Migne Patrologia Latina Tomus 19
Epistola ad Porphyrium
INVICTUS CONSTANTINUS AUGUSTUS MAXIMUS.
(PL 19 0393A) Si tantum pondus et gravitas spectarentur in carmine, et Graeca post Chium Maeoniumve vatem, et Latina post rusticum Mantuanum eloquentia siluisset, nec frustra culpabiles forent, qui sibi materias pro ingeniorum qualitate sumentes, inani opere sudassent, cum penes primos facundiae conditores gloria tota resideret, frater charissime. (0393B) Sed quoniam semper in propatulo usus istius fuit, nec ulli negatum est, id ex ea indicere, quod possit illos etiam quos posterius aevum tulit delectare, non penitus a fructu favoris excludit, qui relictis gravioribus sonis, modos ad leviora flexere: Illigavit alter cothurnis et prope quotidianis ac moralibus verbis affectus hominum, comoediis locutus est quidam, inaequali pede elegia cantata est, multorum digitos semiloquacibus chordis amor lyrae iucundus inservit pro aequalitate modulaminis. At non circa singulos quosque expetitae laudis gratia redundavit. Defuit quorumdam ingeniis imperatorum favor, qui non secus doctrinae deditas mentes irrigare atque alere consuevit, quasi clivosi tramitis supercilio rivus elicitus, scaturientibus venis arva arentia temperavit. Saeculo meo scribentes dicentesque non aliter benignus auditus, quam lenis aura prosequitur. (0394A) Denique etiam studiis meritum a me testimonium non negatur. Liber assidue cursus oratoribus fuit; eos vero qui versibus dicerent, certis finibus lex metris statuta continuit: quare non immerito illud usus invenit, ut hoc genere dicturis, Heliconis aut Parnassi iuga peterentur, cum mortalis ingenii deficiente substantia, necessaria viderentur auxilia divina. Gratum mihi est studiorum tuorum facilitatem in illud exisse, ut in pangendis versibus dum antiqua servaret, etiam nova lyra sibi conderet. (0394B) Vix hoc custoditum pluribus fuit, qui modis quibusdam arctis innexi litterarum, distinctionibus versuum (qui ita medium corpus propositi occulte intermeant, ut oculorum sensus interstincta colorum pigmenta delectent) hoc tenuere propositum, ut haesitantiam carmini multiplex legis observantia non repararet. Gratum igitur hoc mihi dicationis tuae munus fuit: Exercitatio mentis et naturae facilitas comprobata est. Tu cum tibi videas operis tui gratiam, quam ex meis petiveras auribus non perisse, et proventu praesentis temporis exsultare debebis, et non indebitam laudem ingenii exercitatione captare.