dies multos invaluit, donec iam longe Cabades profugisset. Porro quid foeminae factum sit, posteaquam patuit dolus, quasve dederit poenas, dicere certo nequeo, cum ipsi Persae multa varient hac in parte: quare his supersedeo.
Nusquam agnitus Cabades cum Seose ad Hunnos Ephthalitas pervenit: ubi ducta Regis filia in matrimonium, copias comparavit adeo validas, ut cum lis venienti in Persidem non ausi perduelles obsistere, alius alio dissipati sint. Ingresso autem Cabadi in Provinciam, cui Gusanastades praeerat, et quosdam e familiaribus alloquenti ista vox excidit Chanarangem creatum iri illum, qui eo die Persarum primus veniret, ac deferret coram obsequium. Vix haec protulerat, cum temere effutiisse poenituit, animum subeunte memoria legis Persicae, de non transferendo e domo quapiam Magistratu ullo ad alienos, sed ad quos iure gentilitio pertinuerit. Verebatur enim ne is, qui ad se primus adiret, Chanarangem haud attingeret cognatione, et rumpenda lex foret ad exsolvendam fidem. Haec secum cogitanti oblata facultas est liberandae:
