Pagina:Horace - Œuvres, trad. Leconte de Lisle, I.djvu/28

E Wikisource
Haec pagina emendata est



Arte materna rapidos morantem
Fluminum lapsus celeresque ventos,
Blandum et auritas fidibus canoris
          Ducere quercus.
Quid prius dicam solitis Parentis
Laudibus, qui res hominum ac Deorum,
Qui mare et terras, variisque mundum
          Temperat horis ?
Unde nil majus generatur ipso
Nec viget quidquam simile, aut secundum ;
Proximos illi tamen occupavit
          Pallas honores
Prœliis audax neque te silebo,
Liber, et sævis inimica virgo
Belluis ; nec te, metuende certa
          Phœbe sagitta.
Dicam et Alciden puerosque Ledæ,
Hunc equis, illum superare pugnis