus, jejunii caeterarumque virtutum dedicator atque amator, sua vos benedictione sanctificet. Amen. Accendat in vobis piae devotionis affectum et praebeat supplicantibus suum benignum auditum. Amen. Quatenus mentes vestrae sinceris purgatae jejuniis bonorum omnium exuberent incrementis. Amen. Quod ipse praestare, etc.
Dominicae III in Quadragesima Benedictio.
Omnipotens Deus jejuniorum vestrorum victimas clementer accipiat, et sua vos benedictione dignos efficiat. Amen. Mentes vestras ita parcimoniae bono contra vitia muniat, praeceptorum suorum doctrinis erudiat, charitatis dono repleat, ut vos in omnibus sibi placere concedat. Amen. Quatenus praesentis quadragesimae diebus devotissime celebratis, ad paschalia festa purificatis cordibus accedere valeatis. Amen. Quod ipse praestare dignetur, etc.
Dominicae IV in Quadragesima Benedictio.
Deus, qui vos ad praesentiam quadragesimalium dierum medietatem dignatus est perducere, ipse vos sua miseratione dignetur benedicere. Amen. Abstinentiam vestram praeteritam acceptet, futuram ita sibi placitam reddet, ut sicut ab illicitis cibis, ita vos etiam a vitiis omnibus abstinere concedat. Amen. Quo de praeteritis et de futuris spiritalium charismatum frugibus ei grates persolventes, ad sanctum pascha pervenire possitis indemnes. Amen. Quod ipse praestare dignetur, etc.
Benedictio in Dominica V in Quadragesima.
Accendat in vobis Dominus vim sui amoris, et per jejuniorum observantiam infundat vobis donum suae Benedictionis. Amen. Sic ei parcimoniae victimas offeratis, ut contriti ei cordis et humiliati sacrificio placeatis. Amen. Quatenus Oratio vestra jejunii et eleemosynae alis subvecta ita ad aures vestri conditoris ascendat, ut vos aeternae beatitudinis haeredes, et supernorum civium consortes efficias. Amen. Quod ipse praestare, etc.
Benedictio in Ramis Palmarum.
Benedicat vobis omnipotens Deus, cui et jejuniorum maceratione, et praesentium dierum observatione placere studeatis. Amen. Concedat vobis, ut sicut ei cum ramis Palmarum caeterarumve frondium praesentare studuistis, ita cum palma victoriae et fructu bonorum operum ei post obitum apparere valeatis. Amen. Quique Unigeniti Filii ejus passionem puro corde creditis, mente devota venerari studetis, ad Resurrectionis ejus festa et vestrae remunerationis praemia, ipsius fulti munimine, veniatis. Amen. Quod ipse praestare, dignetur, etc.
Item alia Benedictio de Passione.
Omnipotens Deus, qui Unigeniti sui passione tribuit vobis humilitatis exemplum, concedat vobis per eamdem humilitatem percipere suae Benedictionis ineffabile donum. Amen. Quatenus ipsius resurrectionis percipiatis consortia, cujus patientiae veneramini documenta. Amen. Quo ab eo sempiternae vitae munus percipiatis, per cujus temporalem mortem aeternam vos evadere creditis. Amen.
Benedictio in Coena Domini.
Benedicat vos Deus, qui per unigeniti Filii sui passionem vetus Pascha in novum voluit converti, concedatque vobis ut, expurgato veteris fermenti contagio, nova in vobis perseveret conspersio. Amen. Et qui ad celebrandam Redemptoris nostri coenam mente devota convenistis, aeternarum dapium vobiscum epulas reportetis. Ipsius quoque opitulante clementia mundemini a sordibus peccatorum, qui ad insinuandum humilitatis exemplum pedes voluit lavare discipulorum. Amen. Quod ipse praestare dignetur, etc.
Benedictio in Sabbato sancto.
