Migne Patrologia Latina Tomus 45
ProAqu.EpInObA 45 Prosper Aquitanus390-463 Parisiis J. P. Migne 1841 early modern edition, no apparatus this file was encoded in TEI xml for the University of Zurich's Corpus Corporum project (www.mlat.uzh.ch) by Ph. Roelli in 2013 Classical Latin orthography latin
Epigramma in obtrectatorem Augustini
Contra Augustinum narratur serpere quidam Scriptor, quem dudum livor adussit edax: Qui caput obscuris contectum utcumque cavernis, Tollere humo miserum perpulit anguiculum. Aut hunc fruge sua aequorei pavere Britanni, Aut huic Campano gramine corda tument. Quae concepta fovet, promat; quae parturit, edat: Seu vetere armatur dogmate, sive novo. In quoscumque sinus spirarum torqueat orbes, Et fallax multa contegat arte caput; Currentem attritos super aspidas et basiliscos Declinare senem vipera non poterit. IN EUMDEM, AUT ALIUM QUEMPIAM OBTRECTATOREM. Quidam doctiloqui libros senis Augustini Carpere, et adversum condere fertur opus. Usqueadeone bonum ingenium, et facundia dives Ostentare artem non aliter potuit, In nova prostratas acies nisi bella cieret, Impiaque exstinctis hostibus arma daret? Haec pugna, incentor, mors est tua; te stilus iste Conficit, et verbis perderis ipse tuis. Dumque doces quantum valeat mens libera, monstras Velle tuum tibimet sufficere ut pereas. Verte gradum, fuge perniciem, stratosque rebelles Oris apostolici fulmine ubique vide. Nec te mutato defendi nomine credas: Si pastorem ovium laedere vis, lupus es.