Victor Olympiaci toties certamine campi
Euthȳmus effulget Locridis altus honor.
Ast ego majores egi, mihi crede, triumphos
Munere Castaliae nobilitata lyrae.
Narycios adiens Locros, cava litora circum,
Nossidos ad tumulum, nauta benigne, veni....
Nauta, retro tendas: Locri cecidere superbi,
Nossidos et nullus contegit ossa lapis.
Non Hippo, non Orra manet, non alma Selinus;
Et Medma irriguis fontibus uda jacet.
Nossida non valuit penitus subvertere tempus,
Stabit et ingenium tempus in omne meum.
Parvula ab Ægypto veniens discurrit hirundo,
Quae tibi florigeri nuncia veris erit.
Pleno, Ariadna, sinu; plenis da serta canistris,
Et pubescenti tempora cinge rosâ.
Attamen adcelera: subito fugit alma voluptas:
Solus habet lentos heu! dolor usque pedes.