Deus qui de Ecclesiae suae intemerato utero novos populos producens, ea in virginitate manente nova semper prole foecundat, fidei, spei et charitatis vos munere repleat, et suae in vos Benedictionis dona infundat. Amen. Et qui hanc sacratissimam noctem Redemptoris nostri Resurrectione voluit illustrare, mentes vestras peccatorum tenebris mundatas virtutum copiis faciat coruscare. Amen. Quo eorum, qui modo renati sunt, innocentiam imitari certetis, et vascula mentium vestrarum exemplo praesentium luminum illustretis, ut cum bonorum operum lampadibus ad hujus sponsi thalamum, cujus Resurrectionem celebratis, eum prudentibus virginibus intrare possitis. Amen. Quod ipse praestare dignetur, etc.
Benedictio in die sancto Paschae.
Benedicat vos omnipotens Deus hodierna interveniente paschali solemnitate, et ab omni miseratus dignetur defendere pravitate. Amen. Et qui ad aeternam vitam in Unigeniti sui Resurrectione vos reparat, in ipsius adventu immortalitatis vos gaudiis vestiat. Amen. Et qui, expletis jejuniorum, sive passionis dominicae, diebus, paschalis festi gaudia celebratis, ad ea festa, quae non sunt annua, sed continua, ipso opitulante exsultantibus animis veniatis. Amen. Quod ipse praestare dignetur, etc.
Benedictio in octava Paschae.
Deus, cujus Unigenitus hodierna die discipulis suis januis clausis dignatus est apparere, suae vos Benedictionis dono locupletare et coelestis vobis regni januas dignetur aperire. Amen. Et, qui ab eorum pectoribus attactu sui corporis vulnus amputavit dubietatis, concedat ut per fidem qua eum resurrexisse creditis omnium delictorum maculis careatis. Amen. Et, qui eum cum Thoma Deum et Dominum creditis, et cernitis, vocibus invocatis, ab eo et in hoc saeculo a malis omnibus tueri et in futuro sanctorum caetibus adscisci valeatis. Amen. Quod ipse praestare dignetur, etc.
Benedictio de Resurrectione.
Benedicat vos omnipotens Deus, qui vos gratuita miseratione creavit, et in resurrectione Unigeniti sui, spem vobis resurgendi concessit. Amen. Resuscitet vos de vitiorum sepulcris, qui eum resuscitavit a mortuis. Amen. Ut cum eo sine fine feliciter vivatis, quem resurrexisse a mortuis veraciter credatis. Amen. Quod ipse praestare dignetur.
Alia. --Deus, qui per Resurrectionem Unigeniti sui vobis contulit et bonum Redemptionis, et decus adoptionis, suae vobis conferat praemia Benedictionis. Amen. Et, quo redimente percepistis donum perpetuae libertatis, eo largiente consortes efficiamini aeternae haereditatis. Amen. Et cui consurrexistis in baptismate credendo, adjungi mereamini in coelesti regione bene vivendo. Amen. Quod ipse praestare dignetur, etc.
Benedictio de Jejunio.
Omnipotens Deus devotionem vestram dignanter intendat, et suae vobis Benedictionis dona concedat. Amen. Indulgeat vobis mala omnia quae gessistis, et tribuat vobis veniam, quam ab eo deposcitis. Amen. Sicque jejunii vestri et precum vota suspiciat, ut a vobis adversa omnia, quae peccatorum retributione meremini, avertat, et donum in vos spiritus Paracleti infundat. Amen. Quod ipse praestare dignetur, etc.
Benedictio in die Ascensionis Domini.
Benedicat vos omnipotens Deus, cujus Unigenitus hodierna die coelorum alta penetravit, et vobis, ubi ille est, ascendendi aditum patefecit. Amen. Concedat propitius ut, sicut post resurrectionem suam discipulis visus est manifestus, ita vobis in judicium veniens videatur placatus. Amen. Et, qui eum consedere Patri in sua majestate creditis, nobiscum manere usque in finem saeculi secundum suam promissionem sentiatis. Amen. Quod ipse praestare dignetur, etc.
