Migne Patrologia Latina Tomus 73
Prooemium (Palladius Helenopolitanus; Hervet, Gentian), J. P. Migne
Prooemium
(1085)704 In hoc libro scripta est, qua in virtute utebantur, exercitatio et admirabilis vitae agendae ratio beatorum et sanctorum Patrum qui degebant in solitudine; ut eos aemulentur ac imitentur qui coelestem volunt vitam agere, et quae ad regnum coelorum deducit, viam ingredi; anuumque mulierum memoria, et inclytarum matrum a Deo inspiratarum, quae magno et forti animo virtutis exercitationis peregere certamina, ut exemplar proponatur, et amor excitetur iis quae continentiae ac castitatis volunt corona redimiri, ex sententia et voluntate viri, qui est varia ac multiplici doctrina praeditus, moribus pacificus, et corde pius, menteque religiosus, et in iis quae sunt opus egentibus communicandis liberalis, et propter morum bonitatem multis viris eximiis est in summis honoribus praepositus, et omnino custoditur virtute divim Spiritus. Qui quidem nobis jussit, vel, si verum potius dicere oporteat, ad eorum quae sunt meliora contemplationem hebes nostrum et obtusum excitavit ingenium, ut ad proponendam ad imitandum virtutum exercitationis decertationem sanctorum et immortalium et spiritalium patrum nostrorum, qui, ut Deo placerent, in dura et aspera tractatione corporis vitam egerunt, praeclarorum athletarum vitam a nobis descriptam ad eum mitteremus, uniuscujusque ex magnis strenuas praedicando virtutes. Divini autem hujus et spiritalis desiderii amator est Lausus, cui post divinum auxilium mandata est custodia divinitus afflati et religiosi imperii.
Ego igitur qui et lingua sum ineruditus, et spiritalem cognitionem summis quodammodo labris attigi, et indignus sum qui recenseam catalogum spiritalem vitam agentium sanctorum Patrum, et si reformidem praecepti magnitudinem quod meas vires superat, et jussum aegre feram, quod et magnam externam sapientiam, et spiritalem requirit intelligentiam; reveritus tamen primum et ejus qui ad hoc exsequendum nos excitavit virtutem, et reputans eorum qui haec legent utilitatem, et extimescens quod essem aditurus, etsi jure parere recusarem, cum egregium primum jussum divinae ascripsissem Providentiae, magnaque usus essem diligentia, sanctorum Patrum intercessione erectus, ad ea sum aggressus, veluti quodam compendio praeclarorum athletarum et magnorum virorum summa solum certamina et signa describens.
705 Nec solummodo clarorum virorum, qui optimam ac praestantissimam ex virtute vitam egere, sed etiam beatarum mulierum quae in excellentissimae vitae genere se honeste exercuere. Et aliquorum quidem ex iis sacros vultus ut ipse coram viderem sum dignatus, qui jam ante sunt consummati in certamine pietatis; aliquorum autem coelestem vitae institutionem didici a divinis athletis. Multas autem urbes, et multos vicos, et speluncas, et omnia tabernacula deserti monachorum pedestri itinere obiens, diligentissime consideravi eorum pietatem ac religionem. Atque cum quae partim quidem ipse vidi scripsissem, partim autem quae a sanctis Patribus audivi, magnorum virorum certamina, et mulierum, quae propter spem in Christum erant fortiores quam earum ferebat natura, hujus libri scriptis mandassem, misi ad tuas aures amicas divinorum eloquiorum, optimorum virorum et religiosorum decus, fidelissimique et religiosi imperii splendor, germane et Christi amice serve Dei Lause, pro ea quae mihi inest exiguitate, uniuscujusque ex Christi athletis tam masculis quam feminis insigne nomen, exprimens, et ex multis et magnis uniuscujusque certaminibus pauca breviter exponens. Plurimorum quoque genus etiam adjiciens, et urbem, et locum mansionis.
Meminimus autem virorum et mulierum, qui ex virtute quidem vitam perfecte instituerunt, propter arrogantiae autem matrem inanem quae vocatur gloriam, in infimum inferorum barathrum, et fundum praecipitati fuerant, et quae longo tempore et plurimo labore sibi pepererant, amplectenda, et acerrimo studio comparanda exercitationis benefacta, uno temporis momento arrogantia et vana de se persuasione amiserant. Gratia autem nostri Servatoris, et sanctorum Patrum providentia, et viscerum miseratione, erepti sunt a spiritalibus diaboli laqueis, et sanctorum precibus recuperaverunt priorem vitam quam agebant ex virtute.
(no apparatus)