Haec pagina emendata est
Et musa cordi est. Hinc tibi Copia
Manabit ad plenum benigno
Ruris honorum opulenta cornu.
Hic in reducta valle Caniculæ
Vitabis æstus, et fide Teïa
Dices laborantis in uno
Penelopen vitreamque Circen.
Hic innocentis pocula Lesbii
Duces sub umbra ; nec Semeleius
Cum Marte confundet Thyoneus
Prœlia ; nec metues protervum
Suspecta Cyrum, ne male dispari
Incontinentis iniciat manus,
Et scindat hærentem coronam
Crinibus, inmeritamque vestem.