Benedictio in vigilia Pentecostes.
Benedicat vos omnipotens Deus, ob cujus Paracleti Spiritus adventum mentes vestras jejunii observantia praeparatis, et praesentem diem solemnibus laudibus honoratis. Amen. Instar modo renatorum infantium talem innocentiam habeatis, ut templum sancti Spiritus ipso tribuente esse possitis. Amen. Atque idem sanctus Spiritus ita vos hodie sua habitatione dignos efficiat, ut cras se vestris mentibus vobiscum perpetim habitaturus infundat, et peracto praesentis vitae curriculo vos ad coelestia regna perducat. Amen. Quod ipse praestare dignetur, etc.
Benedictio in Pentecoste.
Deus, qui hodierna die discipulorum mentes Spiritus Peracleti infusione dignatus est illustrare, faciat vos sua Benedictione repleri et ejusdem spiritus donis exuberare. Amen. Ille ignis, qui super discipulos apparuit, peccatorum vestrorum sordes expurget, et sui luminis infusione corda vestra perlustret. Amen. Quique dignatus est diversitatem linguarum in unius fidei confessione adunare, in eadem vos faciat constantia fidei perseverare, et per hanc a spe ad speciem pervenire. Amen. Quod ipse praestare dignetur, etc.
Benedictio in nativitate sancti Joannis Baptistae.
Benedicat vos omnipotens Deus beati Joannis Baptistae intercessione, cujus hodierna die natalitia celebratis, concedatque, ut cujus solemnia colitis, patrocinia sentiatis. Amen.
Illius obtentu ab omnibus adversis tueamini, et bonis omnibus perfruamini, qui adventum Redemptoris mundi nec dum natus cognovit, matris sterilitatem nascendo abstulit, patris linguam natus absolvit. Amen. Quatenus ipsius Agni, quem ille digito ostendit, cujus immolatione estis redempti, ita virtutum lanis vestiri, et innocentiam valeatis imitari, ut ei in aeternae patriae felicitate possitis adjungi. Amen. Quod ipse praestare dignetur, etc.
Alia. --Benedicat vos omnipotens Deus, qui unigeniti Filii sui per beatum Joannem tandem nostri misertus nuntiavit in terris adventum. Amen. Ipse Spiritus sanctus, qui eum replevit clausum in utero matris, et patris linguam solvit a vinculo, faciat vos sua Benedictione repleri ut spiritalibus donis abundanter exuberare. Amen. Ascendat vox deprecantis praecursoris ad aures clementissimi Patris, qui mundi Redemptorem ante novit confiteri, quam nasci, quique auctorem lavacri sacris manibus suis tinxit in fonte, maculas delictorum vestrorum clementer sua intercessione expurget, atque copiis virtutum fecundet. Amen. Quod ipse praestare dignetur, etc.
Benedictio in festivitate sanctae Crucis.
Benedicat vos omnipotens Deus, qui per unigeniti sui Jesu Christi Domini nostri passionem, et crucis patibulum, genus redemit humanum. Amen. Concedatque vobis ut cum omnibus sanctis quae sit ejusdem crucis longitudo, latitudo, sublimitas et profundum, mente devota comprehendere possitis. Amen. Quatenus vosmetipsos abnegando, crucemque gestando, ita in praesentis vitae stadio Redemptorem nostrum possitis sequi, ut ei inter choros angelorum post obitum mereamini adscissi. Amen. Quod ipse praestare dignetur, etc.
Benedictio in nativitate apostolorum Petri et Pauli.
Benedicat vos omnipotens Deus qui vos beati Petri saluberrima confessione in ecclesiasticae fidei fundavit soliditate. Amen. Et quos beati Pauli sanctissima instruxit praedicatione, sua tueatur gratissima defensione. Amen. Quatenus Petrus clave, Paulus sermone, utrique intercessione ad illam vos certent patriam introducere, ad quam illi, alter cruce, alter gladio, hodierna die meruerunt pervenire. Amen. Quod ipse praestare dignetur, etc.
