Migne Patrologia Latina Tomus 20
Scripta deperdita (Auctor incertus (Chromatius Aquileiensis?)), J. P. Migne
Scripta deperdita
Tractatus procul dubio seu Commentarios scripsit sanctus Chromatius Aquileiensis episcopus in Evangelium sancti Matthaei, ab ipso illius sacri Textus exordio usque saltem ad ejusdem cap. VI, vers. 24, ubi desinit Tractatus ultimus, qui superest, in idem Evangelium. Cum Tractatus hujusmodi sive Commentarios scripserit sanctus noster episcopus, ut privatim legendos traderet ad piam fidelium exercitationem, prout conjecimus in Praefatione ex verbis ipsis sancti Praesulis, quae habentur Tractatu 5, num. 2; hinc jure inferimus, eumdem Tractatus seu Commentarios suos inchoasse ab exordio illius Evangelii, et integros perduxisse, absque ullo hiatu, ad minus usque ad Tractatum ultimum quem habemus, qui in hac nostra editione est 17; licet non invite conjectare (0369B)possimus, eumdem ulterius quoque produxisse opus, et fortasse ad extremum usque versiculum totius Evangelicae Matthaei historiae, uti latius in Praefatione.
Deperdita itaque merito censentur primo, quae (0370A)scripsit sanctus Chromatius ab initio Evangelii sancti Matthaei, usque ad vers. 15 capitis III, ubi incipit Tractatus qui in hac nostra editione primus est, quique apud Gallandium, inverso prorsus ordine, 17 numeratur.
Deperdita secundo haberi debent, quae scripsit sanctus Chromatius a versu 17 capitis III ejusdem Evangelii, usque ad initium capitis V, ubi incipit Tractatus, qui in nostra editione 3 est, quique perperam apud Gallandium 2 inscribitur.
Atque haec saltem sunt quae jure optimo desiderantur ex sancti Chromatii Opere in Evangelium sancti Matthaei.
Deperditae tertio sunt epistolae complures, quas scimus sanctum Praesulem dedisse ad sanctum Ambrosium, (0370B)ad sanctum Hieronymum, ad sanctum Joannem Chrysostomum, necnon ad Honorium et Arcadium Augustos; uti patet ex Lucubrationibus, quas subjicimus, clarissimorum virorum Fontanini atque de Rubeis.