Missale mixtum/10
IN FESTO S. MARTYRUM ADRIANI ATQUE NATALIE. Ad Missam. Officium.
Dabo vos nominatos in gloria: alleluja: in omnibus diebus vite vestre: alleluja: alleluja. V\. Benedicti vos a Domino qui fecit celum et terram. P. (0747A)in omnibus. V\. Gloria et honor Patri: et Filio: et Spiritui Sancto: in secula seculorum: amen. P. In omnibus.
Oratio. Omnipotens sempiterne Deus presta nobis: ut obtentu beatorum: Martyrum tuorum Adriani atque Natalie salvemur in mundo: qui repausatio sanctis tuis existunt in ergastulo. Et qui plagis beatorum exhibuerunt diligentiam: peccantibus curam prorogent indefessis. V\. Amen. Per misericordiam tuam Deus noster etc. Dominus sit semper vobiscum.
R\. Et cum.
Lectio libri Ecclesiastici Salomonis ( Cap. XI, XXVI).
R\. Deo gratias.
(0747B)Datio Dei permanet justis: et profectus illius successus habebit in eternum. Mulieris bone beatus vir: numerus annorum ejus inestimabiles. Mulier fortis oblectat virum suum: et annos vite illius in pace implebit. Pars bona mulier bona in parte bona: timentium Deum: dabitur viro pro factis bonis. Gratia mulieris sedule delectabit virum suum: et ossa illius impinguabit. Disciplina illius datum Dei: mulier sensata et tacita: non est immulatio erudite anime. Gratia super gratiam mulier sancta et pudorata omnis autem ponderatio non est digna continentis anime. Sicut Sol oriens in mundo in altissimis Dei: sic mulier bona species in ornamento domus est. Lucerna splendens super candelabrum sanctum species faciei super etatem stabilem. Columne (0747C)auree super bases argenteas: et pedes firmi super plantas stabilis mulieris. Fundamenta eterna super petram solidatam: et mandata Dei in corde mulieris sancte. R\. Amen.
(0748A)Dicat Presb. Dominus sit semper vobiscum. R\. Et cum spiritu. Psallendo. Mirabilis Deus in Sanctis suis. V\. Manda Deus virtutem tuam: confirma Deus quod operatus es. P. In Sanctis. Dicat Presb. Silentium facite. Epistola. Debitores sumus non carni. Evangelium. Nihil opertum. Quere plurimorum Martyrum. fo. 429. Dicat Presb. Dominus sit semper vobiscum. R\. Et cum. Lauda. Alleluja. V\. Ambulabunt sancti in albis: quoniam digni sunt: et non delebo nomina eorum de libro vite. P. Alleluja.
Sacrificium. Regnum et potestas et magnitudo regni dabitur populo sanctorum: alleluja. V\. Consurget Michael princeps magnus: et salvabitur omnis qui inventus fuerit in libro scriptus: et qui ad justiciam erudiunt multos: fulgebunt quasi stelle in (0748B)perpetua eternitate: pertransibunt plurimi et multiplex erit scientia populo sanctorum.
Missa. Adriani beatissimi atque Natalie dilectissimi fratres hodierno die: et predicanda nobis et adsequenda exempla sunt: qui conceptus Sancti Spiritus pleni: dum concessa inter se conjugii connubia servant: Christo nupturi spiritualem thalamum in suis cordibus parant. Cum et in 326 illo gloria fuerit dimicandi: et in illa felicitas obsequendi. Illum fidelis virorum turba concelebret: huic femineus chorus hymnum dicat. Illum viri ad vincendum in sui imitatione proponant: hanc femine in obsequendo imitabilem habeant. Sit in illum viri exemplum contemnendi humana: sit in hanc feminis famulandi probitas adsequenda. Per illum (0748C)viri adsuescant mundum despicere: per istam doceantur femine suis viris obtemperare. Discant per illum viri subire certamina passionis: discant per istam femine obedire passuris. Quo utrorumque (0749A)exemplis incitati a virtutibus: et per illum superemus vitia: per quem devicte sunt pene. et per istam obsequii capiamus mercedem: per quam sanctorum curate sunt plage.
R\. Amen.
Alia Oratio. Eterne et inestimabilis Deus summe: In quo beatissima famula tua Natalia vehementi gaudio exultavit: cum sibi conjunctum beatissimum Adrianum ad te conversum tota fidei devotione cognovit. Tu nos in te credentes ac de te sperantes utrorumque etiam suffragatione justifica. Ille nos exemplo suo fortiores efficiat: hec et curandos regat: et curatos tibi exhibeat. Per illum turpes ad virtutes animi excitentur: per hanc vulnerum abdita medeantur. Suscitandos ille suscipiat: quos vitandos (0749B)ista custodiat. Ille curatis gloriam: hec curandis adhibeat medicinam. Colligat ille: quos ista non reprobet. Curetque ista: quos ille glorificet. Quo per utrosque sic curandis adhibeatur salvatio: ut curatis donetur eterne glorie plenitudo. R\. Amen.
Post nomina. Oratio. Jesu Dei Patris fili: qui es et victoria Martyrum et corona victorum: in hoc Sanctorum tuorum Adriani atque Natalie festo concede offerentibus indulgentiam pro delictis: et sepultis beatorum animari consortiis. Ut tam nos quam illi cum eis in futura vita mereamur habere partem: cum quibus idem tuus beatissimus Adrianus a gentili conversus errore: sua voluit adnotari professione. R\. Amen.
Ad pacem. Oratio. Deus qui beatos Martyres tuos (0749C)Adrianum atque Nataliam conjugali federe copulatos: ad tantam gloriam provexisti: ut et ille patiendi munere: et hec locupletaretur obsequendi mercede: presta nobis ut devictis viciorum carnalium incentivis: atque perfecte coram te exhibentes nostre mysterium servitutis: muneribus ditemur a te pacis eterne: atque dulcedinis. Quo ita tibi placabiles simus charitatis ex opere: ut illic post transitum: qua idem Sancti requiescunt: jocundemur in pace.
R\. Amen.
Inlatio. Dignum et justum est: nos tibi semper gratias agere Domine sancte Pater eterne omnipotens Deus: per Jesum Christum filium tuum Dominum nostrum. Qui beatissimo Adriano cum suis (0749D)sociis: et certandi confidentiam: et remunerationis exhibuit gloriam. Quique tanto fidei ardore: archanum (0750A)pectoris famule sue Natalie inlustravit: ut que non excepit martyrium martyrii tamen consequi mereretur effectum. Cum martyrium quod perferre ab hoste non timuit: ceteris sanctis predicationis verbo amabile fecit. Illa quippe dum pietatis exhibuit cultum: pietatis capit premium. Et dum miserationis impendit solacium: ad misericordiam pervenit usque effectum. Quia quibus quantisque compassionis atque solacii exhibuit verbum: cum tot tantisque commune creditur suscepisse martyrium. Ac proinde digna et venerabilis femina sanctis omnibus obsequens: cum omnibus patiens: cum omnibus gaudens communiterque cum omnibus regna celestia tenens: exaudiatur pro nobis a te Deus Pater: clemens atque sanctissime. Quo per eam et facinorum (0750B)careamus inlecebris: et regnum teneamus cum tuis omnibus Sanctis. Cui merito omnes Angeli et Archangeli non cessant clamare quotidie ita dicentes.
R\. Sanctus.
Post Sanctus. Vere sanctus vere benedictus Dominus noster Jesus Christus filius tuus: qui ita fervore ignis sui sanctorum corda inflammat: ut sit illis omne quod cupiunt licitum: liceatque eis implere quod cupiunt: dum ea cupiunt implere que sancta sunt. Etenim Natalia sanctorum vulnera curans: eorumque in passionibus non in crudelitate sed compassione exultans: cum per ultimam mortis sententiam Adrianus 327 cum sociis suis passi essent letale exitium: cucurrit illa ad virum: et desectam corporis ejus manum sibi amoris usurpavit (0750C)in signum: ut ea pars membri in qua significabatur affectus operis: esset illi pro mentione in solacio charitatis. Quo per hanc amor viri semper in ejus viveret corde: et veram quodammodo ejus presentiam retineret. Sit ex hoc gloria tibi Pater omnipotens: qui tot beneficia ancille tue erga Sanctos exhibita remuneraturus aspiciens: lachrimisque ejus ineffabili pietate respondens: illorum eam glorioso cetui adgregasti: quorum eadem hic degens plagis curationem exhibuit. Per Christum Dominum ac Redemptorem eternum.
Post pridie. Has tibi Domine in solennitate tuorum Sanctorum Adriani atque Natalie victimas offerentes: adclinati supplicatione rogamus: ut eorum intercedentibus meritis: des veniam nostris peccatis. (0750D)Quo exemplo Natalie: que viri sui sanguine se letabatur perunctam: nos quoque de corpore et sanguine (0751A)unigeniti filii tui libantes: consecutos nos gaudeamus spiritus unctionem internam: et misericordiam copiosam. R\. Amen.
Ad orationem Dominicam.
Deus qui peccatores sine merito salvas: et justos ex gratia precedente glorificas: quique Adrianum ex infidelitate revocasti ad fidem: et Nataliam obsequiali coronasti ex munere: nostris quesumus in eorum festo et iniquitatibus parce et spirituali nos ardore succende. Quo spiritualiter accensi in intimis ad te proclamemus e terris. Pater noster.
Si istud festum evenerit in tempore Resurrectionis dicat Presb. Vicit leo. Tribus vicibus. Quere fo. 198. Postea dicat. Humiliate vos benedictioni. Dominus sit semper vobiscum. R\. Et cum.
(0751B)Benedictio. Omnipotens Deus respiciat vota vestra: qui Adrianum martyrii palma: et Nataliam obsequendi glorificavit ex gratia. R\. Amen. Illorum quoque vos suffragio tueamini: quorum plagis Natalia famulatus sui dependit obsequio. R\. Amen. Ut in presentis diei solennitate orantes: et hic et in futuro eorum gaudii mereamini esse participes. R\. Amen. Per misericordiam ipsius Dei nostri etc. Dominus sit semper vobiscum. R\. Et cum.
Si venerit istud festum in tempore Resurrectionis dicat Chorus. Gaudete populi.
Com. Refecti Christi corpore. Quere in vigilia Resurrectionis. fo. 193.
Oratio. Domine Deus omnipotens qui es vita. Quere in festo Sanctorum Juliani et Basilisse. fo. (0751C)287. Et ubi dicitur Sanctorum Juliani et Basilisse dicatur Sanctorum Adriani atque Natalie.
Marci et Marcelliani Martyrum:
Omnia dicantur plurimorum Martyrum. fo. 430.
Gervasii et Prothasii Martyrum:
Omnia dicantur plurimorum Martyrum. fo. 430.
Florentie Virginis:
Omnia dicantur unius Virginis. fo. 436.
Silvestri Pape et Martyris:
Omnia dicantur unius Martyris. fo. 421.
Consortie Virginis cum XI. millium Martyrum:
Omnia dicantur plurimorum Martyrum. fo. 430.
In Dominico pro adventu Sancti Johannis ad Missam. Officium. Dominus regnavit. Quere in Dominico post Epiphan. fo. 64. Dicat Presb. Per omnia (0751D)semper secula seculorum. R\. Amen. Dicat Presb. Gloria. Benedictus Dominus Deus Israel. Et Chorus cantet omnia alia usque in finem cantici sine Gloria.
