De amore coniugali/2.6

E Wikisource

 2.5 2.7 

 
VI.
Rusticum alloquitur
 

Rustice, neglecti cultor male fortis agelli,
qui subigis pigro rura paterna bove,
dumosoque sinis obduci limite campum,
duraque non certo subruis arva die,
5
fallacisque tibi Cereris, fallacis et uvae
fructus, et ingrati poma minuta soli,
non seges haec, non cura levis, non lenta colendi
desidia, offensi sed facit ira dei;
cujus numen aquae violas, dum saepe lutosam
10
a stabulis vitreo perluis amne suem,
annua nec veteri reddis sua vota sacello,
sed caedis sacra religione nemus.
Ira deos tangit. Caelestem vince furorem
thure pio, et multam sedulus adde precem;
15
agna cadat Fauno, pinguisque ex ubere matris
imbuat offensas candidus haedus aquas;
placabisque deum, sacrae qui praesidet undae,
viscera de niveo tosta ferens vitulo.