Cum in urbe Ualentina iuxta imperium gloriosissimi domini Guntramni regis nostra mediocritas pro diversis pauperum querimoniis convenisset, id primo authore Deo decrevimus sanciendum, quod pro salute regis et animæ suæ salvatione vel religionis statu censuimus oportunum. Id est ut, quia prædictus rex per virum illustrem Asclipiodetum referendarium datis ad sanctam synodum epistolis suis iniunxit, ut, quodcunque tam ipse quam bonæ memoriæ iugalis sua Austrechildis regina vel filiæ eorum Deo sacratæ puellæ, id est bonæ memoriæ Clodeberga vel Clodehildis, locis sanctis contulissent aut adhuc conferre decreverint, authoritate apostolica deberet sancta synodus præsenti titulo manuum suarum subscriptione firmare; et quia tam laudabili devotioni non solum sacerdotalem, sed etiam divinam credimus posse conniventiam conspirare, idcirco præsenti constitutione unanimi consensu Deo medio synodus sancta decrevit, ut, si quid basilicæ sancti Marcelli vel sancti Symphoriani vel quibuscunque locis vel servientibus Deo per quascunque authoritates aut scripturarum epistolas præfatus dominus rex vel supra nuncupata iugalis sua filiæque eorum sive in ministerio altariorum sive in quibuscunque speciebus, quæ ad divinum cultum pertinere noscuntur, contulisse vel adhuc conferre voluerint, neque episcopi locorum neque potestas regia quocunque tempore successura de eorum voluntate quicquam minorare aut auferre præsumat. Quod si quis hoc quocunque tempore temerare aut auferre præsumpserit, veluti necator pauperum anathemate perpetuo iudicii divini plectatur et veluti sacrilegii perpetrator criminis sui reus supplicii æterni teneatur obnoxius.
Subscriptiones episcoporum:[recensere]
- Sapaudus in Christi nomine episcopus ecclesiæ Arelatensis subscripsi,
- Priscus in Christi nomine episcopus ecclesiæ Lugdunensis subscripsi,
- Euantius in Christi nomine episcopus ecclesiæ Uiennensis subscripsi,
- Isitius in Christi nomine episcopus ecclesiæ Gratianopolitanæ subscripsi,
- Ragnoaldus in Christi nomine episcopus ecclesiæ Ualentinæ subscripsi,
- Trapidius in Christi nomine episcopus ecclesiæ Aurasicæ subscripsi,
- Eusebius in Christi nomine episcopus ecclesiæ Matascensis subscripsi,
- Flauius in Christi nomine episcopus ecclesiæ Cabilonensis subscripsi,
- Pappus in Christi nomine episcopus ecclesiæ Aptensis subscripsi,
- Urbicus in Christi nomine episcopus ecclesiæ Rhegiensis subscripsi,
- Aridius in Christi nomine episcopus ecclesiæ Uapincensis subscripsi,
- Arthemius in Christi nomine episcopus ecclesiæ Uasensis subscripsi,
- Martianus in Christi nomine episcopus ecclesiæ Tarantasiensis subscripsi,
- Pologronius in Christi nomine episcopus ecclesiæ Sigestericæ subscripsi,
- Eusebius in Christi nomine episcopus ecclesiæ Tricassinæ subscripsi,
- Cariatto in Christi nomine episcopus ecclesiæ Genauensis subscripsi,
- Bœthius in Christi nomine episcopus ecclesiæ Carpentoractensis subscripsi.