Migne Patrologia Latina Tomus 106
Carmen lugubre de obitu Caroli Magni (Columbanus Trudonis), J. P. Migne 106.1259A
Carmen lugubre de obitu Caroli Magni
106.1257C| A solis ortu usque ad occidua
Littora maris planctus pulsat pectora,
Heu mihi misero!
Ultra Marina agmina tristitia,
Tetigit ingens cum moerore nimio.
Heu mihi misero!
Franci, Romani atque cuncti creduli,
Luctu punguntur et magna molestia.
Heu mihi misero!
Infantes, senes, gloriosi praesules,
Matronae plangunt detrimentum Caesaris.
Heu mihi misero
Jam jam non cessant lacrymarum flumina.
Nam plangit orbis interitum Caroli.
Heu mihi misero!
106.1257D| Pater communis orphanorum omnium,
Peregrinorum, viduarum, virginum.
Heu mihi misero!
106.1258C| Imperatorem jam serenum Carolum,
Telluris tegit titulatus tumulus.
Heu mihi misero!
Christe, coelorum qui gubernas agmina,
Tuo in regno da requiem Carolo.
Heu mihi misero!
Hoc poscunt omnes fideles et creduli,
Hoc sancti senes, viduae et virgines.
Heu mihi misero!
Spiritus sanctus, qui gubernat omnia,
Animam suam exaltet in requiem.
Heu mihi misero!
Vae tibi, Roma, Romanoque populo,
Amisso summo glorioso Carolo.
Heu mihi misero!
106.1258D| Vae tibi, sola formosa Italia
Cunctisque tuis tam honestis urbibus.
Heu mihi misero!
106.1259A| Francia diram perpessa injuriam,
Nullum jam talem dolorem sustinuit.
Heu mihi misero!
Quando Augustum facundumque Carolum,
In Aquisgrani glebis terrae tradidit.
Heu mihi misero!
Nox mihi dira jam retulit somnia,
Diesque clara non adduxit lumina.
Heu mihi misero!
Quae cuncti orbis Christiani populi,
Vexit ad mortem venerandum principem.
Heu mihi misero!
106.1260A| O Columbane, stringe tuas lacrymas,
Preces effunde pro illo ad Dominum.
Heu mihi misero!
Pater cunctorum misericors Dominus,
Ut illi donet locum splendidissimum.
Heu mihi misero!
O Deus cuncte humanae militiae,
Oque coelorum, infernorum Domine.
Heu mihi misero!
In sancta sede cum tuis apostolis,
Suscipe pium, o tu Christe, Carolum.
Heu mihi misero!
(no apparatus)