Benedictio in Assumptione sanctae Mariae.
Deus, qui beatissimam virginem Mariam Domini nostri Jesu Christi gloriosissimam Genitricem hodierna die ad coelos voluit evocare, et super choros angelorum sublimiter exaltare, suae vos Benedictionis gratia per intercessionem ejus et merita dignetur taliter ditare, qualiter a vitiis ad virtutes mereamini transmigrare. Amen. Concedatque vobis in hoc saeculo, sic fide vigere, spe gaudere, et charitate pollere, castitatis jugiter eminentia fulgere et humilitatis etiam excellentia splendere, quo ipsi per omnia bonis operibus adornati valeatis placere. Amen. Faciatque vos omnia praeterita flagitia et facinora ita die noctuque gemitibus et fletibus expiare, praesentia et futura tam salubriter evitare, quatenus cum ipsa possitis aeternaliter in coelestibus emicare. Amen. Quod ipse praestare dignetur, etc.
Benedictio in festo sancti Joannis de Martyrio.
Deus, qui vos beati Joannis Baptistae concessit solemnia frequentare, tribuat vobis et eadem devotis mentibus celebrare, et suae Benedictionis dona percipere. Amen. Et qui pro legis ejus praeconio carceralibus est retrusus in tenebris, intercessione sua a tenebrosorum operum vos liberet incentivis. Amen. Et qui pro veritate, quae Deus est, caput non est cunctatus amittere, suo interventu ad caput vestrum, quod est Christus vos faciat pervenire. Amen. Quod ipse praestare dignetur, etc.
Benedictio in nativitate sanctae Mariae.
Deus, qui per beatae Mariae virginis partum genus humanum dignatus est redimere, sua vos dignetur Benedictione locupletare. Amen. Ejusque semper, et ubique patrocinia sentiatis, ex cujus intemerato utero auctorem vitae suscipere meruistis. Amen. Et qui ad ejus celebrandam nativitatem hodierna die devotis mentibus convenistis, spiritalium gaudiorum, et aeternorum praemiorum vobiscum munera reportetis. Amen. Quod ipse praestare dignetur, etc., ut supra.
Benedictio de adventu Domini.
Omnipotens Deus, cujus Unigeniti adventum et praeteritum creditis, et futurum exspectatis, ejusdem adventus vos illustratione sanctificet, et sua Benedictione locupletet. Amen. In praesenti vitae stadio vos ab omni adversitate defendat, et se vobis in judicio placabilem ostendat. Amen. Quo, a cunctis peccatorum contagiis liberati, illius tremendi examinis diem exspectetis interriti, cujus sanguine estis redempti. Amen. Quod ipse praestare dignetur, etc.
Item alia. --Omnipotens Deus vos placito vultu respiciat, et in vos suae Benedictionis donum infundat. Amen. Et qui hos dies Incarnatione Unigeniti sui fecit solemnes, a cunctis praesentis et futurae vitae adversitatibus vos reddet indemnes. Amen. Ut. qui de Adventu Redemptoris nostri secundum carnem devota mente laetamini, in secundo, cum in Majestate sua venerit, praemiis aeternae vitae ditemini. Amen. Quod ipse praestare dignetur, etc.
Item alia. --Benedicat vos ineffabilis gratia, et pietas Dei vivi, et annuat vobis per admirabilem et salutarem Adventum Filii sui ne sub dominatione peccati remaneatis, quod absit, captivi. Amen. Ab omni vos miseria tam potenter liberare et in sua misericordia tam clementer dignetur perseveranterque confirmare, ut sibi vos faciat in praesenti saeculo taliter deservire, qualiter ad eum in futuro gaudentes mereamini pervenire. Amen. Quique pro vobis eumdem Unigenitum suum in Adventu primo voluit incarnari, ipse vos in secundo faciat ab injustorum consortio separari et justorum commercio secum perenniter mansuros aggregari. Amen. Quod ipse praestare dignetur, etc.
