Migne Patrologia Latina Tomus 138
Leges ecclesiasticae concilii Grateleani (Aethelstanus), J. P. Migne
cc_id: cps_2.Aethel.LeEcCoG, cc_idno: 9577
c
TITULI CAPITULORUM.
138.0461C|
I. De decimis reddendis, paupere alendo, et eleemosyna e regiis praediis annuatim eroganda (LL. Sax. in prooemio. Jorn. cap. 1).
II. De irruptione in ecclesiam (LL. Sax. cap. 5. Jorn. cap. 10).
III. De sagis (LL. Sax. cap. 6. Jorn. cap. 11.).
IV. De monetariis (LL. Sax. cap. 14. Jorn. cap. 20).
V. De ordalio se sistere spondentibus (LL. Sax. cap. 23. Jorn. cap. 30).
VI. De rerum emptione in die Dominica (LL. Sax. cap. 24. Jorn. cap. 32).
VII. De pejerantibus (LL. Sax. cap. 25. Jorn. cap. 34).
VIII. De has leges non exsequentibus (LL. Sax. cap. 26. Jorn. cap. 34).
138.0461D|
IX. De legum latoribus, et loco (LL. Sax. cap. ult. Jorn. cap. 35).
AETHELSTANI REGIS CONSTITUTIO.
Ego Aethelstanus rex, ex consilio Wulfhelmi archiepiscopi mei, et aliorum episcoporum meorum, praecipio omnibus meis praefectis per totum meum 138.0462C| regnum in Domini et omnium sanctorum nomine, et per amorem meum, ut illi prius meae propriae possessionis decimas solvant, tam viventis animalis quam annui fructus; et ut idem quoque faciant de suo proprio episcopi, et senatores etiam mei et praefecti. Et volo ut episcopi mei et praefecti hoc judicent, omnibus, qui illis obedire debent, et ut quilibet ad eumdem terminum perficiat, quod hic ordinamus; et hoc sit ad diem decollationis S. Joannis Baptistae.
Agedum recordemur, quod Jacobus patriarcha Domino dixit: Ego tibi reddam decimas meas, et hostiam meam pacificam: et Dominus ipse in Evangelio dixit: Omnibus habentibus dabitur, et illi abundabunt. Cogitare debemus etiam ejus, quod terribiliter 138.0462D| in his libris scriptum est: Si nos decimas nostras reddere nolumus, nobis novem partes subtrahantur, et decima una nobis superstes sit. Doctrina evangelica nos admonet ut res coelestes terrestribus et aeternas temporaneis promereamus. Nunc auditis, quod Dominus nobis praecipit, et quid nos perficere 138.0463A| oportet: Facite, ut ea libenter concedatis, quae mihi legitime largiri potestis. Ego nolo, ut aliquid mihi cum errore largiamini. Si ego vobis omnia vestra concedo, eo consilio [facio] ut mea mihi libenter concedatis; cavete vobis, et iis, qui vos attinent, ab ira Dei et mea.
Ego Aethelstanus rex omnibus praefectis in regno meo notum facio ex consilio Wulfhelmi archiepiscopi mei, et omnium meorum aliorum episcoporum, et Dei ministrorum pro remissione peccatorum meorum quod velim ut nutriatis omnibus modis unum pauperem Anglum, si quem habeatis vel alicubi inveneritis. De duabus meis villis detur ei quovis mense una amphora farinae, et una perna porci, vel unus aries, qui valeat IV denariis, et vestitus pro duodecim 138.0463B| mensibus, quolibet anno. Et ut redimatis unum libertate multatum servum, et hoc omne factum sit ex Dei misericordia et amore mei, sub episcopi testimonio in cujus dominio sit illud. Et si praefectus hoc praetermittat, compenset XXX solidis, et pecunia dividatur egenis qui in ea urbe sunt, ubi haec omissio fit, sub testimonio episcopi.
II. De fractura templi.
Et diximus de fractura templi, si reus esset in triplici ordalio, compenset illud sicuti liber judicialis dicit.
