 Carmen 109 |
Carmen 111  |
Aufilena, bonae semper laudantur amicae:
Accipiunt pretium quod facere instituunt.
Tu, quod promisti mihi, quod mentita, inimica es;
Quod nec das et fers saepe, facis facinus.
Aut facere ingenuae est, aut non promisse pudicae,
Aufilena, fuit: sed data corripere
Fraudando †efficit plus quam meretricis auarae est,
Quae sese toto corpore prostituit.
| Carmen 109 |
Carmen 111 |