Migne Patrologia Latina Tomus 131
Diploma
Diploma (Christophorus antipapa), J. P. Migne 131.0047A
Diploma
131.0045C| CHRISTOPHORUS episcopus, servus servorum Dei, universis episcopis Galliarum.
Cum Romanae sedis pontificem constet omnium Ecclesiarum Christi caput fore, ac si beati Petri apostolorum principis vices agentem, cui Christus ait: Tu es Petrus, et super hanc petram aedificabo Ecclesiam meam, et tibi dabo claves regni coelorum, nulli cunctandum est quod cunctae Ecclesiae paci, saluti et quieti prospicere nos oporteat, praecipue tamen his qui ad nos necessitatis suae causas deferre voluerint. Unde cognoscat omnium sanctorum Galliae praesulum charissima fraternitas quod vir venerabilis Franco abbas ex monasterio Corbeiae provinciae Galliarum, quod est constructum in pago 131.0046C| Ambianensi super fluvium Sommam, adiit nos per venerabilem coepiscopum nostrum Orgarium, petens ut nostrae auctoritatis privilegio praecepta vel edicta regum et imperatorum antiquis aut modernis temporibus eidem loco concessa firmaremus, necnon privilegia episcoporum, unum a praesule Ambianensi Bertefrido, ad cujus dioecesim locus ipse pertinet, et coepiscopis suis factum, et primitus aedificato suo monasterio datum; aliud longe postea regnante Carolo, ab Hincmaro Rhemensi archiepiscopo et universali concilio episcoporum Galliae conscriptum; praeterea privilegia beatae memoriae Benedicti et Nicolai praedecessorum nostrorum, in quibus omnibus statutum est ut praefatum monasterium Corbeiae 131.0047A| rerum suarum liberam obtineat dominationem, et eligendi sibi abbatem de suis semper habeat potestatem, contradictores vero et repugnantes huic sanctioni anathemate damnandos. Qua de re noverit omnis coetus episcoporum Galliae quod privilegia sanctorum episcoporum Galliae, sive sedis Romanae, cui auctore Deo praesidemus, jam dicto monasterio Corbeiae concessa, nostrae auctoritatis edicto roboramus, et omnem resistentem divino judicio damnandum denuntiamus. Super haec autem jam dictus abbas Franco cum congregatione sibi commissa obsecrat, ut quia, divina decernente justitia, piratarum saevitia, maritima Galliae loca, in quibus et ipsum monasterium situm est, adeo devastantur, ut nulli extra munitiones manenti liber relinquatur locus, 131.0047B| cujus etiam vastitatis impulsu cogente, saepe memoratum monasterium muro munitum est; quatenus idem, sicut prius, in abbatis et fratrum potestate perpetuo maneat, ita ut neque comes, nec quilibet judex, aut manendi, aut aliquid contra voluntatem 131.0048A| abbatis et fratrum inibi agendi potestatem praesumere audeat, ne forte concessa ab initio privilegia violentur. Quorum petitionem justam et pro tempore opportunam judicantes, decernimus, ne aliqua sive ecclesiastica, sive saecularis persona contra roborata nostra auctoritate privilegia venire audeat; sed sicut hactenus, ita deinceps in futurum inconvulsa permaneant. Et quia praeteritorum casus nos cautos faciunt in futurum, omnem huic sanctae auctoritati renitentem, nisi eis, quos laesit, digne satisfecerit, alienum a coetu fidelium et hic et in futuro decernimus; omnes vero his nostris sancti scilicet Petri successoris decretis faventes, gratiae suae ubertate Dominus replere dignetur.
Scriptum per manum Sergii scriniarii sanctae Romanae 131.0048B| Ecclesiae in mense Decembri, indictione XI, septimo Kal. Januarii, imperante domno nostro piissimo augusto Ludovico a Deo coronato imperatore sanctissimo. Valete.