Item alia. --Benedicat vobis Deus omnipotens, Pater Domini nostri Jesu Christi, Salvatoris atque Redemptoris mundi, et ita vos benedicendo justificet atque sanctificet illustratione primi Adventus ejusdem Unigeniti sui, ne in secundo coram ipso appareatis immundi. Amen. Fundet vos ejus gratia tam firmiter in humilitate vera, et solidet tam stabiliter in charitate sincera, quo taliter vobis displiceant ea quae sunt mundi, et placeant jugiter ea quae sunt Dei, ut in coelesti beatitudine pariter cum sanctis cohaereatis. Amen. Quique pro salute servorum eumdem Filium suum tantum voluit humiliari, ut intra maternum uterum naturae nostrae in unitatem personae copulando dignaretur uniri, intra vos in hoc primo Adventu splendore suae visitationis atque inhabitationis faciat illustrari, quatenus in secundo mereamini cum ipso perpetim gloriari. Amen. Quod ipse praestare dignetur, qui cum Patre, etc.
Benedictio in nativitate unius apostoli.
Deus, qui vos in apostolicis tribuit consistere fundamentis, benedicere vos dignetur, beati apostoli sui N. intercedentibus meritis. Amen. Defendatque vos a cunctis adversis apostolicis praesidiis, qui vos eorum voluit ornari et muniri exemplis et documentis. Amen. Quo per eorum intercessionem perveniatis ad aeternae patriae haereditatem, per quorum doctrinam tenetis fidei integritatem. Amen. Quod ipse praestare dignetur, qui cum Patre, etc.
Benedictio in nativitate unius martyris.
Beati martyris sui N. intercessione vos Dominus benedicat, et ab omni malo defendat. Amen. Extendant in vos dexteram suae propitiationis, qui eum suscepit per supplicia passionis. Amen. Quo ejus in coelo mereamini habere consortium, cujus devotis mentibus in terra celebratis triumphum. Amen. Quod ipse praestare dignetur, etc.
Benedictio in nativitate plurimorum martyrum.
Benedicat vos Dominus beatorum martyrum suorum NN. suffragiis, et liberet ab adversitatibus cunctis. Amen. Commendet vos eorum intercessio gloriosa, quorum in conspectu ejus est mors pretiosa. Amen. Ut, sicut illi per diversa genera tormentorum coelestis regni sunt sortiti haereditatem, ita vos eorum mereamini consortium per bonorum operum exhibitionem. Amen. Quod ipse praestare dignetur, etc.
In festo unius confessoris.
Omnipotens Deus det vobis copiam Benedictionis, qui beatum N. sibi ascivit virtute confessionis. Amen. Et qui illum fecit coruscare miraculis, vos exornet bonorum operum incrementis. Amen. Quo ejus exemplis eruditi, et intercessione muniti, cujus depositionis diem celebratis, illi possitis in coelesti regione adjungi. Amen. Quod ipse praestare dignetur, cujus, etc.
Benedictio in nativitate plurimorum confessorum.
Sanctorum confessorum suorum NN. meritis vos Dominus faciat benedici, et contra adversa omnia eorum intercessione muniri. Amen. Eorum vos efficiat suffragio felices, quorum festivitatis diem celebratis ovantes. Amen. Quo eorum imitantes exempla, ad coelestia pervenire possitis promissa. Amen. Quod ipse praestare dignetur, cujus regnum, etc.
Benedictio in nativitate unius virginis.
