Carmen de passione Domini

E Wikisource
 EPUB   MOBI   PDF   RTF   TXT
Carmen de passione Domini
Saeculo IV

editio: Migne 1844
fons: Corpus Corporum

Migne Patrologia Latina Tomus 7

AucInc.CaDePaD 7 Auctor incertus Parisiis J. P. Migne 1844 early modern edition, no apparatus this file was encoded in TEI xml for the University of Zurich's Corpus Corporum project (www.mlat.uzh.ch) by Ph. Roelli in 2013 Classical Latin orthography latin

Carmen de passione Domini

(PL 7 0283D) Quisquis ades, mediique subis in limina templi,
Siste parum, insontemque tuo pro crimine passum
Respice me; me conde animo, me in pectore serva.
Ille ego, qui casus hominum miseratus acerbos.
Huc veni pacis promissae interpres, et ampla 5
Communis culpae venia: hic clarissima ab alto
Reddita lux terris, hic alma salutis imago;
Hic tibi sum requies, via recta, redemptio vera,
Vexillumque Dei, signum et memorabile fati.
Te propter vitamque tuam sum Virginis alvum 10
(0284D) Ingressus, sum factus homo, atque horrentia passus
Funera; nec requiem terrarum in finibus usquam
Inveni, sed ubique minas, sed ubique labores.
Horrida prima mihi in terris mapalia Iudae
Hospitia in partu, sociaeque fuere parenti. 15
Hic mihi fusa dedit bruta inter inertia primum
Arida in angustis praesepibus herba cubile.
In Phariis primos vixi regionibus annos,
Herodis regno profugus; reliquosque reversus
Iudaeam, semper ieiunia, semper et ipsam 20
(0285A) Pauperiem extremam, et rerum inferiora secutus,
Semper agens monitis humana salubribus almae
Ingenia ad studium probitatis, aperta salubri
Plurima doctrinae iniungens miracula; quare
Impia Hierusalem rabidis exercita curis 25
Invidiae, saevisque odiis et caeca furore,
Insonti est poenis lethalibus ausa cruentam
In cruce terribili mortem mihi quaerere. Quae si
Latius ipse velim distinguere, sique per omnes
Ire iuvet gemitus, mecum et sentire dolores; 30
Collige consilia insidiasque meique nefandum
Sanguinis innocui pretium, et simulata clientis
Oscula, et insultus, et saevae iurgia turbae.
Verbera praeterea, et promptas ad crimina linguas
Fige animo, et testes, et caeci infanda Pilati 35
(0285B) Iudicia, ingentemque humeros et fessa prementem
Terga crucem atque graves horrenda ad funera gressus.
Nunc me, nunc vero desertum, extrema secutum
Supplicia, et dulci procul a genitrice levatum,
Vertice ad usque pedes me lustra: en aspice crines 40
Sanguine concretos, et sanguinolenta sub ipsis
Colla comis, spinisque caput crudelibus haustum,
Undique diva pluens vivum super ora cruorem.
Compressos speculare oculos, et luce carentes,
Afflictasque genas, arentem suspice linguam 45
Felle venenatam, et pallentes funere vultus.
Cerne manus clavis fixas, tractosque lacertos,
Atque ingens lateri vulnus: cerne inde fluorem
Sanguineum, fossosque pedes, artusque cruentos.
(0285C) Flecte genu, lignumque crucis venerabile adora 50
(0286A) Flebilis; innocuo terramque cruore madentem
Ore petens humili, lacrymis suffunde subortis,
Et me nonnunquam devoto in corde, meosque
Fer monitus. (0285C) Sectare meae vestigia vitae;
Ipsaque supplicia inspiciens, mortemque severam, 55
Corporis, innumeros memorans animique dolores,
Disce adversa pati et propriae invigilare saluti.
Haec monimenta tibi, si quando in mente iuvabit
Volvere, si qua fides animo tibi ferre meorum,
Debita si pietas, et gratia digna laborum 60
Surget, erunt verae stimuli virtutis, eruntque
Hostis in insidias clypei, quibus acer in omni
Tutus eris, victorque feres certamine palmam.
Haec monimenta tuos si labilis orbis amicos
Avertent sensus, fugiente decoris ab umbra 65
(0286B) Mundani, efficient, ne spe captatus inani,
Mobilis occiduis fortunae fidere rebus
Auseris, aut vitae sperare fugacibus annis.
Sed et nimirum sic ista caduca videntem
Secura, et exutum patriae melioris amore, 70
Orbis opes, rerumque usus, et vota piorum
Moribus extollent sacris, vitaeque beatae
Spe, duras inter poenas, te rore fovebunt
Coelesti, pactique boni dulcedine pascent.
Purpuream donec, post ultima fata relicto 75
Corpore, sublimes animam revocabit ad auras
Gratia magna tibi. Tunc omnem exuta laborem,
Angelicos tunc laeta choros aciesque beatas
Sanctorum inspiciens, aeternae pacis amoena
(0286C) Perpetuo felix mecum regnabit in aula. 80