Faciendum nobis esse, quod ab aliis fieri debere iactamus

E Wikisource
Jump to navigation Jump to search
EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
Faciendum nobis esse, quod ab aliis fieri debere iactamus
Saeculo XVIII
editio: incognita
fons: incognitus

Cur, quae debita poscimus

Praestari, facimus non aliis prius?

Humano generi data

Toti, nos propriis vivere moribus

Solos, nos libitum sequi

Sublatis voluit Norma repagulis?

Soli nos domini sumus

Exleges penitus? tollite, si pudor,

Cives, si modo manserit

In vestris aliquid pectoribus salis,

Morem tollite barbarum,

Soli principio forte Lycaoni,

Solis ante Cyclopibus,

Et dirae placitum, si placuit, Stygi:

Nunc pro crimine vix gravi

Censeri solitum, lumen Iniquitas

Obscurare nefaria

Summis quando viris caepit & infimis:

Nunc, nunc vix satis agnitum,

Si sensus hebetes Insipientia,

Si brutis similes Stupor,

Et coecos faciat coecos Amor sui.

An, quae scita gravissimae

Thurinis tabulae, quaeque Locrensibus

Censores dederant, pari

Censura dederant non eadem sibi?