Migne Patrologia Latina Tomus 89
Divina charismatum dona de coelesti thesauro prolata, dum largis virtutum mysteriis religiosa corda uberrime replevere, ita suavitatem sancti Spiritus odorifica narratione distribuunt, ut manifestis pandantur elogiis, et ornamenta salutis existant, juxta Domini vocem in sacris Evangelii paginis intonantem: Qui credit in me, flumina de ventre ejus fluent aquae vivae; et iterum: Aperi ostium, et implebo illud; et Salomon: Spiritus dabit sapientiam quaerentibus se, et docentium linguas facit disertas. Quamobrem venerabilis beatusque pontifex Petrus, Ravennatis Ecclesiae praefulgidum decus, et catholicae veritatis praecipuus doctor, calore superni amoris (0360D)accensus, et rigatione perennis gratiae irroratus, digno eloquii ornamento, vernantium lectionum opuscula de singulis Evangeliorum parabolis polito sermone conficiens, delectabili dulcedine aures omnium replevit et corda. Proinde, dilectissimi, tanti pastoris intenta et anxia mente scripta legamus, et ardenti desiderio ulnisque spiritualibus amplectamur: quatenus fructum laboris in nostrae mentis cellaria recondentes, simul cum eo magnificae laudis gloria perfruamur, et praemia aeterni muneris capiamus. Hoc humilis praesul Felix, de pauperculi cordis cellario, sermones legentibus exiguum obtulit munus.