Oratio. Domine Deus qui adventum unigeniti filii tui: Johannem puerum precurrere voluisti: ut missus (0752A)a te viam Christo incredulorum cordibus prepararet: et sanando contribulatos corde: et cecis restituendo luminis claritatem. Suffragio ejus et cecitatem cordis nostri inlumina: et tribulationes cordium nostrorum in eternum gaudium muta: ut qui in nativitate unigeniti filii tui gaudio Christiano attollimur: in adventu judicii ejus: nullis penarum vinculis contristemur. R\. Amen. Per misericordiam tuam Deus noster etc. Dominus sit semper vobiscum. R\. Et cum.
Lectio libri Esaye Prophete ( Cap. XL).
R\. Deo gratias.
Consolamini consolamini popule meus: dicit Dominus Deus vester. Loquimini ad cor Hierusalem: et vocate eam: quoniam completa est malicia ejus: (0752B)dimissa est iniquitas illius. Suscepit de manu Domini duplicia pro omnibus peccatis suis. Vox clamantis in deserto: parate viam Domino: rectas facite semitas Dei nostri 328 in solitudine. Omnis vallis exaltabitur: et omnis mons: et collis humiliabitur. Et erunt prava in directa: et aspera in vias planas. Et revelabitur gloria Domini: et videbit omnis caro pariter quod os Domini locutum est. Vox dicentis clama: et dixi. Quid clamabo? Omnis caro fenum: et omnis gloria ejus quasi flos agri. Et siccatum est fenum et cecidit flos. Verbum autem Domini Dei nostri stabit in eternum. R\. Amen.
Dicat Presbyter. Dominus sit semper vobiscum. R\. Et cum.
Psallendo. Expectabam Deum: qui me salvum (0752C)fecit a defectione et tempestate. V\. Ecce elongavi fugiens et mansi in solitudine. P. A defectione.
Dicat Presbyter. Silentium facite.
Sequentia Epistole Pauli Apostoli ad Ephesios ( Cap. IIII).
R\. Deo gratias.
Fratres. Obsecro vos ego vinctus in Domino: ut digne ambuletis vocatione: qua vocati estis. Cum omni humilitate et mansuetudine. Cum patientia supportantes invicem: in charitate soliciti servare unitatem spiritus in vinculo pacis. Unum corpus: et unus spiritus: sicut et vos vocati estis in una spe vocationis vestre. Unus Deus: una fides: unum baptismum. Unus Deus pater omnium qui super omnes est: et per omnia et in omnibus vobis. Unicuique (0752D)autem vestrum data est gratia secundum mensuram donationis Christi in qua ipsi vocati estis. Propter quod dixit. Ascendens in altum captivam duxit captivitatem: dedit dona hominibus. Quod autem ascendit: quid est nisi quia et descendit primum in (0753A)inferiores partes terre. Qui descendit ipse est: et qui ascendit super omnes celos: ut adimpleret omnia. Et ipse dedit quosdam quidem Apostolos: quosdam autem Prophetas alios: vero Evangelistas alios autem pastores et doctores ad consummationem sanctorum in opus mysterii in edificationem corporis Christi. Donec occurramus omnes in unitatem fidei et agnitionem filii Dei: in virum perfectum in mensuram etatis plenitudinis Christi. R\. Amen.
Evangelium. Initium sancti Evangelii Jesu Christi filii Dei. Quere in Dominica sexta Adventus Domini. fo. 19. Dicat Presb. Dominus sit semper vobiscum. R\. Et.
Lauda. Alleluja. V\. Laudem Domini loquetur os meum: et benedicat omnis caro nomen sanctum (0753B)ejus. P. Alleluja.
Sacrificium. Vox clamantis in eremo: parate viam Domino: rectas facite semitas Dei nostri alleluja alleluja. V\. Alleluja. Spiritus Domini super me: propter quod unxit me evangelizare hominibus: misit me sanare contribulatos corde: predicare captivis redemptionem: et cecis lumen reddere dicens. P. Parate viam Domino.
Missa. Universitatis potentissimum Creatorem fratres charissimi congregati solenniter adoremus: et predestinati populi benignissimum patrem: coram ipso humiliati salubriter invocemus. Ut pro malis sicut Sol: et bona retribuat: et fideles suos in quacumque die tribulantur: exaudiat. Neque permittat innocentes sub calumniis laborare: sed dignetur (0753C)universos evadere. Donec Regibus fidelibus cum mansuetudine et veritate justiciam largiatur: populis tranquillitate concordiam. Servientes sibi Dominus sine iracundia dominari conveniet: ut vicissim servos ad obediendum sine murmuratione compellat. Exoretur etiam divites non amare divitias perituras: ut per Lona opera delectentur acquirere sempiterna. Ipse pauperes pascat: ipse nudos vestiat: ipse non habentes auxilio protegat. De conclusione captivitatis exules revocet. Et de domo carceris suspirantes in vinculis liberet. Sit pupillis quotidianus adjutor: sit benignus et misericors: viduarum lachrymantium consolator. Beneficia pluviarum consueta non auferat: ut inebriata terra pinguescat. Faciat nos in oratione (0753D)promptissime vigilare: et hoc sacrificium in remissionem peccatorum frequenter offerre. R\. Amen.
Alia Oratio. Deus qui presentium hominum vitam agnoscis: diversarum necessitatum passionibus subjacere; exaudi desideria supplicantium; suscipe vota credentium. Sacerdotum auge salutem: (0754A)ut cordis auferat morbos: aut corporis manus medica dolorem mestique pestem pellat egroti. Si judicis aut ira vexat: mitiga tu ira perditum: libera tu ira subjectum. 329 Si ad litem publicam discordes funesta intentio vocat: dissidentium animos pax amica preveniat. Si terreni itineris subeunda vexatio est: Angelum sanctum decerne custodem. Abigat demones: predam bestie: errorem vie: casum fovee: insidias furis: vim latronis. Si adire maria navigaturus fidelis exoptat: tu in invisibilis gubernatoris beneficio sentiendo ingredere. Ut nec mentem in peccatum cupiditas lucro precipitata demergat: nec navem in profundum tempestas vento exagitata dissolvat. Tunc enim felicem substantia pensavit questum: si innocentia non fuerit passa (0754B)naufragium. R\. Amen.
Post nomina. Oratio. Precamur Domine sancte Pater omnipotens Deus: qui omnium corda perscrutaris: et vota perpendis: ut non solum pro dictis petitionibus: verum etiam occultis desideriis nostris: benignus faveas: et adesse digneris. Ad quecumque enim poscenda concurrimus: universa priusquam loquamur intelligis. Offerimus itaque obsecrationes nostras pro egestate inopum: pro laboribus pupillorum: pro injuria vinctorum: pro securitate viantium: pro consolatione et requie fidelium defunctorum: et pro his qui sulcandum navibus equor arripiunt: ut reddantur in adversa securi. Febres omnes passionesque languentium excludantur: neque in aliquos immundi spiritus tentatio potestatem (0754C)accipiat: sed cunctis celesti protectione defensis: oblatio subveniat tui altaris. R\. Amen.
Ad pacem. Oratio. Deus qui dum sublimia deitatis ascendis: observare nos pacem auctoritate Evangelica precipis: da nobis placidus pacem tuam: ut discordie prona fugiamus: et per pacis bonum celorum ardua conscendamus. R\. Amen.
Inlatio. Dignum et justum est: nos tibi gratias agere Domine Deus noster: qui labantem animam et antiquo ulceris dolore confectam: non solum ad amissam revocas dignitatem: et in pristino nitore restauras: sed etiam in partem glorie celestis admittis donando culpam prevaricationis: et remittendo perpetue injuriam mortis. Quod ut ista prestares (0754D)non te nostre pravitatis officiositas: sed illa ingenite bonitatis consuetudo commovit. Tu igitur vinctum afflictumque hominem captivitate depulsa: libertati donasti: et obnoxium lege moriendi vicario munere redemisti. Mittendo unicum filium tuum Dominum nostrum: qui compensatione commercii: dum nos (0755A)liberare contendit: sanguinem fudit. Ita celestis dignitas dum nos indignos prospicit: contumeliis addita subjacuit: omnique se injurie subdidit: dummodo hominem quem in nascendo susceperat: moriendo servaret. Per quem te quesumus et rogamus: ut intendas super hec munerum sincera libamina: que in hoc altare tuum sacrificiorum more detulimus. Ut in conspectu tuo offerentium vota custodias: et verus Sacerdos veram hostiam meritis celestibus benedicas: ac de istis temporalibus cibi immortalitatis sacramenta componas: que sue suavitatis gratia infirmitates corporum: et languores compescant animarum: per ipsum quem tecum et cum Spiritu Sancto in unitate Deitatis: omnes Angeli et Archangeli non cessant conlaudare: ita dicentes. R\. Sanctus.
(0755B)Post Sanctus. Vere sanctus: atque in excelsis mirabilis Dominus noster Jesus Christus filius tuus. Per quem tibi Deus Pater omnipotens famulantes offerimus sacrificium laudis: et simplicem devotionem nostri cordis. Non enim hic horrido mugitu pecudum: tristis hostia taurus occiditur: aut hircus de gregibus immolatur: sed hostia quam verus Dominus et Sacerdos instituit omnipotens. Christus Dominus ac redemptor eternus.
Post pridie. Oratio. Altare tuum Domine manus tue consecratione sanctifica: teque ipsum mentibus nostris leticie et gratie resurrectionis spe ostende. Omnibus tibi servientibus vota que acceptare digneris: inspirando largire: populum tuum placabilis (0755C)respice: atque ad partem gratie salutaris admitte. Confitentibus parce. Letantibus fave: ac tristes per indulgentiam consolare. R\. Chorus. Amen.
330 Ad orationem Dominicam.
Orationem dicturi Dominicam fratres charissimi nihil nostris mentibus cogitatio terrena subripiat: nihilque turpe vel lubricum horrende vanitatis occurrat. Sed penitentes de preteritis: et petentes veniam de futuris cum timore: et fiducia clamemus e terris. Pater noster.
Dicat Presbiter. Humiliate vos benedictioni. Dominus sit semper vobiscum. R\. Et cum.
Benedictio. Benedictionis Domini gratia semper vos protegat: et ab omni malo defendat. R\. Amen. (0756A)Mundet vos Dominus ab omni crimine peccatorum: et sibimet placere faciat in eternum. R\. Amen. Ubique vobis Dominus placatus occurrat: et sue benedictionis opem dignanter attribuat. R\ Amen. Per misericordiam ipsius Dei nostri etc. Dominus sit semper vobiscum. R\. Et cum. Dicat Chorus. Gustate.
Com. Refecti Christi corpore. Quere in festo Corporis Christi. fo. 267.
Oratio. Credimus Domine Jesu: quod precursor tuus Johannes: quod prophete in enigmate prophetaverunt: ipse digito ostendit dicens. Ecce Agnus Dei: ecce qui tollit peccatum mundi: proinde quesumus et rogamus: ut qui primi adventus tui venturum tempus predicavit: in secundi adventus tui tempore dum judicare veneris vivos et mortuos: nos (0756B)ad dexteram tuam coronandos statuas. R\. Amen. Per misericordiam tuam Deus noster etc. Dominus sit semper vobiscum. R\. Et cum. Missa acta est in nomine Domini nostri Jesu Christi: perficiamus cum pace. R\. Deo gratias.
NATIVITAS SANCTI JOHANNIS BAPTISTE. Ad Missam. Officium.
Angelus Domini dixit Zacharie: alleluja. Ecce Elisabeth in utero concipiet: alleluja: et pariet filium: et nomen ejus Johannes vocabitur: alleluja: alleluja. V\. Tu puer propheta altissimi vocaberis: preibis enim ante faciem Domini parare vias ejus. P. Et pariet. V\. Gloria et honor Patri: et Filio: et Spiritui Sancto in secula seculorum. Amen. P. Et pariet.
