Haec pagina emendata est
HYMNUS IN ROMAM
fecerunt patriamque suo, tua, Flora, seges, quae
interit et semper longo nova germinat aevo.
Namque aliquid sancti sub terra vivere certum est
ipsius in Romae natali monte quadratae.
Hunc olim dubias luna crescente per umbras
pastores ausi rastro temptare. Silebat
gloria iam Romae, iam sacri fana Palati
corruerant. Vetus haec late tenet omnia rudus.
Plurimus obicitur caespes frondentis acanthi
atque oblita sui caecis de stirpibus arbos;
et lapidis fragmenta iacent in sentibus albi
lapsaque subrident scolymis capitella severis.
Instant semiruti muscoso fornice muri
herbaque de rimis quatitur vitriaria vento,
pendula ut a tuguri sordenti scruta fenestra.
Hic pictos in calce deos iam diluit imber.
— 44 —
