Carmina (Horatius)/Liber III/Carmen XXIII

E Wikisource
Jump to navigation Jump to search
Liber III
Carmen XXIII
23 a.Ch.n.
Fairytale left blue.png III, XXII III, XXIV Fairytale right blue.png


Caelo supinas si tuleris manus
nascente luna, rustica Phidyle,
si ture placaris et horna
fruge Laris avidaque porca:

nec pestilentem sentiet Africum
fecunda vitis nec sterilem seges
robiginem aut dulces alumni
pomifero grave tempus anno.

nam quae nivali pascitur Algido
devota quercus inter et ilices
aut crescit Albanis in herbis
victima, pontificum securis

cervice tinguet: te nihil attinet
temptare multa caede bidentium
parvos coronantem marino
rore deos fragilique myrto.

inmunis aram si tetigit manus,
non sumptuosa blandior hostia,
mollivit aversos Penatis
farre pio et saliente mica.

Fairytale left blue.png III, XXII III, XXIV Fairytale right blue.png