(0756C)Dicat Presb. Per omnia semper secula seculorum. R\. Amen. Gloria in excelsis.
Oratio. Deus qui nos in Nativitate precursoris tui Johannis voluisti gaudere: fac nos plenum gaudium a te in futura examinatione percipere. Ut meritis ejus qui adventum tuum in spiritu et virtute Helie precessisse cognoscitur: et hic et in eternum gaudiis conletemur. R\. Amen. Per misericordiam tuam Deus noster etc. Dominus sit semper vobiscum. R\. Et cum.
Lectio Hieremie Prophete. ( Cap. I).
R\. Deo gratias.
Hec dicit Dominus. Priusquam te formarem in utero: novi te: et antequam exires de vulva sanctificavi (0757A)te: et prophetam in gentibus dedi te: et dixi. a. a. a. Domine Deus ecce nescio loqui: quia puer ego sum. Et dixit Dominus ad me. Noli dicere: quia puer ego sum. Quoniam ad omnia que mittam te ibis: et universa quecumque mandavero tibi: loqueris. Ne timeas a facie eorum: quia tecum ego sum: et eruam te dicit Dominus. Et misit Dominus manum suam ad me: et tetigit os meum. Et dixit Dominus ad me. Ecce dedi verba mea in ore tuo: et constitui te hodie super gentes et super regna: ut evellas: et destruas: et disperdas: et dissipes: et edifices: et plantes. Tu ergo accinge lumbos tuos: et surge: et loquere ad eos omnia: que ego precipio tibi. Ne formides a facie eorum. Nec enim timere faciam vultum illorum. Ego quippe dedi te hodie in (0757B)civitatem munitam: et in columnam ferream: et in murum ereum super omnem terram regibus Juda: principibus ejus: et sacerdotibus ejus: et populo terre. Et velabunt adversum te: et non prevalebunt: quia tecum ego sum: ait Dominus: ut liberem te. R\. Amen. Dicat Presb. Dominus sit semper vobiscum. R\. Et
Psallendo. Tu es Domine qui eduxisti me de ventre: spes mea ab uberibus matris mee. V\. In te jactatus sum ex utero: de ventre matris mee tu es Deus meus: in te est decantatio mea. P. Spes mea. V\. Repleatur os meum Deus laude tua: ut possim cantare gloriam tuam.
Dicat Presb. Silentium facite.
(0757C)Sequentia Epistole Pauli Apostoli ad Galathas ( Cap. I).
R\. Deo gratias.
Fratres. Notum vobis facio Evangelium: quod evangelizatum est a me; quia non est secundum hominem: neque enim ab homine accepi illud; neque didici: 331 sed per revelationem Jesu Christi. Audistis enim conversationem meam aliquando in Judaismo: quoniam supra modum persequebar Ecclesiam Dei; et expugnabam illam: et proficiebam in Judaismo supra multos coetaneos in genere meo. Abundantius emulator existens paternarum mearum traditionum. Cum autem placuit ei: qui me segregavit de utero matris mee: et vocavit me per gratiam suam: ut revelaret filium suum in me: et evangelizarem illum in gentibus: continuo non acquievi (0757D)carni et sanguini. Neque veni in Hierosolymam ad antecessores meos Apostolos: sed abii in Arabiam: et iterum reversus sum Damascum. Deinde post annos tres veni Hierosolymam videre Petrum: et mansi apud eum diebus quindecim. Alium autem Apostolorum vidi neminem: nisi Jacobum fratrem Domini. Que autem scribo vobis ecce coram Deo: (0758A)quia non mentior. Deinde veni in partes Syrie et Cilicie. Eram autem ignotus facie Ecclesiis Judee: que erant in Christo. Tantum autem auditum habebant: quoniam qui persequebantur nos aliquando: nunc evangelizant fidem: quam aliquando expugnabant: et in me clarificabant Deum. R\. Amen.
Lectio sancti Evangelii secundum Lucam ( Ca. I).
In illis diebus. Elisabeth autem impletum est tempus pariendi: et peperit filium. Et audierunt vicini et cognati ejus: quia magnificavit Dominus misericordiam suam cum illa: et congratulabantur ei. Et factum est in die octavo venerunt circumcidere puerum: et vocabant eum nomine patris ejus Zachariam. Et respondens mater ejus dixit. Nequaquam: sed vocabitur Johannes. Et dixerunt ad illam. (0758B)Quia nemo est in cognatione tua: qui vocetur hoc nomine. Innuebant autem patri ejus: quem vellet vocari eum. Et postulans pugillarem: scripsit dicens: Johannes est nomen ejus. Et mirati sunt universi. Apertum est autem confestim os ejus: et lingua ejus: et loquebatur benedicens Deum. Et factus est timor super omnes vicinos eorum: et super omnia montana Judee divulgabantur omnia verba hec. Et posuerunt omnes qui audierant in corde suo: dicentes. Quis putas puer iste erit? Etenim manus Domini erat cum illo. Et Zacharias pater ejus impletus est Spiritu Sancto: et prophetavit dicens. Benedictus Dominus Deus Israel: quia visitavit et fecit redemptionem plebis sue. Et erexit cornu salutis nobis in domo David pueri sui: sicut (0758C)locutus est per os Sanctorum qui a seculo sunt prophetarum ejus. Puer autem crescebat et confortabatur spiritu: et erat in deserto usque in diem ostensionis sue ad Israel. R\. Amen.
Dicat Presb. Dominus sit semper vobiscum. R\. Et cum.
Lauda. Alleluja. R\. Suavis sit Deo laudatio mea. Ego vero delectabor in Domino. P. Alleluja.
Sacrificium. Sacerdos Zacharias fuit de vice Abia: et uxor illi de filiabus Aaron: erant enim justi ambo ante Deum: incedentes in omnibus mandatis et justificationibus Domini sine querela: alleluja: alleluja. V\. Apparuit Zacharie Angelus Domini stans a dextris altaris: dicens: ne timeas Zacharia: quoniam exaudita est deprecatio tua: et (0758D)uxor tua Elisabeth pariet tibi filium: et vocabis nomen ejus Johannem: et erit tibi gaudium et exultatio: et multi in nativitate ejus gaudebunt: et erit magnus coram Domino. P. Sine querela: alleluja.
Missa. Expectationi nostre fratres charissimi Dominus Deus noster gaudia desiderata restituens: (0759A)natalem nobis precursoris sui Johannis: verum lumen lucerne preeuntis invexit. Cum festivitate reciprocantium etiam temporum ipsorum vernante leticia qua se nobiscum in gaudio omnis creatura adventum Domini auditura diffudit. Et qui ad nativitatem precursoris sui Johannis annua nos festivitate revocavit: ad suum quoque natale cum profectu totius Ecclesie: et defectu nequicie spiritualis: simili dignatione nos provocet Et qui tanti prophete ortum prius nobis dignatus est nomine manifestare: quam luce: et ante ostendere electionis ejus: quam conceptionis initium: supplicibus tribuat servulis adimplere predicationis ipsius sacratissimum verbum. Quia scilicet preco mirabilis preparandus ac previus prius ab eo preconium laudis: quam viam (0759B)accipere meruit vocis. Atque ut ante ortum ab eo ostenderetur laudandus: quem post ortum ipse ostenderet laudaturum. Precamur ergo corde prostrato et affectu humiliationis devoto: 332 ut aperiat nobis Dominus noster quicquid in cordibus nostris infidelitas claudit: quicquid promissionum ejus gratiam obscuritas lubrici timoris intercipit: et concedat ut natale Angeli sui ante faciem suam missi: os nostrum repleat confessione: cor nostrum roboret fide: cursum nostrum dirigat voce: contentum mortis instruat veritate: agnitionisque innocentiam populo suo ipse impetret: qui eum agnum Dei in populorum expectatione monstravit. Sit ejus laus in ore nostro: ut qui votis solemnia solvimus: verbi munera capiamus. R\. Chorus. Amen.
(0759C)Alia Oratio. Inter laudes tuas: et preces nostras omnipotens Deus: interest hodie beatissimi Johannis prestantissima in gaudiis populorum ordinata nativitas. In qua nobis multiplicis gratie tue dona venerantibus: dum in preconium vocatur ille: qui prestitit suffragium: queritur ille: qui meruit. Qui nobis naturarum omnium creatorem: necdum natus ostendit: ut expers vite sue fieret testis glorie tue. Haberetque prius cognitum lucis Dominum: quam communis luminis usum. Qui in illis coagulati corporis rudimentis: materni uteri lege vivescens: vocem Dominice matris salutantis exciperet: et quod a ministerio devotionis exiliens: motu exultanti responderet: qui ad opus Evangelii nasciturus: matrem de officio necdum editus commoveret. (0759D)Qui predicaturus penitentiam: paterne difidentie errorem intercepte vocis dispendio castigaret: et dubie mentis incredulitatem prophetatus clauderet: cum venture salutis fidem prophetaturus aperiret. In hujus ergo Domine natalicii diei solemnitate gaudentes: pacificas sacrificiorum tibi hostias immolamus: ut Sacerdotalis officii functionem sancti Angeli visitatione dignatus acceptes: faciasque promissa nos credere: credita predicare: predicata non perdere.
R\. Amen.
Post nomina. Oratio. Christe Jesu qui virginali (0760A)nasciturus de utero precursorem tuum Johannem senili fecisti exoriri ex alvo: quem lucernam ardentem tuo constituisti in templo: fac nos lucere in Ecclesia tua ardore fidei: et instructione docendi. Charitatis opere: et humilitatis perfectione. Orationis studio: et castimonie documento. Sicque nunc has oblationes offerentis populi fidelis accepta: ut cunctis congrua largiaris remedia. Per eum et spiritale gaudium vivis: et penarum evasionem conferendo defunctis: per quem tibi in cordibus incredulorum: et via est preparata: et indulte gratie primordia sunt ostensa. R\. Amen.
Ad pacem. Oratio. Deus qui nobis per prophetiam precursoris tui Johannis obumbrantium significationum figuras: aperta veritatis tue manifestatione (0760B)monstrasti: tribue nobis intelligentie lumen: et pacis perpetue charitatem. Ut gratia succedente pro gratia: sic gloriemur in nobis: ut in charitatis unitate constituti: non abutamur antiquis. R\. Amen.
Inlatio. Dignum et justum est: omnipotens Pater: nos tibi gratias agere. Qui humane salutis ita ex prima conditione: sicut ex secunda reparatione solicitus: ne inopinatos nos causa tanti muneris inveniret: ad manifestandum filii tui adventum electissimum Johannem nuncium destinasti. Qui nos de mirabilibus ejus: ipse jam per eum ex nativitate sua mirabilis commoneret: et magnitudinem sequentium rerum rudes adhuc populos credere sui ostensione consuesceret. Nunciaturus Christum: per Angelum (0760C)nunciatur. Predicaturus in populo: predicatur in templo. Ante notus honore: quam tempore. Sic actum est tue dispensationis effectu: ut qui parentibus in incensi est oblatione promissus: gentibus in agnitione luminis sit premissus. Precursurus Verbum: silentium ponit incredulis: et ante processum vite sue: futura infidelitatis damna: muta patris voce loquebatur. Utique ut qui persuasione veteri loquebatur: paterne traditionis obstructum in meliorem Evangelii doctrinam fidelium linguam: nomen novi heredis absolveret. Ecce exultat in utero: ut 333 in parentis visceribus native gentis pectora venturi regis predicatione concuteret. Erumpit in gaudio: ut desperate promissionis taciturnitas filii veritate (0760D)convicta: in testimonium suscepti muneris exclamaret. Prophetat in spiritu: testificatur in Evangelio. Ministrat in Baptismo. Docet in populo. Degit in heremo. Proficit in deserto. Parat vie viam venturum. Nunciat per quem venit: et priorem sibi quem secuturum diceret non tacebat. Erat speculum luminis. Initium baptismatis. Testimonium veritatis. Ut in plenitudine Christi signorum rem post rei signa monstraret. Nuncius salutis. Emulus passionis. Servit propheta baptismo. Baptista martyrio. Ut Christum Dei Filium pro mundi redemptione venturum: quem adnunciare se predicatione sermonis ostenderet: amare se effusione sanguinis (0761A)comprobaret. Unde merito celi celorumque virtutes cum Angelis et Archangelis: hymnum tibi laudis debite cum Seraphin exultant: ita dicentes. R\. Sanctus.
