Haec pagina emendata est
Scire volunt secreta domus atque inde timeri.
Et quoniam coepit Graecorum mentio, transi
Gimnasia atque audi facinus maioris abollae.
Stoicus occidit Baream delator, amicum
Discipulumque senex ripa nutritus in illa,
Ad quam Gorgonei delapsa est pinna caballi!
Non est Romano cuiquam locus hic, ubi regnat
Protogenes aliquis vel Diphilus aut Herimarchus,
Qui gentis vitio numquam partitur amicum,
Solus habet: nam quum facilem stillavit in aurem
Exiguum de naturae patriaeque veneno,
Limine summoveor: perierunt tempora longi
Servitii. Nusquam minor est iactura clientis.
