Dinosaurorum species (scientes
inquiunt) olim fuerant per orbem:
rupibus ruptis fodiunt uatillis
stemma stupendum.
Mors quidem talis fuit ossearum
belluarum qualis ad usque nostrum
saeculum semper miserenda nobis
et metuenda.
Finge – te Regis manibus Tyranni
(sportulae causa) subito prehenso –
te lacertosum facies tueri
sanguinolentas
et lacertarum, minimis lacertis
dentibus magnis, hilareque ridet
te, renidens atque boans, minutum
Terribilis Rex.
Ne queraris, ne doleas opertum
funus idcirco gregis opstupendae:
forte si saevae nihilo sepultae
te sepelissent!