Post Sanctus. Vere sanctus: vere benedictus es Domine Deus omnipotens. Unitas distinctibilis: et distinctio inseparabilis. Unitas Trinitatis. Et Trinitas summe unitatis. Qui operibus tuis compatiens impassibilis: eo usque misericordiam porrigis: ut ad notescendum salutare tuum: premitteres Johannem puerum tuum previum vie: lucernam luminis: preconem judicis. Vocem Verbi: amicum sponsi. Unde nos pro tuis donis: ejusque bonis tibi litationis victimam offerentes: precamur: ut acceptabiliter eam adsumas: et dignatione consueta benedicas. Atque (0761B)offerentes conformes ejus efficias: qui tibi in commemoratione Jesu Christi Filii tui Domini nostri: devota et prosternata servitute persolvimus. Per ipsum Dominum ac redemptorem eternum.
Post pridie. Oratio. Convaluisti: Domine Jesu Christe in gratia: et incredulis gentibus sedula testatione claruisti. Te annuncians beatissimus doctor ille Johannes: tam incomparabilis sanctitate: quam singularis magisterii assertor: fontem lavacri sitientibus dabat: sed esse venturum te procul dubio nunciabat. Ille descenderat aquis corpora purgaturus: tu sperabaris corpora redempturus. Ex hujus enim voce cognovimus: unigenitum te Dominum in corporis forma et carne conspicuum: de quo nobis dixit. Ecce agnus Dei: ecce qui tollit peccatum (0761C)mundi. Hic enim: cui et nomen antequam conciperetur dedisti: quem et Spiritu Sancto priusquam (0762A)nasceretur implesti: qui et sterilitatem matris conceptus abstersit: et patris linguam natus absolvit. Oramus ergo te Domine ut hanc oblationem nostram: respicere et benedicere digneris: sicut benedicere dignatus es munus Abel justi pueri tui.
R\. Amen.
Ad Orationem Dominicam.
Deus qui per beatissimum Johannem precursorem et Martyrem tuum: gentibus universis lumen baptismatis intulisti: ut infidelitatem populorum: quam vane observantie ritus intulerat: regeneratio celestis absolveret: presta ut intercessio tanti vatis que nobis est indulta per lavacrum pie conscientie: proficiat ad exemplum. Ut salutaribus edocti preceptis: sic dicere mereamur e terris. Pater noster.
(0762B)Dicat Presbiter. Humiliate vos benedictioni. Dominus sit semper vobiscum. R\. Et.
Benedictio. Dominus Jesus Christus qui in nativitate precursoris sui: tribuit multis gaudium magnum: det vobis devicta omni tentatione remissionem omnium peccatorum. R\. Amen. Et eadem se presule virtus nunc resultet in voce supplicum: que prolato Johannis nomine: os quondam reseravit paternum. R\. Amen. Ac sicuti eo nascente matri est attributa fecunditas: ita menti vestre: quo sibi fructificet: fidei imperciatur ubertas. R\. Amen. Per misericordiam ipsius Dei nostri etc. Dominus sit semper vobiscum.
R\. Et cum.
Dicat Chorus. Gustate.
(0762C)Com. Refecti Christi corpore. Quere in festo Corporis Christi. fol. 267.
(0763A)Oratio. Deus qui sterili Elisabet senique infructuoso Johannem promissionis filium condonasti: qui dum adhuc inclusus in ejus utero portaretur: Deum in 334 hospitium virginis habitantem sua salutatione prophetavit: te petimus: te rogamus: ut qui predicatione ejus regni celestis aperuisti credentibus januam: suffragio ejus nos perducas ad gloriam. R\. Amen. Per misericordiam tuam Deus noster etc. Dominus sit semper vobiscum. R\. Et cum. Solennia completa sunt in nomine Domini nostri Jesu Christi: votum nostrum sit acceptum cum pace. R\. Deo gratias.
Translatio S. Eligii Episcopi et confessoris:
Omnia dicantur unius Confessoris Pontificis. fol. 432.
Johannis et Pauli:
Omnia dicantur plurimorum Martyrum. fol. 430.
(0764A)Leonis Pape et Confessoris:
Omnia dicantur unius Confess. Pontificis. fol. 432.
IN FESTO APOSTOLORUM PETRI ET PAULI. Ad Missam. Officium.
Dabo Sanctis meis primam sessionem: alleluja: in resurrectione eterna: et exquiram illos in gaudio meo. P. Et lux perpetua lucebit eis: alleluja. Et eternitas temporum preparata est: alleluja: alleluja. V\. Benedicti vos a Domino qui fecit celum et terram, P. Et lux perpetua. V\. Gloria et honor Patri: et Filio: et Spiritui Sancto in secula seculorum: amen. P. Et lux perpetua.
Oratio. Hi sunt Christe Domine amici tui Petrus et Paulus qui tradentes corpora sua ad mortem: (0765A)effecti sunt ductores gratie: fundatores Ecclesie. Quos et unitas precandi: felicitas moriendi nec dividi passa est: nec elidi. Quesumus ergo ut qui illorum doctrina populos fecisti esse credentes: eorum prece nos efficias regni celestis coheredes. R\. Amen. Per misericordiam tuam Deus noster etc. Dominus sit semper vobiscum. R\. Et cum.
Prophetia. Multam gloriam fecit Dominus. Quere in festo Philippi et Jacobi. fol. 320. Dicat Presbiter. Dominus sit semper vobiscum. R\. Et cum. Psallendo. In omnem terram exivit sonus eorum: et in fines orbis terre verba eorum. V\. Non sunt loquele neque sermones: quibus non audiantur voces eorum. P. Et in fines orbis. Dicat Presb. Silentium facite. Epistola. Gratia vobis et pax a Deo Patre (0765B)nostro et Domino Jesu Christo. Benedictus Deus et Pater Domini nostri Jesu Christi qui benedixit. Quere in commune plurimorum Martyrum. fol. 430.
Lectio Sancti Evangelii secundum Johannem ( Cap. XV).
In illis diebus: Dominus noster Jesus Christus loquebatur discipulis suis dicens. Si manseritis in me: et verba mea in vobis manserint: quodcumque volueritis petite et fiet vobis. In hoc clarificatus est Pater meus: ut fructum plurimum afferatis: et efficiamini mei discipuli. Sicut dilexit me Pater: et ego dilexi vos: manete in dilectione mea. Si precepta mea servaveritis: manebitis in dilectione mea: sicut et ego precepta Patris mei servavi: et maneo in dilectione ejus. Hec locutus sum vobis: ut gaudium (0765C)meum in vobis sit: et gaudium vestrum impleatur. Hoc est preceptum meum ut diligatis invicem: sicut dilexi vos. Majorem hac dilectionem nemo habet: ut animam suam quis ponat pro amicis suis. Vos amici mei estis: si feceritis que ego precipio vobis. Jam non dico vos servos: quia servus nescit quid faciat Dominus ejus. Vos autem dixi amicos: quia omnia quecumque audivi a Patre meo: nota feci vobis. Non vos me elegistis: sed ego elegi vos: et posui vos ut (0766A)eatis et fructum afferatis: et fructus vester maneat. Ut quodcumque petieritis Patrem in nomine meo det vobis. R\. Amen.
Dicat Presb. Dominus sit semper vobiscum. R\. Et cum.
Lauda. Alleluja. V\. Celi enarrant gloriam Dei: et opera manuum ejus annunciat firmamentum. P. Alleluja.
Sacrificium. Venite benedicti Patris mei percipite regnum: quod vobis paratum est ab origine mundi: alleluja. V\. Cum venerit filius hominis in majestate sua: et omnes Angeli cum eo: tunc fulgebunt justi sicut Sol in regno Dei: alleluja.
Missa. Magnorum Apostolorum Petri et Pauli non varias diversasque virtutes: quas explicare digna (0766B)predicatione non possumus revolventes: sed supremas et gloriosissimas passiones quas exolvere annua devotione debemus: fratres charissimi: hodie celebrantes: Deum qui ipsorum et sanctorum omnium summa laus est: deprecemur. Ut sicut ipse principaliter in eorum est laudatione laudandus: ita nobis libenter eorum intercessione: qua placandum eum credimus: sit placatus. 335 Ecclesiam suam quam in illis elegit: edificavit: replevit: et docuit: ipsis jugiter pro ea supplicantibus tueatur: fundatam eam in solidissimam petram: tempestatis procella non subruat. Nihil ei per tartareas hereticorum eversiones porte prevaleant inferorum: quas ita humiliati tenebrarum principes tollent: ut elevatis eternalibus portis: quasi in templum suum: sic in nobis unus (0766C)atque idem virtutum Dominus: et Rex glorie celestis introeat. Qui propositas in terrorem fidelium persequentium minas tremendas sue majestatis objectu radiantibus nova luce fulgoribus: vocem verbi perennis avertat. Sibique per ipsam in se credentes humani generis susceptionem inferri: quod fideles suos pati pro suo nomine prospicit protestetur. In se nostri causa dolores excipiens: sibi fieri quicquid contra cultores Christiani nominis impii molliuntur: (0767A)ostendat. Ut cunctis brachii sui magnitudine dominante: omnes se nobiscum in confessione Petri: et predicatione Pauli vivere gratulentur.
R\. Amen.
Alia Oratio. Domine qui beatissimos Apostolos tuos Petrum et Paulum diverso tempore vocationis beneficio elegisti: et uno die passionis merito coronasti: quorum ammirabilis singulorum fides ante obitum mortis inlate: unum fecit claves regni celestis accipere: alium usque in celum tertium penetrare. Cum ille censor credentium constitutus intromittendi illic probos: et excludendi improbos jus teneret. Hic in excessu: supra nubium raptus recessu: ineffabilia divinorum secreta verborum gentium futurus Doctor hauriret: quodque alii Sanctorum (0767B)passi: hoc isti meruere passuri. Hos nobis Domine facito esse patronos: quos fecisti esse magistros. Ut eorum obtentu: venie nostre suffragia sentiamus: quorum ducatu gratie tue instituta suscepimus. In Petro peccatorum nostrorum numerum amplificate modus remissionis excedat: in Paulo venam obstructam postridie: Christi sermone lumine nobis veritatis aperiat. In illo nobis prestetur nutantis seculi fluctibus non demergi: in isto antiqui serpentis morsibus non noceri. Ut nec naufragio malorum perditi: nec veneno vipereo sauciati. Eodem auctore salvemur: quo ille undas superavit: hic viperas.
R\. Amen.
