Haec pagina emendata est
Scribere quod Cassi Parmensis opuscula vincat ?
An tacitum silvas inter reptare salubres,
Curantem quidquid dignum sapiente bonoque est ?
Non tu corpus eras sine pectore. Di tibi formam,
Di tibi divitias dederunt, artemque fruendi.
Quid voveat dulci nutricula majus alumno,
Quam sapere et fari ut possit quæ sentiat, et cui
Gratia, fama, valetudo contingat abunde,
Et mundus victus, non deficiente crumena ?
Inter spem curamque, timores inter et iras
Omnem crede diem tibi diluxisse supremum.
Grata superveniet quæ non sperabitur, hora.
Me pinguem et nitidum bene curata cute vises,
Cum ridere voles, Epicuri de grege porcum.