Benedicat vos Dominus, qui beatae virgini N. concessit et decorem virginitatis, et gloriam passionis. Amen. Et cujus opitulatione illa meruit et sexus fragilitatem, et persequentium rabiem devincere, vos possitis et vestrorum corporum illecebras et antiqui hostis machinamenta superare. Amen. Quo, sicut illa sexu fragili virile nisa est certamen adire, et post certamen de hostibus triumphare, ita vos in hac mortalitate viventes valeatis et antiquum hostem devincere et ad regna coelestia pervenire. Amen. Quod ipse praestare dignetur, etc.
In nativitate plurimarum virginum.
Omnipotens Dominus intercedentibus sanctis virginibus suis vos dignetur benedicere, qui de antiquo hoste non solum per viros, verum etiam per feminas voluit triumphare. Amen. Et qui illis voluit centesimi fructus donum decore virginitatis et agone martyrii conferre, vos dignetur et vitiorum squaloribus expurgare, et virtutum lampadibus exornare. Amen. Quatenus virtutum oleo ita pectorum vestrorum lampades possint repleri, ut eum eis coelestis sponsi thalamum valeatis ingredi. Amen. Quod ipse praestare dignetur, etc.
In anniversario dedicationis ecclesiae Benedictio.
Deus omnipotens, qui hoc sanctum templum suo gloriosissimo nomini in honore beati N. apostoli sui voluit dedicari, ipse vos precibus et meritis illius Benedictione sua justificari et illustratione visitationis, atque inhabitationis suae faciat sanctificari. Amen. Quatenus qui fuisti aliquando sicut et caeteri, domicilia hostis antiqui, et sub ejus dominatione captivi, mereamini singuli gratissima fieri templa Dei vivi, per ejus gratiam effecti de servis filii adoptivi. Amen. Concedatque vobis ut qui anniversariam dedicationis hujus tabernaculi sui celebratis festivitatem, ad continuam coelestis templi perveniatis alacriter cum sanctis angelis celebraturi perenniter solemnitatem. Amen. Quod ipse praestare dignetur, etc.
In anniversario consecrationis episcopi.
Omnipotens Deus, qui me, quamvis indignum, per immensam suae pietatis affluentiam, intra numerum antistitum, ad ministrandum altari suo, laudis Hostias immolando, dignatus est deputare, atque tam ad coelestis mensae sacramenta quam etiam ad perennis vitae alimenta populo suo erogando destinare, ipse Benedictionis copia dignetur locupletare, et sanctificando gratia sancti Spiritus corda vestra misericorditer vegetare. Amen. Dignetur etiam vos ab omnimodo nequitia clementer expiare, et in suae pietatis excellentia potenter confirmare. Amen. Concedat quoque vobis de malis ad bona et de bonis ad meliora quotidie proficiendo transmigrare, et post hujus terminum vitae ad aeternorum gaudia praemiorum feliciter transmigrare. Amen. Quod ipse praestare dignetur, etc.
Benedictio quotidianis diebus.
Benedicat vobis Dominus, et custodiat vos. Amen. Illuminet faciem suam super vos, et misereatur vestri. Amen. Convertat vultum suum ad vos et donet vobis pacem. Amen. Quod ipse praestare dignetur, etc.
Item alia. --Omnipotens Deus sua vos clementia benedicat, et sensum in vobis sapientiae salutaris infundat. Amen. Catholicae fidei vos documentis enutriat, et in sanctis operibus perseverabiles reddat. Amen. Gressus vestros ab errore convertat, et viam vobis pacis et charitatis ostendat. Amen. Quod ipse praestare dignetur, cujus, etc.
Alia. --Inclinet Dominus aurem suam ad preces vestrae humilitatis, et det gratiam vobis suae benedictionis, et praemium sempiternae salutis. Amen. Semper et ubique Dominum propitium habeatis, et in ejus laudibus exsultetis. Amen. Omnium peccatorum vestrorum vincula solvat, et ad gloriam sempiternam pervenire vos faciat. Amen. Quod ipse praestare dignetur, cujus, etc.
