 Progymnasma sexagesimum octavum |
Progymnasma septuagesimum  |
Obseruator.
Personae:
Observator, Athanasius, Matthaeus, Bonifacius.
Observator
Vos tres, linguas geritis impense liberas et expeditas: loquacitas vobis dominatur: meam admonitionem contemnitis ac pro nihilo putatis. Ecce in fabulatorum indicem vos refero. Si Pegaso velociores sitis, nunquam hodie effugietis infortunium.
Athanasius
Connivisti alias, connive nunc etiam, et muta istam mentem, rogo: tacebo deinceps ut piscis.
Matthaeus
Si nomina nostra in catalogum retuleris, erit mihi, quod Praeceptori de te narrem.
Observator
Quid dices?
Matthaeus
Cognosces.
Observator
Minas iactare cuivis obvium est.
Matthaeus
Experieris.
Observator
Nullius in me maleficii crimen admisi, cuius me stimulet conscientia.
Matthaeus
Senties.
Observator
Nullum, inquam, crimen incurri, qua tu me accersas: et non ignoro technas tuas.
Matthaeus
Videbis.
Bonifacius
Ne scribe nomen meum in tabula, donabo tibi quidpiam.
Observator
Egone ut patiar me abs te corrumpi muneribus?
Bonifacius
Lepidissimum est.
Observator
Non curo.
Bonifacius
Simul aspexeris, appetes.
Observator
Mitte nugari: nihil habes quod dones.
Athanasius
Habet certe.
Observator
Quin ostendis?
Bonifacius
Ecce imago longe venustissima: augustissima Dei mater puerum IESUM ulnis sustinens. Videtis ut amabiliter arridet nobis divinissimus atque bellissimus infans?
Observator
Hanccine daturus es?
Bonifacius
Daturus, si pollicere silentium.
Observator
Polliceor, da.
Bonifacius
Quaeres feliciter ambobus eveniat, accipe.
Matthaeus
O factum bene, iam tu incorruptissime obseruator nec me, nec Athanasium audebis accusare.
Observator
Quapropter non auderem?
Athanasius
Quia nos te accusaremus, et tu penderes poenas non leves, quod Praeceptori infidelis ac perfidus extitisses.
Observator
Ignosco vobis similiter, ut Bonifacio.
Matthaeus
Perplacet. Discede iam hinc, observa alios.
Athanasius
Pro, quantum boni adepti sumus hac luce, qui ab isto quidem Observatore quoad voluerimus tuti simus?
Bonifacius
Quinam?
Athanasius
Si de fracta lege silentii postulare quenquam e nobis meditabitur, obiiciemus illi, quam abs te accipere non recusavit elegantem picturam ut sileret: mutire non audebit. Nam tribus, tibi qui donasti, mihi et Mattheo testibus oculatis plus utique quam illi soli vel iurato credet Magister: periurissimum dicet, si deieraverit.
Matthaeus
Via reperta est commodissima ad evadenda verbera, propter istam congressionem nostram videlicet imminentia, Vah.
Notae
1 PEGASO VELOCIORES: De equo alato, qui capite Medusa amputato a Perseo, ex eius sanguine natus repente prosiluerit, quomodo eo usus sit Bellerophon, Natalis Comes Mytholog. lib. 7. cap. 11. et lib. 9. cap. 4. Fabulantur hunc eundem equum, cum terram ungula percussisset, fontem elicuisse, unde ipsi nomen inditumPegasus, πήγη enim fons: qui quoniam Musis consecratus est, dicuntur illae Pegasides. Idem fons ἱπποκρήνη, et Musae Hippocrenides.