I.[recensere]
Primitus omnium: Fidem et credulitatem quomodo teneant, et in patrem et in filium et in spiritum sanctum qualiter credant, aut personas quo ordine dividant, sive substantiam qualiter separent, et populum a deo ipsis commissum quomodo predicent.
II.[recensere]
Ut orationem dominicam vel simbolum, sicut in evangelio dominus discipulos suos orare docuit, cum expositione sua desuper memoriter teneant et intellegant.
III.[recensere]
Ut illorum psalmos et ymnos secundum ordinem Romanum recte et distincte, qualiter deo placeant, modulentur.
IV.[recensere]
Ut unusquisque secundum ordinem Romane ecclesiæ missam celebrent et «Te igitur» memoriter teneant et intellegant.
V.[recensere]
Ut illorum scrutinium vel baptisterium pleniter separare et distinguere possint christianitatemque et baptismum ad succurrendum infirmis memoriter teneant; et unusquisque trina mersione in patrem et filium et spiritum sanctum baptizent.
VI.[recensere]
Ut unusquisque suum iudicium penitentialem habeat et eum minime ignoret, qualiter sciat se iudicare facinora maiora et minora, quæ eis a multis confitentur, et qualiter commendationem animæ faciant; et ut sciant, quare communionem hominibus ad extrema deductis transmittunt aut ipsis dant, et egrotos infantes ad mortemque deductos quare baptizent; et sciat se unusquisque secundum Romanam traditionem vel ordinem predicare.
VII.[recensere]
Ut unusquisque pleniter suum ministerium habeat et suos libros, id est sacramentarium, evangelium, lectionarium, antiphonarium, psalterium, omelia beati Augustini vel sancti Gregorii, martyrologium sive compotum, quomodo officium suum devote adimplere possit. Et ipsos prefatos libros absque vitio optime correctos habeat.
VIII.[recensere]
Ut nullus presbiter sive diaconus vel quolibet ordine ecclesiastico constitutus subintroductam feminam in domo sua habeat præter id, quod in canonibus continetur.
IX.[recensere]
Ut nullus ad usuram aliquid accomodare presumat.
X.[recensere]
Ut unusquisque presbiter per suos dioceses predicent, ut nullus christianus vel fidelis in die sabbato post horam nonam ullum opus manibus vel quolibet artificio facere presumat nec diebus dominicis seu festis maioribus canonizatis.
XI.[recensere]
Ut confessionem fidei catholicæ cum expositione sua divisæ persone memoriter teneant, quam papa Damasus ad Paulinum Antiocenum episcopum misit.
XII.[recensere]
Ut omnes presbiteri sive diaconi vel subdiaconi aut quolibet gradu ordinati obediant suum archipresbiterum, in cuius parrochia constituti seu pretitulati sunt, sicut in canonibus continetur; et ad eorum plebes dormiant in simul, prout eis constitutum est ab episcopo suo.
XIII.[recensere]
Ut nullus exterum clericum de alterius parochia recipiat nisi per licentiam sui episcopi.
XIV.[recensere]
Ut nullus presbiter de alterius parrochia neofitum baptizare presumat, nisi ad mortem usque gravatus fuerit.
XV.[recensere]
Ut nullus presbiter vel quolibet gradu constitutus presumat de rebus propriis ecclesiæ aut oblationibus fidelium sive redditibus terre ad domos proprias et ab æcclesia alienare nisi per licentiam proprii episcopi. Et ut archiepiscopi de decimis in sarcitectis seu pauperibus atque scolasticis secundum auctoritatem canonicam partes mittant.
XVI.[recensere]
Ut nullus presbiter vel quolibet gradu consecratus, si fieri potest, presumat iumentum equitari.
XVII.[recensere]
Ut nullus clericus inter epulas cacinare, id est repercutere vel cantare presumat et scurrilis, id est iocularis verbisque turpibus, ubique appareat, nisi qualiter in concilio Cartaginensis continetur.
XVIII.[recensere]
Ut nullus clericus feria V cena domini chrismam per diocesim deportandam ab episcopo presumat recipere preter presbiterum et diaconem, sicut canones censeunt.