Migne Patrologia Latina Tomus 89
De basilica aedificata a Bugge
Hoc templum Bugge pulchro molimine structum
Nobilis erexit Centwini filia regis,
Qui prius imperium Saxonum rite regebat,
Donec, praesentis contemnens culmina regni,
Divitias mundi rerumque reliquit habenas,
Plurima basilicis impendens rura novellis,
Qua nunc Christicolae servant monastica jura.
Exin sacratam perrexit quaerere vitam,
Dum proprium linquit Christi pro nomine regnum;
Qui tamen ante tribus gessit certamina pugnis,
Et ternis pariter confecit bella triumphis.
Sic rexit regnum plures feliciter annos,
(0289C)Donec conversus cellam migravit in almam,
Inde petit superas meritis splendentibus arces
Angelicis turmis ad coeli culmina ductus,
Coelicolis junctus laetatur sorte superna.
Post hunc successit bello famosus et armis
Rex Cadwalla potens regni possessor et haeres.
Sed mox imperium mundi sceptrumque relinquens,
Turgida cum ratibus sulcabat caerula curvis,
Et maris aequoreos lustrabat regmine campos.
Algida ventosis crepitabant carbasa flabris,
Donec barca rudi pulsabat littora rostro.
Exin nimbosas transcendit passibus Alpes
Aggeribus niveis et montis vertice septas.
Cujus in adventu gaudet clementia Romae,
Et simul ecclesiae laetatur clerus in urbe,
(0289D)Dum mergi meruit baptismi gurgite felix.
Post albas igitur morbo correptus egrescit,
Donec mortalis clausit spiracula vitae,
Alta supernorum conquirens regna polorum,
Clarum stelligeri conscendens culmen Olympi.
Sed his principibus coelum penetrantibus altum,
Quorum descripsi jam bina vocabula dudum,
Tertius accepit sceptrum regnator opimum,
Quem clamant Ini certo cognomine gentes,
Qui nunc imperium Saxonum jure gubernat.
Quo regnante novum praecelsa mole sacellum
Bugge construxit supplex vernacula Christi,
Qua fulgent arae bis seno nomine sacrae
Insuper apsidam consecrat Virginis arae,
(0290A)Praesentem ergo diem cuncti celebremus ovantes,
Et reciproca Deo modulemur carmina Christo.
Menstrua volvuntur alternis tempora festis,
(0290B)Et vicibus certis annorum lustra rotabunt.
Dulcibus antiphonae pulsent accentibus aures,
Classibus et geminis psalmorum concrepet oda,
Hymnistae crebro vox articulata resultet,
Et celsum quatiat clamoso carmine culmen.
Fratres concordi laudemus voce Tonantem,
Cantibus et crebris conclamet turba sororum.
Hymnos ac psalmos et responsoria festis
Congrua promamus subter testudine templi,
Psalterii melos fantes modulamine crebro,
Atque decem fidibus nitamur tendere lyram,
Ut Psalmista monet bis quinis psallere fibris.
Unusquisque novum comat cum voce sacellum,
Et lector lectrixve volumina sacra resolvat.
(0290C)Istam nempe diem, qua templi festa coruscant.
Nativitate sua sacravit virgo Maria,
Quam jugiter renovant Augusti tempora mensis [ Deest in Edd. ],
Dividitur medio dum torrens sextilis orbe,
Qui nobis iterum restaurat gaudia mentis,
Dum vicibus redeunt solemnia festa Mariae,
Et veneranda piis flagrant altaria donis.
Haec domus interius resplendet luce serena,
Quam sol per vitreas illustrat forte fenestras,
Limpida quadrato diffundens lumina templo.
Plurima basilicae sunt ornamenta recentis,
Aurea contortis flavescunt pallia filis,
Quae sunt altaris sacri velamina pulchra.
Aureus atque calix gemmis fulgescit opertus,
(0290D)Ut coelum rutilat stellis ardentibus aptum,
Sic lata argento constat fabricata patena,
Quae divina gerunt nostrae medicamina vitae,
Corpore nam Christi sacroque cruore nutrimur.
Hic crucis ex auro splendescit lamina fulvo,
Argentique simul gemmis ornata metalla.
Hic quoque thuribulum capitellis undique cinctum,
Pendet de summo, fumosa foramina pandens.
De quibus ambrosiam spirabunt thura Sabaea
Quando sacerdotes missas offerre jubentur.
Nunc clara ingenito dicatur gloria Patri,
Nec minus et genito promatur gloria Nato
Spiritus atque sacer consorti laude fruatur.