Migne Patrologia Latina Tomus 61
MerHis.CaDeCh 61 Merobaudes Hispanus Parisiis J. P. Migne early modern edition, no apparatus this file was encoded in TEI xml for the University of Zurich's Corpus Corporum project (www.mlat.uzh.ch) by Ph. Roelli in 2013 Classical Latin orthography latin
Carmen de Christo
Carmen de Christo
(PL 61 0971)
Proles vera Dei cunctisque antiquior annis,
Nunc genitus qui semper eras, lucisque repertor,
Ante tuae matrisque parens, quem misit ab astris
Aequaevus genitor, Verbique in semina fusum
Virgineos habitare sinus, et corporis artus
Iussit inire vias, parvaque in sede morari:
Quem sedes non ulla capit, qui lumine primo
Vidisti, quidquid mundo nascente creares,
Ipse opifex, opus ipse tui dignatus iniquas
Aetatis sentire vices, et corporis huius
Dissimiles perferre modos, hominemque subire,
Ut posses monstrare Deum, ne lubricus error
Et decepta diu varii solertia mundi
Pectora tam multis sineret mortalia saeclis.
Auctorem scivere Deum te, conscia partus
Mater, et attoniti pecudum sensere timores. (0974A)
Te nova sollicito lustrantes sidere visu
In coelo videre prius, lumenque secuti
Invenere magi: tu noxia pectora solvis,
Elapsasque animas in corpora functa reducis,
Mundus et ad manes penetras, mortisque latebras
Immortalis adis: tibi tantum non fuit uni
Principium finisve mori, sed nocte refusa
In coelum ad Patrem scandis, rursusque perenni
Ordine purgatis adimis contagia terris.
Tu solus Patrisque comes, tu Spiritus insons,
Et toties unus, triplicique in lumine simplex.
Quis nisi pro cunctis aliud, quis credere possit,
Te potuisse mori, poteras qui reddere vitam?