Post nomina. Oratio. Deus qui Apostolis tuis: (0767C)quorum hodie solennitate gaudemus: in sorte sanctificationis electis clariora nomina tu dedisti. Cum et ille Petrus diceretur: hic Paulus. Ille indito sibi vocabulo usus est: hic mutato: eorum nobis oratione ac favore concede: ut a natura utero segregati vim carnis et sanguinis superantes: facta habeamus fidelium: qui nomina tuorum accepimus filiorum. Ut in nobis et spiritalis addatur ambitus: et carnalis mutetur affectus. Quibus mereamur Sacerdotalium possidere instrumenta virtutum: qui permittimur officia electorum agere Sacerdotum. Has quoque Catholicorum oblationes: velut de captura et manu Petri pulmentarium tibi Christe gratifica: et quasi (0768A)ex ore Pauli: cui loqui dignatus es benedictione ditifica. Omnibus eorum interventu salutaris leticie causa prestetur: cunctosque necessaria ad Deum conversione convertendos ille pascat semper: hic doceat. Cum equalis gratie vicario munere: et ille sic possit: et iste sic pascere. Pro spiritibus etiam defunctorum: quorum nomina ore prolata sunt recitantium: utique pro culpis apud te intercessores existant.
R\. Amen.
Ad pacem. Oratio. Omnipotens conditor et redemptor: qui ad conversionem gentium et penitentium reconciliationem: duo magna luminaria Pauli litteras: et Petri lachrymas posuisti: ut gratia tua nec illum persecutio: quam amor legis intulerat: nec (0768B)istum negatio: quam timor mortis exegerat: faceret alienos. Da quesumus resipiscere post ignorantiam: flere post culpas: gratiam recuperare post lachrymas. Asserat apud indulgentiam tuam errantium causas et Paulus: cui non obfuit quod nescivit: et Petrus cui non impediit: quod negavit. Potest nos misericordia tua sic sanare: 336 ut vulnera inlata non pareant. Sic restaurare: ut elisos nos adversarius noster fuisse non gaudeat: sic integros facere: ut fortiores expertos esse debiles non agnoscat. Valeat majestas tua absolutis nobis: etiam conscientiam delere peccati: si penam noluerit servare supplicii. Concordiam conferre unanimitatis: et pacem tempori largiri presenti. In te efficere charitate connexos: et a mundi scandalis te propugnante remotos. (0768C)R\. Amen.
Inlatio. Dignum et justum est: omnipotens Pater: nos tibi ingentes agere gratias: pro multiplici Apostolorum Petri et Pauli gloria: quam eis per diversas munerum distributiones larga satis pietate donasti. Quos et unigeniti tui discipulos: et gentium fecisti esse magistros. Qui ob Evangelii predicationem cum celorum preficiantur in regnis: carcerum clauduntur angustiis. Potestatem accipiunt peccata solvendi: et ferri vinculis alligantur. Sanitatem donant: et egritudines portant. Demonibus imperant: et ab hominibus flagellantur. Mortes fugant: et fugiunt persequentes. Super mare ambulant: et in (0769A)labore desudant. Montes verbo transferunt: et propriis victum manibus querunt. Judicaturi Angelos: in questionem mittuntur. Cum Deo vivunt: in mundo periclitantur. Postremo Christus eis serviens pedes lavat: et facies eorum blasfemantium manus alapis collaphizat. Nihil sustinentibus pene defuit ad tolerantiam: nihil superantibus victorie non adfuit ad coronam. Si recurramus: quot ad testificandam fidei veritatem erumnarum pertulerint in tormentis frequenter suis: superfuere Martyribus. Si in mirabilibus: hoc per Christum fecere: quod Christus. Si in passionibus: hoc sustinuerunt illi necessitate mortali: quod ille voluntate moriendi. Isti ejus viribus: ille suis. Probantes doctrine auctoritatem similitudine: non equalitate doctoris. Implevit (0769B)Petrus suo tempore: quod promiserat ante tempus. Posuit animam suam pro illo: quem se non crediderat negaturum. Quia ad ardue sponsionis celeritatem nimia charitate preventus non intellexit servum pro Domino dare non posse: quod pro servo ante Dominus non dedisset. Similiter non renuit crucifigi: sed equaliter non presumpsit appendi. Obiit ille rectus: iste subjectus. Ille ut majestatem ascendentis sublimitate proferret: iste ut fragilitatem (0770A)descendentis humilitate monstraret. Nec Paulus affectu minor meminit: quem sibi arrogaverat dicens: mihi vivere Christus est: et mori lucrum. Gaudet insanientis ictibus percussoris: domitas jugo Christo offerre cervices: et pro corporis sui capite: dare corporis sui caput. Diviserunt sibi passionis Dominice vestimentum duo milites Dei: unus in patibulo: alter in gladio. Petrus in transfixione: Paulus in sanguine. His igitur dispari mortis genere: non dispari moriendi amore perfunctis. Exultet in eorum doctrinis Ecclesia Catholica: in exequiis religiositas universa: in memoriis Urbs Romana: in patrociniis omnis anima christiana. Hec autem omnia tu Domine operaris: qui a Prophetis demonstraris: ab Angelis adoraris: et in omni seculo Apostolorum (0770B)lumine declararis. Cui merito omnes Angeli et Archangeli non cessant clamare quotidie ita dicentes. R\. Sanctus.
Post Sanctus. Osanna in excelsis: idem excelse in excelsis. Idem humilis in terrenis Christe Fili Dei. Qui nebulosa magice artis in Symonis presumptione prestigia: Apostolice concertationis veritate prodita destruxisti. Quem frustra celorum ascensum aeris mollitionibus appetentem: decepta (0771A)demonum inlusione jactantia altius extulit: gravius elidendum. Ut quo eum paulo longius sursum volandi audacia permissa sustolleret: multo validius in deorsum volantis insania dimissa disrumperet. Nescientem utique quod nisi laudatam Petri confessionem: nisi creditam Pauli fidem teneret: celi cujus claves Petrus habebat: et cujus Paulus intima penetraverat: januam non intraret. Immemor etiam illius servitutis atque censure: qui Ananiam et Saffiram 337 Sancto Spiritui mentientes prevaricationis et perfidie reos presentis mortis animadversione damnavit. Paris quoque Pauli in Evangelio potestatis ignarus: qui doctrine sue contradicentem Elimam magum: justa protinus cecitate percussit: et seducentem Pithonis garrulum spiritum: imperata (0771B)illico descensione migravit. Totum illis celestium athletarum viribus pro Jesu nomine: pro Salvatoris divinitate: pro Christi insinuatione pugnantibus: divina est clementia prestitutum. Quia ipse est Dominus ac redemptor eternus.
Post pridie. Oratio. Ob arcana mysterii tui Jesu Christe Deus noster a te conlata inspiratione poscentes: deficit in contuitu acies: in intellectu visus: in relatione virtus: in narratione sermo. Quis enim abs te convenienter qui possit dicere supereminentem charitatem: qua nos dignatus es redimere: qua ut ita dicam humili compulsus es incarnari descensione: qua electos jussisti Apostolos omnibus ad salutiferam nationibus mittere conversionem: qua eminentiores Discipulis ceteris Petrum voluisti et Paulum efficere. (0771C)Sed quia hec immensa in dignitate vite: et nature (0772A)corruptione digne non possumus replicare: presentis solennitatis officio: tuam omnipotens inestimabilem poscimus pietatem ut favore gemino Apostolorum tuorum patronorum scilicet nostrorum: acceptum habeas et efficias ratum hujus oblatum diei sacrificium. Quod sacratissima illa inarbitrabili gratia ita digneris inlustrare: ut omnium percipientium receptum in pectoribus: sit in peccaminum expiatione: in mentis et corporis incolumitate: in hujus periculosissime vite custodia et munitione. R\. Amen.
Ad orationem Dominicam
Preciosam in conspectu tuo Domine mortem Sanctorum Apostolorum tuorum Petri et Pauli: annuis recursibus honorantes: damus gloriam laudi tue: quia luminaria preciosa a te vero lumine indeficiente (0772B)succensa: non solum dum leguntur: sed dum coluntur inlustrant. Quia hi sunt duo olive: et duo candelabra aurea in conspectu tuo: atque in universam terram exiit sermo oris eorum: quorum intercessionis exoratus: dum suscipis devotionis officium: precum quesumus largiaris effectum: dum clamaverimus e terris. Pater noster.
Dicat Presbyter. Humiliate vos benedictioni. Dominus sit semper vobiscum.
R\. Et cum.
Benedictio. Omnipotens Deus qui omne remedium pietatis tribuit miseris: det vobis Petri lachrymis emundari ab omnibus culpe contagiis. R\. Amen. Concedat doctrine Pauli: suscipere vos sapientiam verbi. R\. Amen. Ut ille per penitentiam: iste per (0772C)doctrinam faciat vos pervenire ad vitam eternam. (0773A)R\. Amen. Ipso prestante et auxiliante: qui in Trinitate perfecta unus Deus vivit et regnat in secula seculorum. R\. Amen. Dominus sit semper vobiscum. R\. Et cum.
Dicat Chorus. Gustate.
Com. Refecti Christi corpore. Quere in festo Corporis Christi. Fol. 267.
Oratio. Domine Jesu Christe qui Petrum et Paulum viriliter certantes: unum cruce: alterum gladio dignatus es consecrare: ut pro amore tui nominis fida dilectione: et ille crucis exitium: et hic gladii susciperet ictum: da nobis ut similiter dilectionem suam sequentes: et per Petrum crucis intremus secretum: et per Paulum spiritualis verbi semper gladio (0773B)muniamur. Quo et per crucem Christi: cruciatus evadamus inferni: et per gladium spiritus penetremus abdita celi. R\. Amen. Per misericordiam tuam Deus noster etc. Dominus sit semper vobiscum. R\. Et eum. Solennia completa sunt in nomine Domini nostri Jesu Christi. Votum nostrum sit acceptum cum pace. R\. Deo gratias.
Commemoratio Sancti Pauli.
Quere in natale unius Martyris. Fol. 421.
(0774A)Octava Sancti Johannis Baptiste
Omnia dicantur ut in die. Fol. 330.
Visitatio Sancte Elisabeth:
Omnia dicantur ut in Assumptione. Fol. 361.
Processi et Martiniani Martyrum:
Omnia dicantur plurimorum Martyrum. Fol. 430.
Octava Apostolorum Petri et Pauli:
Omnia dicantur ut in die. Fol. 334.
Marcialis Episcopi:
Omnia dicantur unius Confessoris Pontificis. Fol. 432.
338 Octava Visitationis:
Omnia dicantur ut in die. Fol. 361.
Septem fratrum Martyrum:
Omnia dicantur plurimorum Martyrum. Fol. 430.
Translatio Sancti Benedicti:
(0774B)Omnia dicantur unius Confessoris. Fol. 432.
In festo Sancte Marciane Virginis et Martyris. Ad Missam. Officium.
Omnia mandata tua ego custodivi Domine: sine causa persecuti sunt me: adjuva me: alleluja: alleluja: alleluja. V\. Eructavit cor meum verbum bonum: dico ego opera mea Regi. P. Sine causa. V\. Gloria et honor Patri: et Filio: et Spiritui Sancto in secula seculorum: amen. P. Sine.
(0775A)Oratio. Domine Jesu Christe: cui Virgo et Martyr Marciana et integritate jungitur: et sanguine sociatur: dum tibi et castimoniam vovit: et pro te sanguinem fudit: presta famulis supplicantibus: ut expiati a peccatis: tibi ita adhereamus: ne a te ulterius recedamus. R\. Amen. Per misericordiam tuam Deus noster, etc. Dominus sit semper vobiscum. R\. Et cum.
Lectio libri Esaye prophete ( Cap. LIIII).
R\. Deo gratias.
