De Praefectis Armamentarij
Rubrica. LIII.
Eligantur per suffragia, et balluctas a Dominis Capitaneis; et Consiliarijs in primo Consilio generali quotannis de mense Aprilis congregando, duo Cives de Terra nostra oriundi, qui maiorem numerum balluctarum habuerint in Praefectos armamentarij nostri , quorum officium , praevio eorum iuramento de ille bene, et diligenter administrando , sit omnia arma, et tormenta beliica Reipublicae nostrae, necnon molendinum a vento, pulverem, plumbum, sulfur, salnitrum, ferramenta , ac cetera alia munitionum genera, existentia in armamentario, et sibi per inventarium consignanda optime tenere , et custodire cum onere etiam onerandi , et exonerandi aliqua de praefatis maioribus tormentis bellicis diebus Nativitatis , Resurrectionis, ac Corporis Domini nostri Jesu Christi, Festivitatum Sancti Marini Protectoris nostri, Sanctae Barbarae Virginis, et Martyris , ac alijs diebus anni , et similiter alia faciendi in signum laetitiae iuxta solitum , et consuetum et prout eisdem iniunctum , et commissum erit a Dominis Capitaneis praefatae Terrae nostrae, et non aliter nec alio modo.
Elapso vero anno, nisi confirmati fuerint per eadem suffragia , teneantur restituere , et consignare in manibus Dominorum Capitaneorum , vel aliorum eorum successorum in dicto officio praefatum armamentarium , et molendinum a vento , cum praedictis armis, tormentis bellicis, et ceteris omnibus alijs munitionibus existentibus in eis, iuxta assignationem eis factam in ingressu eorum officij , et similiter reddere rationem de omnibus administratis per eos in dicto tempore. Quae omnia , et singula dicti Praefecti observare , et dicti Domini Capitanei observari facere teneantur sub poenis legalibus , et alijs arbitrio Consilij generalis statuendis. Habeant autem pro recognitione sui laboris privilegium deferendi de die , et de nocte omnia armorum genera, exceptis Archibusijs minoris longitudinis trium palmorum.
