Migne Patrologia Latina Tomus 139a
Epistola encyclica de caede Abbonis
139.0417C| Universis abbatibus Christique fidelibus quoquo locorum habitantibus, Floriacensis conciola dejecta et Patre viduata.
¶
Fletu pene absorptis, dolore contritis, manum porrigite spiritalis auxilii, Patres sanctissimi, per affectum fraternae charitatis. Pane moeroris potuque amaritudinis cibati, vestris orationibus mereamur recreari, quorum cithara laetitiae versa est in luctum moestitiae, quorum organum luctuose sonat lamentum, et jucunditas vocem tantummodo flentium. Pervenit gladius doloris usque ad animam, dum deploramus pro sanctae religionis studio domnum et 139.0418C| abbatem nostrum Abbonem excessisse a saeculo coronatum martyrio, qui Wasconum gladiis felix promeruit feliciter beatorum martyrum socius fieri; cujus animae contagia vestra oratio abstergat, qui vestri amator omniumque Christi servientium verus semper exstitit dilector. Nobis quoque, quos orphanos reliquit, fraternis succurrite votis, et Deum omnipotentem placate orationum hostiis, ut dignetur sua gratia gregem decapitatum et pio Patre orbatum consolari. Obiit Idibus Novembris, die natali sancti Bricii.