Migne Patrologia Latina Tomus 124
Institutio
Institutio (Odo Bellovacensis), J. P. Migne 124.1128B
Institutio
124.1127B| ODO gratia Domini nostri Jesu Christi Bellovacensis Ecclesiae praesul.
Notum sit omnibus sanctae Dei Ecclesiae fidelibus, maximeque successoribus nostris, quoniam unanimis congregatio parique voto, scilicet canonici S. Petri jam fatae Ecclesiae, cui Deo auctore deservio, expetiit nostram obnixe liberalitatem quatenus res sibi a nostris praedecessoribus juxta confinia singularum concessas, pariterque nostra sibi solidatione firmatas, canonice, juxta aliarum morem Ecclesiarum, dono liberalitatis, regisque praecepto, absque ullius contradictione quietis, concessa disponerem. Enimvero videns excedere hujusmodi negotium meae solummodo diffinitionis vires, pariterque gratia superni consilii praeeunte providens jam dictae congregationi 124.1127C| sibi profutura quaerere, et illis super hoc assensum praebendo, timens ne ovilia dominici gregis, quod absit, tyrannica irrumperentur aliquando infestatione, expetii consilium tam metropolitanae Rhemorum provinciae Hincmari, quam caeterorum venerabilium videlicet archiepiscoporum, seu coepiscoporum meorum, ut quorum sanctione ecclesiastica pertractantur negotia, eorum taxatio, inspirante gratia superni numinis, mihi nostraeque Ecclesiae utile afferret ac salubre proventum. Quorumque consultu adii piissimi Caroli regis serenitatem, ut solita misericordia sua, sicut omnibus ubique supernae majestati famulantibus, ita huic Ecclesiae mihi, nullis praecedentibus meritis, ad regendum commissae profutura quiete praevideret, cum praeceptione 124.1127D| solidae firmitatis. Ille vero, gratuita sua clementia precibus nostris pium praebens assensum, decrevit ordinatissima sua auctoritate stabile fore quod nostra etiam praevidit benevolentia. Unde necessitatibus jam dictae nostrae congregationis destinamus canonica institutione villulas infra scriptas in pago Bellovacense, cum omnibus adjacentiis ad se pertinentibus, necnon et cum omnibus habitatoribus ad se legitime pertinentibus. Hoc est, Burcinas, Pretiosas, Velena, Haverciaco, Frotmaro-Curte, Hilgia, Cambariaco. In Ballicino valle de vinea Bunnar. IV et arpennum I. In suburbio nostrae civitatis molendina 124.1128B| duo et cambas II, et hortos cultos II, et curticulos X, pratum unum. Precariam ubi sunt mansi XXIV, S. quam Sigebertus tenet cum censu. Obsecrantes ut nullus successorum nostrorum, quod Deo auctore a nobis constitutum est, exinde aliquid minuendo subtrahat, nec suis propriis suorumque usibus aliquid impertiatur. Sed haec quae divino amore et animarum salute patravimus, inconcussa observent, aequalem et unam nobiscum a Domino mercedem sperantes. Numerus vero canonicorum inibi degentium volumus, atque expresse consolidari nitimur, nisi res addantur, unde facultas subministretur, non transcendat quantitatem quinquagenarii numeri. Verum et cum quilibet divina vocatione decesserit, alius subrogetur, ne praefatus numerus 124.1128C| minuatur. Et ut etiam nostrae devotionis auctoritas firmiorem obtineat vigorem, non solum praecepto magni et piissimi Caroli regis, verum etiam dominorum Patrum venerabiliumque coepiscoporum meorum, quorum consensu ista peregimus, canonica auctoritate roborare obnixe decrevimus.
Hincmarus sanctae metropolis Ecclesiae Rhemorum archiepiscopus subscripsi.
Ansegisus Senonum archiepiscopus subsc.
Wenilo Rothomagensium archiepiscopus subscripsi.
Rothadus Suessonicae Ecclesiae episc. subscr.
Immo Noviomagensis Ecclesiae episc. subscr.
Lupus Catalaunicae civitatis episcopus subscr.
Folcoinus civitatis Morinensis episc. subscr.
124.1128D|
Theodericus Ecclesiae Cameracensis episcopus subscripsi.
Ragenarius Ecclesiae Ambianensis episcopus subscripsi.
Erpoinus Silvanectensis Ecclesiae episcopus subscripsi.
Datum in ipsis Kalendis Martiis in civitate Suessionis, ante altare sanctorum martyrum Gervasii et Protasii, anno XXXV regni domni Caroli regis gloriosi, qui hoc privilegium sua pietate consensit, et regia auctoritate roboravit, indictione VIII ( anno Christi 875).