Venit hyems: pluvias glomerat, nimbosque december:
Mons, valles, campi jam riguere nive.
Quaeris, cur maneam ruri, velut exul ab urbe?
Ne spectem vultus, Æmiliane, tuos.
Sculpere Alexandrum poterat Lysippus; at unus
Blandus Amor puleram sculperet Hermionen.
Arcadicos flores jactat se temnere Luccus,
Altaque Lucreti carmina velle sequi.
Ipse fidem tenuit! nam spinea carmina texit
Spinifer, ac spinis horrida scripta facit.
Se merito aequiparat magno Quintillus Homero:
Expers luminibus magnus Homerus erat.
Dulcis amicitiae ne quae mihi saepe dedisti
Pignora, Lethaeis mersa ferantur aquis,
En tibi gemmanti candescens annulus orbe:
Haereat hic digito, Callianira, tuo.
Sic tibi non luctu, non ullis anxia curis
Alite felici candida vita fluat.
