Migne Patrologia Latina Tomus 80
AutCam.ChDeMoW 80 Autbertus Cameracensisfl. 640 Parisiis J. P. Migne 1850 early modern edition, no apparatus this file was encoded in TEI xml for the University of Zurich's Corpus Corporum project (www.mlat.uzh.ch) by Ph. Roelli in 2013 Classical Latin orthography latin
Charta de monasterio Wallarensi
Autbertus, Dei gratia Cameracencis episcopus, universis Christi fidelibus salutem aeternam. Ad nostram curam et sollicitudinem pertinere non dubitamus, ut quod Ecclesiae sanctae fideles Christi pia largitione conferunt et dedicant, episcopali debeamus auctoritate consecrare et confirmare. Inde est quod praedium dictum Wallare, piissimi regis nostri Dagoberti, cum omnibus appendiciis suis, quod idem rex servo Dei Landelino Mauroso donavit in eleemosynam, pro anima patris sui Lotharii inclyti regis, ad construendum ibidem monasterium, in nostra suscepimus tutela et defensione, cum omnibus villis, terris, silvis, pratis, agris, aquis aquarumque decursibus ibidem assignatis, in nostra dioecesi constitutis; decimas omnes earumdem possessionum praedicto Landelino, et suis, Deo donante, successoribus in perpetuum concedentes, et potestatem eidem et cgratiam indulgentes construendi monasterium, et ecclesiam fabricandi, et personas instituendi, quae secundum quod Angelus testamenti sibi donarit, de facultatibus assignatis poterunt sustentari. Qualemcumque fecerit ibidem ordinationem, ipsam ratam habemus et inconvulsam, inhibentes auctoritate nostra, ne super omnibus illis possessionibus quas supradictus rex loco memorato Wallari donavit, ibidem Deo militantibus molestiam aliquis inferat aut gravamen. Quod si qua saecularis ecclesiasticave persona contra hoc venire praesumpserit et easdem possessiones occupaverit, ipsam anathematis aeterni gladio ferimus, nisi resipiscat et occupata curaverit restaurare. Ut autem ista praefata regis illustris eleemosyna duret in perpetuum et ecclesiastica libertate potiatur, paginae praesenti sigillum nostrum fecimus apponi. Actum Castriloco, anno dominicae Incarnationis DCXLII a, indictione XV, regni domini Dagoberti inclyti regis tertio decimo, Sigiberti filii ejusdem regis quarto.
Decesserat e vivis Dagobertus anno 638. Annus regni ejus 13 inceperat initio veris anni 634.