Hec dicit Dominus: lauda sterilis que non paris decanta laudem et hymnum que non pariebas. Quoniam multe filie deserte magis quam ejus que habet virum: dicit Dominus. Dilata locum tentorii tui: et pelles tabernaculorum tuorum extende: ne parcas. (0775B)Longos fac funiculos tuos: et clavos tuos consolida. Ad dexteram enim tuam: et ad levam penetrabis: et semen tuum gentes possidebit: et civitates desertas hereditabit. Noli timere quia non confunderis: neque erubesces. Non enim te pudebit: quia confusiones adolescentie tue oblivisceris: et obprobrium viduitatis tue non recordaberis amplius. Quia dominabitur tui qui fecit te: Dominus exercituum nomen ejus: et redemptor tuus sanctus Israel: Deus omnis terre vocabitur. Quia ut mulierem derelictam et merentem spiritu vocavit te Dominus: et uxorem ab adolescente abjectam dixit Dominus Deus tuus. Ad punctum in modico dereliqui te: et in miserationibus magnis congregabo te. In momento indignationis mee abscondam faciem meam parumper a te: et in (0775C)misericordia sempiterna misertus sum tui: dixit redemptor eternus sanctus Israel Dominus omnipotens. R\. Amen. Dominus sit semper vobiscum. R\. Et cum.
Psallendo. Psalmum dicam nomini tuo Deus in secula: ut reddam vota mea de die in diem. V\. Quia factus es spes mea: turris fortitudinis a facie inimici: habitabo in tabernaculo tuo Deus in secula. P. Ut reddam. Dicat Presb. Silentium facite.
Sequentia Epistole Pauli Apostoli ad Ephesios ( Cap. II).
R\. Deo gratias.
Fratres: vos qui aliquando eratis longe: facti estis prope in sanguine Christi. Ipse est enim pax nostra: qui fecit utraque unum: et medium parietem macerie (0775D)sepis solvens inimicitias in carne sua. Legem mandatorum decretis evacuans: ut duos condat in semetipsum: in unum novum hominem faciens pacem: et reconcilians ambos in uno corpore Deo per crucem interficiens inimicitiam in semetipsum: et (0776A)veniens evangelizavit pacem vobis: qui longe fuistis: et pacem his qui prope. Quoniam per ipsum habemus accessum ambo in uno spiritu ad patrem. Ergo jam non estis hospites et advene: sed estis cives sanctorum et domestici Dei. Superedificati super fundamentum Apostolorum: et prophetarum: ipso summo angulari lapide Christo Jesu: in quo omnis edificatio constructa crescit in templum sanctum in Domino. In quo et vos coedificamini in habitaculum Dei in Spiritu Sancto. R\. Amen.
Evangelium. Dominus noster Jesus Christus cum esset in Bethania. Quere in commune unius Virginis. Fol. 436.
Dicat Presb. Dominus sit semper vobiscum. R\. Et cum spiritu.
(0776B)Lauda. Alleluja. V\. Nequando rapiat ut leo animam meam: dum non est qui redimat: neque qui salvum faciat. P. Alleluja.
Sacrificium. Alleluja. Magna facta es et preclara filia Syon in universa terra: alleluja. V\. Alleluja: benedicta tu a Deo tuo in omni tabernaculo Jacob: tu gloria Hierusalem: tu leticia Israel: tu honorificentia populi tui. P. In universa terra: alleluja.
Missa. Fortissimum auxiliatorem debellantium: eternorum conlatorem bonorum: Jesum Christum Dominum nostrum 339 continua supplicatione fratres charissimi imploremus: cui ad prestandum donum glorie nec exercituum adversitas impedit sexum: sed consummatio tota prestanti in potestate ipsius redundat conlatoris ac Domini. Qui ad celorum (0776C)regna conscendere nos provocans: tam castitatis mundicieque doctrinam: quam Martyrum nobis prebuerunt gloriosa exempla. Hic namque ita ex utero virginali progressus matrem post suum egressum custodivit intactam: ut caro que sancta foret perpetuam de qua precesserat virginem servaret et sanctam. Et que sanctior utique futura erat post partum: sanctitatis antea in se haberet commercium. Cujus hec quoque sacrata celebs: imitabilem cursum divino amore costodiens vim virilem suo in pectore gestans: illi concupivit equari virginitate: que genuit cum: qui corporali pro nobis interemptus est passione. Nos ergo humiles et abjecti qui nostre fragilitatis incuria: hujus sumus impares dono: quibus de actu nulla est audacia: saltim de penitentia: (0776D)ut aliqua sit ejus intercessione fiducia: flebili cordis affectu Domino unanimes supplicemus: ut quia nos speramus de nostris malis suppliciorum perpeti penam: de illius nobis sentiamus postulatione indultam esse criminum veniam. Et qui nostrorum scelerum (0777A)admissione premimur: per ipsius interventum apud Deum cujus amore tormenta sustinuit: remissione peccatorum aliquantula sublevemur. R\. Amen.
Alia Oratio. Domine Deus Jesu Christi Domini nostri ante cuncta principia genitor: et in fine seculi demonstrator: te supplices humili imploratione precamur: ut nobis in hunc diem sacratum Virginis tue Marciane collectis: nulla diabolice fraudis inlecebrosa inruptio subrepat: ut que vim sue carnis vincendo: sexum meruit transgredi genitalem: nos quoque sua tibi faciat esse placabiles prece: et que per carnis sue contemptum amori conexa est tuo: nos suo adsociet te miserante consortio. Queve triumphalem palmam adepta et sui sanguinis effusione: pro nobis apud te suffragetur in judicii futuri (0777B)examine. Ut nos debita non puniamur ex pena: qui ejus suffragio: nostraque te placari credimus obsequela. R\. Amen.
Post nomina. Oratio. Unigenite Dei fili: qui beatissimam famulam tuam Marcianam gemina muneris claritate vestisti: ut et virginitatis enitesceret merito: et martyriali adtolleretur triumpho: prebe eam suffragatricem esse mortalibus cunctis: que merito sui letatur in celis. Quo per eam et vivis et defunctis commoda tribuas: per quam nobis exempla castitatis insinuas. R\. Amen.
Ad pacem. Oratio. Domine Jesu Christe ineffabilis pulcritudo justicie: qui inter lilia pasceris: et blandissimis delectaris Virginum choris: qui desponsatam tibi Marcianam fortissimam Virginem: tanto (0777C)charitatis amore junxisti: ut eam tibi et Virginem et Martyrem consecrares: presta ut sicut illa in paradiso tuo: immarcescibilibus sanctimonie tue atque martyrii sertis coronata triumphat: ita nos assiduo ejus patrocinio: a conluvionibus peccatorum: et inlecebris carnalibus abstrahas: ac defendas. Et sic tibi acceptos efficias: ut eterne indulgentie compotes reddas: et pacis tue muneribus glorificandos adtollas. R\. Amen.
Inlatio. Dignum et justum est: vere satis justum et pulcrum est: nos semper te in tuis operibus conlaudare: eterne Deus Pater omnipotens. Et cum non sit equum: ut pro sancta tua gloria a pollutis labiis nomineris: justum tamen est: ut nec etatis nec sexus infirmitas pro tuis immensis rebus: a tuis (0777D)unquam debeat conticescere laudibus. Qui inter omnia que in hujus mundi officium libens creasti: hominem solum gloriosis tuis manibus ita formare jussisti: ut tue quoque similitudinis dignabili eum faceres pietate conformem. Ut ille interior habitus: qui ea quoque similitudine est formatus: quem ipse voluisti esse intelligibilem: sensum exteriorem suum habitu tuo faceret obedire precepto: et nequaquam uterque de tua laude sileret affectus: dum (0778A)utriusque in tua jussa servitutis 340 consummaretur profectus. Quem utique interiorem: sic tibi beata famula tua Marciana custodivit: ut feceras: ut non in aliquo degenerari in se pateretur: nec minui quod crearas: filioque tuo Christo Domino nostro se preparans: in ejus dilectione quam semper habuit roborata permansit. Quia illi se maluit moriendo conjungi: cui se vivendo obtulerat consecrari. Ipsi sponsalicium custodivit pudorem: cujus semper concupivit habere amorem. Ipsi suam servavit fidem: cui se totam commisit devotione. Ipsius desideravit ornatum: cujus in se tenuit semper amplexum. Que parata ad nuptias venturum sperabat sponsum: adepta est celestis thalami dignitatem per suum martyrium. Dumque eum quem diligebat (0778B)anima ejus quereret: ab eo qui eam in promptuarium paradisi introduceret inventa est: perfectam in se Christi retinens charitatem. Sanguinem non trepidavit suum effundi in terram: dum creatorem suum interioribus oculis videret: intenta extenditur ligno: uritur flammis: laceratur ungulis. Stat mente immobilis: voce fortis: patientia laudabilis. De preteritis gaudens: de futuris exultans: de pollicitis non formidans. Comtemnit temporalem penam: dum gloriam indubitata fide sperat sempiternam. Implentur sancto cruore ulcera laterum loca: et per sulcos cruentos: liquor decurrit immaculatus. Dumque ad similitudinem crucis exaltatur ligno: animam immobiliter fixam tenet semper in celo. Merito ergo credimus hujus intercessu: (0778C)tuum adesse nobis placatum aspectum: quem nostris sceleribus nobis fecimus esse adversum: per quod rogamus te: ut malorum nostrorum non recorderis: dum pietate solita parcis. Dumque ipsius semper ante te habes humillimas preces: quibus pro nobis incessabiliter exoraris: per ipsum Dominum nostrum Jesum Christum filium tuum: ante cujus conspectum sanctorum millia Angelorum: multitudo Martyrum: chorus Virginum: omnisque innumerabilis gloriosus exercitus beatorum non cessat clamare: ita dicentes. R\. Sanctus.
Post Sanctus. Vere sanctus: semper et benedictus: Dominus Deus omnipotens: quem previdebant sancte tue in suo conspectu: qui a dextris eis fuisti ne unquam commoverentur. Teque laudat indesinenter (0778D)omnis exercitus Angelorum. Quia tu es Dominus ac Redemptor eternus.
Post pridie. Oratio. Te omnipotens Deus petimus et rogamus: ut hanc oblationem quam tibi fideli et humili devotione offerimus: suscipere digneris propicius: et nostre servitutis libamina ipse tibi facias acceptabilia. Ut accepta per mysterium Sancti Spiritus: nobis sanctificata tribuas postulatione nostre salutis: et in odorem suavitatis accipias.
(0779A)R\. Amen.
Ad orationem Dominicam.
Domine Jesu Christe: cujus imperio rabidissimus leo non solum a nece beatissime Virginis et Martyris Marciane abstinuit: verum etiam feritate deposita: ejus immaculatum corpus adortus: moleste contigere non presumit: presta nobis: ut nitore tui Sancti Spiritus circumsepti: immanitatem non timeamus leonis horrendi: sed majestatis tue virtute repulsus: semper a lesione nostra maneat alienus. Pater noster qui es in celis.
Dicat Presb. Humiliate vos benedictioni. Dominus sit semper vobiscum. R\. Et cum spiritu.
Benedictio. Omnipotens Dominus qui beatissimam Marcianam virginitatis ac pudicitie ornavit decore: (0779B)mentes vestras expiet ab omni mundane corruptionis contagione. R\. Amen. Quique huic prestitit suam idolis non inclinare cervicem: a vobis arceat spirituum malignorum tentationem. R\. Amen. Ac sicut illa post victoriam letatur cum Christo: ita eadem patrocinante: reduces vos gaudeatis fieri paradiso. R\. Amen. Per misericordiam ipsius Dei nostri etc. Dominus sit semper vobiscum.
R\. Et.
Dicat Chorus. Gustate.
Com. Refecti Christi corpore. Quere in festo Corporis Christi. fol. 267.
