Cap. I.
[recensere]Ut secreta presbiteri non inchœnt, antequam «Sanctus» finiatur, sed cum populo cantent.
Cap. II.
[recensere]Ut nullus presbiter alterius parrœchianum, nisi in itinere fuerit vel placitum ibi habuerit, absque licentia sui presbiteri ad missam recipiat vel sollicitare presumat.
Cap. III.
[recensere]Ut sacramentum altaris, quod vere est corpus et sanguis domini, et credere et predicare debetis et, qua dignum est, religione tractetis.
Cap. IV.
[recensere]Ut infirmis eucharistiam non transmittatis nisi per presbiterum aut diaconum aut subdiaconum aut per aliquem sacris ordinibus mancipatum.
Cap. V.
[recensere]Ut per singulos menses simul convenientes de ministerio vestro, de custodia commissi vobis populi et de cura pastorali – quam sepius monemus – erga penitentes sollicite alius alium consulendo perquiratis et cum dei adiutorio corrigere studeatis, memor unusquisque, quia pro omnibus, quos regendos suscepit, aæterno iudici reddet rationem.
Cap. VI.
[recensere]Ut sacrum chrisma, quod est insigne christianæ salutis, diligentibus vasculis reconditum a nemine, nisi tantum a sacerdotibus, contractetur.
Cap. VII.
[recensere]Ut unctio olei infirmis iuxta apostoli fiat preceptum.
Cap. VIII.
[recensere]Similiter et morientibus commendationem animæ ecclesiastico more inpendat.
Cap. IX.
[recensere]Ut vestibus, quas in sacrificii tempore induistis, alio non utamini.
Cap. X.
[recensere]Ut palla altaris, quæ dicitur corporalis, non per alium quempiam aut per feminam, quod maxime horret, sed per diaconum aut subdiaconum abluatur.
Cap. XI.
[recensere]Ut sacros gradus unusquisque diligenter addiscat, quia deinceps a nobis nullus ad hos aliter promovebitur.
Cap. XII.
[recensere]Monemus atque interdicimus, ut nullus infra parrœchiam suam nisi ad ecclesiam iaceat aut tabernam causa manducandi vel bibendi ingrediatur, propriam facultatem nusquam, nisi ad ecclesiam, trahat.
Cap. XIII.
[recensere]Ut nullus presbiter, nisi in ecclesia ab episcopo consecrata, ullo modo missam presumat cælebrare.
Cap. XIV.
[recensere]Ut nullus presbiter infra sancta sanctorum, quæ vulgo absida cognominatur, introitum in ecclesiam habeat.
Cap. XV.
[recensere]Ut unusquisque presbiter ecclesia una, ubi ordinatus est, contentus sit et nullus in duabus ecclesiis ministrare presumat.
Cap. XVI.
[recensere]Ut supplantator alicuius sacerdotis per aliquod ingenium occulte vel manifeste non fiat.
Cap. XVII.
[recensere]Hæc, quia canones prohibent, qui perpetraverit, eorum se sciat sententia plecti.
Item ex Concilio Cartaginensi Capitulum XX.
[recensere]Ut unusquisque presbiter ecclesia una, ubi ordinatus est, contentus sit et nullus in duabus ecclesiis ministrare præsumat.
Item ex quo supra Cap. XXI.
[recensere]Ut supplantator alicuius sacerdotis per aliquod ingenium occulte vel manifeste non fiat. Et si presbiter per precium aut per pecuniam, quod est symoniaca heresis, ecclesiam fuerit alicuius adeptus, omnimodis deponatur.