III. De veneficiis.
Et diximus de incantationibus, et de sacrificiis barbaris, et de homicidiis; si quis aliquem occiderit, et is hoc negare nequeat, ut vitam suam perdat. Si 138.0463C| tunc illud inficiari vellet, et in triplici ordalio reus fieret, ut sit CXX dies in carcere, et cognati eum deinde educant, et solvant regi CXX solidos, et compensent aestimationem capitis cognatis ipsius, et fidejussores illius sint, quod semper a simili facto abstineat. De incendiariis. Incendiarii et furem vindicantes eodem [jure] digni sunt; et si quis furem vindicare velit, et nullum hominem vulneraverit, solvat regi CXX solidos multae loco pro transgressione.
IV. De monetariis.
Statuimus ut una moneta sit per omnem regis ditionem, et nemo monetam cudat extra portam. Et si monetarius reus fieret, manus ejus abscindatur quacum reatum commisit, et affigatur fabricae monetariae. 138.0463D| Et si autem accusatus sit, et ipse se purgare velit, tunc abeat ad candens ferrum, et purget manum ab illo [delicto] cujus est accusatus, quod fraudem hanc fecerit. Et si tunc in ordalio reus fieret, fiat ei quodlibet, sicuti antea dictum est.
In Cantuaria sit VII monetarii; quatuor regis, duo episcopi, et unus abbatis.
In Roffensi civitate tres, duo regis, et unus episcopi.
Londinii octo.
Wintoniae sex.
In Lewisio duo.
In urbe Hastingio unus.
Alius Cicestriae.
138.0464A|
Hamtoniae duo.
Werhamiae duo.
Duo Exoniae.
Duo Shaftesburiae.
Alias in aliis castellis unus.
V. De eo qui ordalium subire spondet.
Si quis ordalium subire spondet, tunc triduum ante illud ad presbyterum veniat, qui id sanctificare debet, et nutriat se pane, et sale, et aqua, et oleribus antequam illud adire debeat, et intersit missis, illis tribus diebus singulis et offerat, et eat ad sacrosanctam communionem illo die quo ad ordalium adire debet, et juret tunc juramentum illud, quod juxta jus gentium innocens sit earum accusationum, antequam 138.0464B| ad ordalium adeat. Et si sit aqua, ut immergatur sesquiulnam in fune. Si sit ordalium ferri, tres dies transeant antequam manus aperiatur; et quilibet accusationem suam prosequatur prae juramento, sicuti antea diximus, et sint singuli eorum jejuni ex utraque parte, qui praesto sunt ex mandato Dei et archiepiscopi, et non sint ibi in alterutra parte plures quam XII; si autem accusatus homo pluribus stipatus sit quam numero XII, tunc ordalium sit fractum, nisi illi discedere velint.
VI. De eo qui bona emit.
Qui bona emit praesentibus testibus, et ea deinde quis sua esse contendat, tunc recipiat ea [venditor] qui illa prius emerat, sive sit servus, sive liber, sive quicunque alius sit.
138.0464C| Et [jubemus] ut nulla emptio fiat diebus Solis, si quis autem hoc faciat, perdat pretium emptionis, et solvat XXX solidos pro mulcta.
VII. De perjuris.
Qui falsum juramentum praestat, et inde convictus fuerit, nunquam ei imposterum fides habeatur, neque in aliquo consecrato coemeterio jaceat, quando moritur, nisi habeat episcopi testimonium in cujus dioecesi est, quod ita illud compensaverit, prout ipsius confessor ei praescripserit; et confessor ipsius nuntiet episcopo intra XXX dies, utrum ad compensationem ejus redire velit. Si hoc ita non fecerit, compenset eo, quod episcopus ipsi injunxerit.
VIII. De has leges non exsequentibus.
138.0464D| Si quis praefectorum meorum autem hoc facere nolit, vel remissus sit in eo quod diximus, tunc solvat pro contumacia erga me, et ego inveniam alium qui [hoc exsequi] velit; et episcopus puniat contumaciam illam in praeposito, qui in ejus divisione est. Qui ab hac constitutione discesserit, solvat prima vice quinque libras, secunda vice aestimationem capitis, tertia vice perdat omne sui quod habet, et nostrum omnium amicitiam
IX. De legumlatoribus et loco concilii.
Omne hoc constitutum erat in magna synodo Gratanleagensi, in qua erat archiepiscopus Wulfhelmus cum omnibus nobilibus et sapientibus quos Aethelstanus rex congregavit.
Quotation analysis