341 Oratio. Domine Jesu Christe: qui beatissimam Marcianam tibi testem: et Virginem consecrasti: dum te incorrupta sequitur: et pro te gloriosa (0779C)mactatur: annue nobis precibus ejus: ut eadem suffragante quamvis indigni: et castitatis donum: et confessionis mereamur obtinere triumphum. R\. Amen. Per misericordiam tuam Deus noster etc. Dominus sit semper vobiscum. R\. Et cum. Missa acta est: in nomine Domini nostri Jesu Christi perficiamus cum pace. R\. Deo gratias.
Margarite Virginis:(0780A) Omnia dicantur unius Virginis. Folio 436.
Quirici Martyris:
Omnia dicantur unius Martyris. Folio 430.
Triumphum Sancte Crucis:
Omnia dicantur ut in Exaltatione. Folio 375.
Alexii Confessoris:
Omnia dicantur unius Confessoris. Folio 432.
IN FESTO SANCTARUM VIRGINUM ET MARTYRUM JUSTE ET RUFINE. Ad Missam. Officium.
Vias tuas Domine pronunciavi: et exaudisti me. Docuisti me Deus justificationes tuas. Viam mandatorum tuorum cucurri Domine. V\. Servavi mandata tua: et testimonia tua Domine. Quia omnes vie mee (0780B)in conspectu tuo. P. Viam mandatorum tuorum. V\. Gloria et honor Patri: et Filio: et Spiritui Sancto: in secula seculorum. Amen. P. Viam mandatorum.
Oratio. Domine Deus: qui Virginibus tuis glorioso amore flagrantibus concessisti: et querere et invenire dilectum: concede nobis ita a te ferventiori voto exquirere: ut fructuosi laboris mereamur reportare mercedem. R\. Amen. Per misericordiam tuam Deus noster etc. Dominus sit semper vobiscum. R\. Et cum spiritu.
Lectio Libri Proverbiorum Salomonis ( Cap. XXXI).
R\. Deo gratias.
Mulierem fortem quis inveniet? Procul et de ultimis finibus precium ejus. Confidit in ea cor viri sui: et spoliis ejus non indigebit. Reddet ei bonum et non (0780C)malum: omnibus diebus vite sue. Quesivit lanam: et linum: et operata est consilio manuum suarum: facta est quasi navis institoris: de longe portans panem suum. Et de nocte surrexit: deditque predam domesticis suis et cibaria ancillis suis. Consideravit agrum et emit eum. De fructu manuum suarum plantavit vineam. Accinxit fortiter lumbos suos: et roboravit (0781A)brachium suum. Gustavit: quia bona est negociatio ejus: non extinguetur in nocte lucerna illius. Manum suam misit ad fortia: et digiti ejus apprehenderunt fusum. Manum suam aperuit inopi: et palmas suas extendit ad pauperes. Non timebit domui sue a frigoribus nivis: omnes enim domestici ejus vestiti sunt duplicibus. Stragulatam vestem fecit sibi: byssus et purpura indumentum ejus. Nobilis in portis vir ejus: quando sederit cum senatoribus terre. Syndonem fecit et vendidit: et cingulum tradidit Chananeo. Fortitudo et decor indumentum ejus: et ridebit in die novissimo. Os suum aperuit sapientie: et lex clementie in lingua ejus. Consideravit semitas domus sue: et panem ociosa non comedit. Surrexerunt filii ejus: et beatissimam predicaverunt: (0781B)vir ejus et laudavit eam. Multe filie congregaverunt divitias: tu autem supergressa es universas. Fallax gratia: et vana est pulcritudo: mulier timens Deum ipsa laudabitur. Date ei de fructu manuum suarum: et laudent eam in portis opera ejus. R\. Amen.
Dicat Presbiter. Dominus sit semper vobiscum. R\. Et cum.
Psallendo. Spem dedisti mihi Domine: hec me consolata est in humilitate mea. V\. Superbi inique agebant usquequaque: a lege autem tua non declinavi. Memor fui judiciorum tuorum Domine. P. In humilitate. Dicat Presb. Silentium facite.
Sequentia Epistole Pauli Apostoli ad Corinthios ( II, cap. III).
(0781C)R\. Deo gratias.
Fratres. Habemus thesaurum istum in vasis fictilibus: ut sublimitas sit virtutis Dei: et non ex nobis. In omnibus tribulationem patimur: sed non angustiamur. Aporiamur: sed non destituimur. Persecutionem patimur: sed non derelinquimur. Dejicimur: sed non perimus. Semper mortificationem Jesu Christi in corpore nostro circumferentes: ut et vita Jesu in cordibus nostris manifestetur. Semper enim nos qui vivimus: in mortem tradimur Jesu: ut et vita Jesu manifestetur in 342 carne nostra mortali. Ergo mors in nobis operatur: vita autem in vobis. Habentes autem eundem spiritum fidei sicut scriptum est. Credidi propter quod locutus sum. Et (0781D)nos credimus: propter quod et loquimur. Scientes quoniam qui suscitavit Dominum Jesum: et nos cum Jesu suscitabit: et constituet vobiscum. Omnia enim propter vos: ut gratia abundans per multas gratiarum actiones abundet in gloriam Dei. R\. Amen.
Lectio Sancti Evangelii secundum Lucam ( Cap. VII).
In illis diebus. Rogabat Jesum quidam Phariseus: ut manducaret cum illo. Et ingressus domum discubuit. Et ecce mulier que erat in civitate peccatrix: (0782A)ut cognovit quod accubuit in domo Pharisei: attulit alabastrum unguenti. Et stans retro secus pedes ejus: lachrymis cepit rigare pedes ejus: et capillis capitis sui tergebat: et osculabatur pedes ejus: et unguento ungebat. Videns autem Phariseus qui vocaverat eum: ait intra se dicens. Hic si esset propheta sciret utique: que et qualis est mulier: que tangit eum: quia peccatrix est. Et respondens Jesus dixit ad illum. Symon habeo tibi aliquid dicere. At ille ait. Magister dic: et ait. Duo debitores erant cuidam feneratori: unus debebat denarios quingentos: alius quinquaginta. Non habentibus illis unde reddere: donavit utrisque. Quis ergo eum plus diligit? Respondens Symon dixit. Estimo: quia is cui plus donavit. At ille dixit. Recte judicasti. Et conversus ad mulierem: (0782B)dixit Symoni. Vides hanc mulierem? intravi in domum tuam: aquam pedibus meis non dedisti. Hec autem lachrymis cepit rigare pedes meos: et capillis suis tersit. Osculum mihi non dedisti: hec autem ex quo intravit non cessavit osculari pedes meos. Oleo caput meum non unxisti: hec autem unguento unxit pedes meos. Propter quod dico tibi: remittuntur ei peccata multa: quoniam dilexit multum. Cui autem minus dimittitur: minus diligit. Dixit autem ad illam. Remittuntur tibi peccata. Et ceperunt qui simul accumbebant dicere intra se. Quis est hic qui etiam peccata dimittit? Dixit autem ad mulierem. Fides tua te salvam fecit: vade in pace.
R\. Amen.
Dicat Presb. Dominus sit semper vobiscum. R\. (0782C)Et cum.
Lauda. Alleluja. V\. Audi filia et vide. Quia concupivit rex pulcritudinem tuam: et ipse est Deus tuus. P. Alleluja.
Sacrificium. Offerte Domino holocausta et victimas vestras: decimas et primicias manuum vestrarum. Vota atque donaria: et comedite ex eis in conspectu Domini: ut benedicat vobis Dominus Deus vester. Alleluja. V\. Locutus est Dominus ad Moysen dicens: dabo populo meo talem habere mentem: ut timeant me: et custodiant mandata mea: ut benedicam eis et filiis eorum in sempiternum. Vade et dic eis: revertimini in tentoria vestra. P. Ut benedicam.
Missa. Devotissimam Sanctarum ac beatissimarum (0782D)Juste et Rufine Martyrum fidem: et famosissimas toto orbe victorias: debito honore venerantes: omni studio: omnique intentione fratres charissimi: Domino supplicemus: ut sicuti earum virtutibus gratulamur: ita earum meritis copulemur. Neque nos desperare fas est: Martyris nobis gloriam quocumque in tempore posse donari. Namque iracundiam cohibuisse: insignis patientie est. Cupiditatem frenasse: palma virtutis est: et domuisse libidinem: corona martyrii est. Per hec diabolus infestat: (0783A)per que ista congreditur: et plerumque plus valent occulta bella: quam publica: dum minus erubescunt: qui sine teste operantur. Ad celum itaque oculos animumque vertamus: ut omnipotens Deus inspector cordis: cognitorque secreti cum probaverit sibi placere que querimus: voluntatem nostram sibi pro passione deputet: et vota pro sanguine. R\. Amen.
Alia Oratio. Penitentia tuarum Domine Martyrum Juste et Rufine solennia celebrantes: que mercimonio fictilium vasculorum contempto: usque passionis meruerunt gloriam pervenire. Te acclives oramus: ut per eas apud te nostra accipiatur oratio: quarum tu letatus es de triumpho. Per eas evincamus cupiditatis incendia: per quas 343 ipse tortoris (0783B)evincisti tormenta: ipsisque nos intercedentibus corrige: quarum te victorem ostendisti in passione. Ut que tibi per gloriam meritorum: effecta sunt vasa virtutum: unumquemque nostrum apud te obtineat vas suum absque contagione possidere peccaminum. R\. Amen.
Post nomina. Oratio. Deus qui nos per Apostolum tuum: propriis manibus victum querere precepisti: Sanctarum tuarum Juste et Rufine precibus spiritualem nobis attribue victum: et quotidianum pie miserationis subsidium. Ut he Virgines que suis manibus et proprie saluti: et indigentie provisores inopum extiterunt: suis suffragiis tam viventibus: quam defunctis congrua remedia largiantur. R\. Amen.
Ad pacem. Oratio. Piissime redemptor et conditor (0783C)universe carnis: qui patientia tuarum Virginum antiqui hostis contrivisti impulsum: qui predictarum Virginum societatem turbare ex confractione ausus est vasculorum. Dona nobis: ut immobiliter in nostris cordibus radicatus: infirma nostri corporis vasa fortia tibi per charitatis opera preparemus. Quo nullis elisi jaculis adversantis: indisrupte utamur muneribus pacis. Respondetur. Amen.
Inlatio. Dignum et justum est: equum vere et salutare est: nos tibi immensas agere gratias omnipotens Trinitas Deus. Qui Martyres tuas Justam et Rufinam: victum sibi fictili commercio requirentes: nefandis idolorum monstruosis dissipatisque: in honorem vanitatis offerri sibi proposita perurgebant: eo usque ad consummationem martyrii perduxisti: ut (0783D)nulla insultantis caterve procacitate turbate: nullaque infestantis principis ferocitate mollite: postremo nec ipsis penarum atrocitatibus fracte: te verum Deum integra confessione clamando infula passionis ornate: regnis celestibus jungerentur. Magnum est itaque ante passionem miraculum jam premissum: frangebantur itaque vasa fictilia: quia celestia per passionem parabantur immutari Martyrum membra. Non fuit temporale commercium: sed Christi negotium per quod possent emere sancte Martyres celum. (0784A)O furor sacrilegus: se ipsum frangit in vasis: et Christum facit triumphare de sanctis. Sua non sunt membra que destruxit quas cum eterno Rege vivere facit: cum punit. Ecce innumerabiles non cessant pene: et sanctissime Virgines Christum Dominum non desinunt preconari. Coctum adversarius dissipat: quod a sanctissimis Virginibus venditur lutum. Quia crudelitatem suam gehenne parabat exurendam incendio. Talis atrocitas veritate devincitur: sic humilitas cum superbia dimicat. Ut martyres quas per confractionem vasculorum diabolus condemnasse credebat: perfecta consummatione martyrii celeste regnum obtinuisse gemescat. Unde majestatem tuam Pater piissime postulamus: ut quemadmodum illis in congressione passionis donasti constantiam: ita et (0784B)nos vitiis carnalibus expiatos facias pervenire ad gaudia sempiterna. Per Christum cui merito omnes Angeli non cessant clamare: ita dicentes. R\. Sanctus.
