Migne Patrologia Latina Tomus 138
Orationes (Auctor incertus), J. P. Migne
cc_id: cps_2.AucInc.Oratio3, cc_idno: 9636
VIII KAL. OCTOBRIS. Pro conceptione S. Joannis Baptistae.
138.0903A|
¶
Oratio. Omnipotens sempiterne Deus, qui instituta legalia et sanctorum praeconia prophetarum in diebus conceptionis beati Baptistae Joannis implesti, praesta, quaesumus, ut cessantibus significationum figuris, ipsa sui manifestatione veritas eloquatur. Per, etc.
Secr. Da quaesumus, misericors Deus, ut mysticis Ecclesiae tuae beati Baptistae Joannis exordiis, et sacris erudita praeconiis ad iram venturi judicii declinandam dignos salutis fructus jugiter operetur. Per, etc.
Ad comm. Benedic, Domine, plebem tuam, et beati Joannis Baptistae deprecationibus confidentem 138.0903B| tribue consequi devotionis auxilium. Per, etc.
VIII. ID. OCTOBRIS. Sanctae reparatae virginis.
Concede quaesumus, Domine, fidelibus tuis digne sanctae Reparatae celebrare mysteria, ut qui ejus solemnia fideliter exequuntur, et hic experiantur auxilium, et aeternitatis effectibus apprehendant. Per, etc.
Secr. Haec dona, petimus Domine, placatus intende, et ut ipsi acceptabiles simus, sacrificium cordis contritione, haec hostia praecibus martyris tuae Reparatae tibi placita consecretur. Per, etc.
Comm. Haec nos communio gratiae tuae, petimus Domine, tibi reddat acceptos, et divinis mysteriis instauret nostra corda martyris tuae Reparatae commemoratio veneranda. Per, etc.
VIII KAL. NOVEMBRIS. S. Miniatis martyris. 138.0904A|
Oratio. Omnipotens sempiterne Deus, qui per gloriosa bella certaminis ad immortales triumphos martyres extulisti Miniatem et socios ejus, da cordibus nostris dignam pro eorum commemoratione laetitiam, ut quorum corpora pio amore celebramus, eorum precibus adjuvemur. Per, etc.
Secr. Salutare sacrificium, Domine, populus tuus semper exultet, quo et debitus honor sacris martyribus exhibetur, et sanctificationis tuae munus acquiritur. Per, etc.
Ad comm. Celebrantes martyrum tuorum Miniatis et sociorum ejus beatam passionem, ipsorum nobis, quaesumus, fiant intercessione salutaria in quorum natalitiis sunt exsultanter impleta. Per, etc.
ID. NOV. S. Britii confessoris. 138.0904B|
Propitiare, Domine, populo tuo, ut quem in frequentatione beati sacerdotis et confessoris tui Britii tribuis interesse, protectione perpetua semper facias esse securum. Per, etc.
Secr. Grata tibi sint quaesumus Domine, munera quae in beati sacerdotis et confessoris tui Britii commemoratione deferimus, obsecrantes, ut quae ore prosequimur, contingamus et mente. Per, etc.
Ad comm. Praesta, quaesumus, Domine, ut beati sacerdotis et confessoris tui Britii, cujus festivitatem celebramus, precibus indulgentiam sentiamus. Per, etc.