Pagina:Horace - Œuvres, trad. Leconte de Lisle, I.djvu/210

E Wikisource
Haec pagina emendata est




Sed dubius unde rumperet silentium,
          Misit Thyesteas preces :
« Venena magnum fas nefasque non valent
          Convertere humanam vicem ;
Diris agam vos ; dira detestatio
          Nulla expiatur victima.
Quin, ubi perire jussus exspiravero,
          Nocturnus occurram furor,
Petamque vultus umbra curvis unguibus,
          Quæ vis Deorum est Manium ;
Et inquietis assidens præcordiis,
          Pavore somnos auferam.
Vos turba vicatim, hinc et hinc saxis petens
          Contundet obscænas Anus ;
post insepulta membra different lupi
          Et Esquilinæ alites,
Neque hoc parentes, heu ! mihi superstites,
          Effugerit spectaculum. »