Post Sanctus. Vere sanctus: vere benedictus Dominus noster Jesus Christus filius tuus. Quem sacre Virgines Justa et Rufina: vite operibus pariles: sociaque passionis consummatione felices. Ex illo se questu pertenui fictilium vasculorum: vestierunt in paupere: collegerunt in hospite: satiarunt in sitiente. Sit igitur illi honor: et indefessa laudatio: qui horum munerum inspirator est pariter et susceptor. Cum ipse his se egere pronunciat: qui solus hec hominibus tribuenda inspirat. Ipse quippe horum inspirator: dum hic in membris suis pie reficitur: (0784C)donata donantibus post multiplici fenore: se retribuente largitur. Christus Dominus ac redemptor eternus.
Post pridie. Oratio. Ob honorem passionis famularum tuarum Juste et Rufine: has tibi Deus Pater hostias immolantes: precamur: ut illarum interventu: que se tibi vasa mundissima exhibuerunt: hoc tibi oblatum sanctifices holocaustum. Prestans supplicibus nobis: ut quarum mercimonio dudum saciasti inopiam: pauperum harum prece rata tibi efficias vota fidelium populorum.
R\. Amen.
344 Ad orationem Dominicam.
Fac nos eterne Deus: ut unusquisque nostrum: vas suum in honore et sanctificatione possideat: qui (0784D)Virgines tuas Justam et Rufinam ex questu fictilium vasculorum passionis perduxisti ad gloriam: quo emundatis conscientiis ad te proclamemus e terris. Pater noster.
Dicat Presb. Humiliate vos benedictioni. Dominus sit semper vobiscum. R\. Et cum spiritu.
Benedictio. Christus Dominus vos sibi placita efficiat vasa: qui Justam et Rufinam sibi efficit vasa mundissima. R\. Amen. Quique illas non passus est de fictilium vasculorum fractione tristari: nunquam (0785A)vos patiatur dissolutis compagibus interne mentis inludi. R\. Amen. Quo fortes corde et corpore: quarum nunc celebratis solemnia: perpetualiter percipiatis suffragia. R\. Amen. Per misericordiam ipsius Dei nostri etc. Dominus sit semper vobiscum. R\. Et cum.
Dicat Chorus. Gustate et videte.
Com. Refecti Christi corpore. Quere in fo. 267.
Oratio. Confirma in visceribus nostris misericordie tue munera omnipotens Deus: ad augendam fidem nostram: ad corroborandam spem: ad illuminandam scientiam: ad multiplicandam charitatem: ad conservandam corporis et anime puritatem. R\. Amen. Per misericordiam tuam Deus noster etc. Dominus sit semper vobiscum. R\. Et cum. Solennia (0785B)completa sunt in nomine Domini nostri Jesu Christi. Votum nostrum sit acceptum cum pace. R\. Deo gratias.
SANCTE RUFINE VIRGINIS. Ad Missam. Officium.
Omnia mandata tua. Oratio. Domine Jesu Christe cui Virgo et Martyr Rufina. Prophetia. Lauda sterilis. Require in Sancte Marciane. fo. 338.
Dicat Presb. Dominus sit semper vobiscum. R\. Et cum.
Psallendo. Letabor ego super eloquia tua Domine: sicut qui invenit spolia multa. V\. Iniquitatem odio habui: et abominatus sum: legem autem tuam (0785C)dilexi. P. Sicut qui invenit. Dicat Presb. Silentium facite.
Epistola. Qui statuit in corde suo. Quere in communi unius Virginis. folio 436.
Lectio sancti Evangelii secundum Lucam ( Cap. X).
In diebus illis Dominus noster Jesus Christus in quoddam castellum intravit: et mulier quedam Martha nomine excepit illum in domum suam: et huic erat soror Maria nomine: que etiam sedens secus pedes Domini: audiebat verbum illius. Martha autem satagebat circa frequens ministerium: que stetit et ait. Domine non est cure: eo quod solam reliquit me soror mea ministrare? Dic ergo illi: ut adjuvet me. Et respondens dixit illi Dominus. Martha Martha solicita es: et turbaris erga plurima: (0785D)porro unum est necessarium: Maria optimam partem elegit: que non auferetur ab ea. Et cum hec diceret: extollens vocem quedam mulier de turba dixit illi. Beatus venter qui te portavit: et ubera que tu suxisti. At ille dixit. Utique beati qui audiunt verbum Dei: et custodiunt illud. R\. Amen.
Dicat Presb. Dominus sit semper vobiscum. R\. Et cum.
(0786A)Lauda. Lauda anima mea Dominum: laudabo Dominum in vita mea: alleluja.
Sacrificium. Munera accepta erunt. Quere in Sancta Leocadia. fol. 416.
Missa. Adesto nunc precibus famulorum tuorum clementissime Deus: in hac celebritate gloriose Martyris tue Rufine: pro cujus invicto agone: tuis altaribus sacrificiorum libamina offerimus: et laudes cum exultatione cantamus. Tua est enim gratia: non solum viros: sed etiam feminas per fidei confessionem miris victoriis emicare: atque subacta nature conditione: hostem religionis agone justicie evincere. Hujus ergo in laudibus festisque solennibus: tuam clementiam flagitamus piissime Pater: ut adsit nobis in suffragium glorie ejus auxilium: perveniatque (0786B)nobis passio ejusdem ad veniam: que illam eternam comitatur ad gloriam.
R\. Amen.
Alia Oratio. Sacratissimam passionem Martyris tue Rufine: tempore recurso celebrantes eterne Deus: hujusmodi sacrificiis libamina tuis a te consecranda immolamus altaribus: invocantes clementiam tuam: ut 345 hoc sacrificium per intercessionem beatissime Martyris tue Rufine: repropiciationis nostre valeat coram te meritum obtinere. Atque ita pro nostris expiandis delictis: hujus libaminis ascendat oblatio: sicut Sancte tue Rufine per tolerantiam passionis: precessit gloriosa vocatio. R\. Amen.
(0786C)Post nomina. Recensitis nominibus Sanctorum fideliumque viventium: ac defunctorum: tuam summe Pater clementiam flagitamus: ut qui Sanctis tuis pro laboribus prestas coronam: defunctis conferas sortem quietis fidelibus repromissam: nobis quoque pietatis tue donum tribuas eternorum. R\. Amen.
Ad pacem. Hec est fratres charissimi Ecclesie lex: et Christiani nominis forma: Deo atque hominibus pace conjungi: corde copulari. Pax sit in ore: pax sit in voluntate: pax sit in moribus: ac temporibus nostris. Ut dum per concordie vinculum unum sumus: Martyris tue Rufine meritis justicie fructibus decoremur: et in compagem: connexionemque Christi corporis maneamus. R\. Amen.
Inlatio. Dignum et justum est: vere equum et (0786D)salutare est: nos tibi omnipotens Deus gratias agere: sacrificia spiritualia celebrare: per Dominum nostrum Jesum Christum filium tuum. Cujus ob amorem Martyr tua Rufina: tanto vigore certaminis claruit: ut oblata secum sui referentia ad palestram mirabilis prelii prestantior reperta viris: invicto agone consisteret: plus subjacens religioni: quam sexui. Imbecillitatem carnis exuperans constantia (0787A)mentis: cujus compar prelii gloriosaque non dissimilis Rufina Martyr pervenit ad premium passionis. Utreque paupercule mundo: sed divites celo. Nihil habentes: sed omnia possidentes: gestantes in vasis fictilibus thesaurum non corruptibilium metallorum: sed celestium premiorum. Ex fragili quodam hujus vite usu supernas mercantes divitias: ad passionem veloces: ad tolerantiam fortes: stadium mundi congresse: vires diaboli zelo fidei conciderunt. Non robore corporis: sed tue auxilio potestatis. Infirmitas quippe earum natura: inlustres coronas adepte sunt: quia nec fragilitas femine accessit: nec virtus in dolore devicit. Quarumcumque tanta extiterunt insignia laudis: ut eliso damonum simulacro: te Deum clara voce (0787B)predicarent mundo. Colendum te creatorem cunctorum ostenderent: et redemptorem confessione mirabili adtestarentur. Sequipedes Marie more comites extiterunt: contemnentes mundum et amantes Christum. Ille enim Apostolis denunciaverunt: Jesum ab inferis resurgentem: iste gentibus Christum in celis regnantem. Atque ita dum pari funguntur officio: pariter nunc conlectantur regno et merito. Per ipsum cui merito omnes Angeli non cessant clamare: ita dicentes. Sanctus.
Post Sanctus. Vere sanctus semper: et benedictus Dominus Deus omnipotens: quem previdebant Sancte tue in suo conspectu: qui a dextris eis fuisti: ne unquam commoverentur. Te laudat indesinenter omnis exercitus Angelorum. Quia ipse es (0787C)Dominus ac redemptor eternus.
Post pridie. Te omnipotens Deus petimus et rogamus: ut hanc oblationem: quam tibi fideli et humili devotione offerimus: suscipere digneris propicius: et nostre servitutis libamina: ipse tibi facias acceptabilia. Ut accepta per ministerium Sancti Spiritus nobis sanctificata: tribuas postulationem nostre salutis: in odoremque suavitatis accipias.
R\. Amen.
Ad Orationem Dominicam.
Oremus Patrem dilectissimi: sicut Magister docuit. (0788A)Amica et familiaris oratio est: Deum de suo rogare: ad aures ejus ascendere Christi orationem. Agnoscat Pater filii sui verba: dum precem fundimus: qui habitat intus in pectore: ipse sit et in voce: et cum ipsum habeamus apud Patrem advocatum pro peccatis nostris: quando peccatores pro delictis nostris petimus: advocati verba proclamemus: clamantes: atque ita dicentes. Pater noster.
Dicat Presbiter. Humiliate vos benedictioni. Dominus sit semper vobiscum. R\. Et cum.
Benedictio. Christus Dominus qui Virginem suam Rufinam: casto sibi desponsavit amore: indissolubiliter vos sibi per suam charitatem 346 adsociet. R\. Amen. Quique in illam virginitatis contulit donum: conferat in vobis sue gratie complementum. (0788B)R\. Amen. Ut qui virginitate caretis: ex meritis virginis Rufine potiamini gaudiis. R\. Amen. Per misericordiam ipsius Dei nostri etc. Dominus sit semper vobiscum. R\. Et.
Dicat Chorus. Gustate et videte.
Com. Refecti Christi corpore. Quere in festo Corporis Christi. fol. 267.
Oratio. Domine Jesu Christe: cui Virgo et Martyr Rufina: et integritate jungitur et sanguine sociatur: dum tibi et castimoniam vovit: et pro te sanguinem fudit: presta famulis supplicantibus: ut expiati a peccatis: tibi ita adhereamus: ne a te ulterius recedamus. R\. Amen.
Per misericordiam tuam Deus noster etc. Dominus (0788C)sit semper vobiscum. R\. Et cum. Missa acta est in nomine Domini nostri Jesu Christi: perficiamus cum pace. R\. Chorus. Deo gratias.
Marine Virginis:
Omnia dicantur unius Virginis precipue. fol. 436.
Margarite Virginis et Martyris:
Omnia dicantur unius Virginis ut supra.
Praxedis Virginis:
Omnia dicantur unius Virginis. fol. ut supra.