PROCOPII CAESARIENSIS
DE AEDIFICIIS DN. IUSTINIANI
LIBER III.
Ita quidem, ut in superiori libro exposui, Iustinianus Aug. orientem
operibus firmavit. Ego vero cum extructas ab ipso munitiones describere
coeperim ab imperii Romani limite, qui Persas contingit, haud alienum iudico ad
Armenios inde progredi, qui ab urbe Amida ad alteram usque Theodosiopolin
Persidem accolunt. Ac paranti mihi illius orae aedificia recensere, id rebus
omnibus antevertendum videtur, ut dicam qua ratione imperator noster
Armenios, vitam agentes in summo discrimine, ad illam, qua iam constantissime
gaudent, securitatem traduxerit. Hos enim subditos non tantum aedificiis,
sed circa res alias providentia servavit, uti mox literis prodam: verum paulo
altius petendum initium.