Alia. --Multiplicet in vobis Dominus copiam suae Benedictionis, et confirmet vos in spe regni coelestis. Amen. Actus vestros corrigat, vitam emendet, mores componat, et vos ad coelestis paradisi haereditatem perducat. Amen. Talique intentione repleri valeatis, qua ei in perpetuum placeatis. Amen. Quod ipse praestare dignetur, qui cum, etc.
Alia. --Devotionem vestram Dominus dignanter intendat, et suae vobis benedictionis dona concedat. Amen. Talique vos in praesenti saeculo subsidio muniat, ut paradisi vos in futuro habitatores efficiat. Amen. Sicque corda vestra sanctificando benedicat, et benedicendo sanctificet, ut vobiscum, imo in vobis eum jugiter habitare delectet. Amen. Quod ipse praestare dignetur, etc.
Alia. --Omnipotens Deus det vobis gratiam suae Benedictionis, et repleat vos spiritu veritatis et pacis. Amen. Quatenus sic per viam salutis devota mente curratis, ut subrepentium delictorum laqueos salubriter evadatis. Amen. Sicque efficiamini in ejus supplicatione devoti, et in mutua dilectione sinceri, ut ad coeleste regnum pervenire possitis securi. Amen. Quod ipse praestare dignetur, cujus imperium, etc.
Alia. --Concedat vobis omnipotens Deus, munus suae Benedictionis, qui vestrae est conscius infirmitatis. Amen. Et qui vobis tribuit supplicandi affectum, tribuat consolationis auxilium. Amen. Ut ab eo et praesentis et futurae vitae subsidium capiatis, cujus vos bonitate creatos esse creditis. Amen. Quod ipse praestare dignetur, etc.
Alia. --Omnipotens Deus coelesti vos protectione circumdet, et suae Benedictionis dono locupletet. Amen. Concedatque vobis ut qui in sola spe gratiae coelestis innitemini, coelesti etiam protectione muniamini. Amen. Quatenus et in praesenti saeculo mortalis vitae solatia capiatis, et sempiterna gaudia comprehendere valeatis. Amen. Quod ipse praestare dignetur, etc.
Item alia. --Omnipotens Deus dexterae suae perpetuo vos circumdet auxilio, et Benedictionum suarum repleat dono. Amen. Ab omni vos pravitate defendat, et donis coelestibus exuberare concedat. Amen. Quo corpore mundati ac mente, talem ei exhibeatis servitutem, per quam suam consequi valeatis propitiationem. Amen. Quod ipse praestare dignetur, etc.
Item alia Benedictio. --Purificet omnipotens Deus vestrorum cordium arcana, et Benedictionis suae vobis tribuat incrementa. Amen. A te omnibus vitae praesentis periculis exuamini, et virtutum spiritalium ornamentis induamini. Amen. Quo illius adjutorio fulti, sic ei serviatis in terris, ut ei conjungi valeatis in coelis. Amen.
Item alia. --Omnipotens Deus universa a vobis adversa excludat, et suae super vos Benedictionis dona propitiatus infundat. Amen. Corda vestra efficiat sacris intenta doctrinis, quo possint repleri beneficiis sempiternis. Amen. Quatenus et exsequenda intelligentes, et intellecta exsequentes, et inter adversa mundi inveniamini indemnes, et beatorum spirituum efficiamini cohaeredes. Amen. Quod ipse praestare dignetur. Amen.
Item alia. --Omnipotens Deus dies vestros in sua pace disponat, et suae vobis Benedictionis dona concedat. Amen. Ab omnibus vos perturbationibus liberet, et mentes vestras in suae pacis tranquillitate consolidet. Amen. Quatenus spei, fidei et charitatis gemmis adornati, et praesentem vitam transigatis illaesi et ad aeternam perveniatis securi. Amen. Quod ipse praestare dignetur, cujus regnum et imperium sine fine permanet in saecula saeculorum. Amen.