Haec pagina emendata est
Defuso pateris, et Laribus tuum
miscet numen, uti Græcia Castoris
et magni memor Herculis.
« Longas o utinam, dux bone, ferias
præstes Hesperiæ ! » dicimus integro
sicci mane die, dicimus uvidi,
cum sol Oceano subest
Dive, quem proles Niobea magnæ
Vindicem linguæ Tityosque raptor
Sensit, et Trojæ prope victor altæ
Phthius Achilles,
Ceteris maior, tibi miles inpar;
Filius quamvis Thetidis marinæ
Dardanas turris quateret tremenda
Cuspide pugnax;
