Migne Patrologia Latina Tomus 135
Testimonia et elogia
Testimonia et elogia (Auctores varii), J. P. Migne 135.0024A
I. Sigebertus Gemblacensis in libro De illustribus Ecclesiae Scriptoribus, cap. 132.
Flavaldus monachus Remensis scripsit gesta pontificum Remensium. Orditur narrationem suam a conditione ipsius civitatis, quae a qualitate civium, qui in bello erant duri cordis, primo aucupata est sibi nomen Cordurus. Postea milites Remi, a Romulo fratre suo, a facie Romuli fugientes ad eam profugerunt, eamque a nomine principis sui Remi, Remum denominaverunt. Hic scriptor digne scriptoribus ideo connumeratur, quia digressus ab opere suo, memoriam faciens sanctorum martyrum, vel confessorum quiescentium in ecclesiis Remensi ecclesiae adjacentibus vel subjacentibus, Vitas vel passiones eorum legentibus notificavit.
II. Joannes Trithemius De Scriptoribus ecclesiasticis.
Flavaldus monachus Remensis, ordinis S. Benedicti, in Scripturis divinis eruditus, et in saecularibus litteris egregie doctus, ingenio subtilis, et disertus eloquio, scripsit non contemnendae lectionis opuscula, quorum studio nomen suum cum gloria transmisit ad posteros. E quibus fertur opus insigne, a conditione Remensis civitatis, quam milites Remi a fratre Romulo necati fugatos, ob memoriam domini sui construxisse, et sic appellasse commemorant, usque ad sua tempora: in quo multa de sanctis martyribus et aliis rebus ac gestis interserens, volumini hunc titulum dare voluit, Gesta Remensium pontificum lib. III. Vitas quoque multorum sanctorum 135.0023A| lib. I. Alia insuper multa scripsisse dicitur, quae ad notitiam meam non venerunt.
III. Dominicus Grimanus cardinalis S. Marci in Dario ad Des. Erasmum can. ordin. S. Augustini, quod excusum est Basileae anno 1508, apud Michaelem Furterium et Joannem Scotum, folio 32, nota 13.
Dum Remis agerem, obtulit mihi D. Robertus Briconetus archiepiscop. clariss. Galliae cancellarius registrum ms. continens quatuor libros Historiae Remensis Ecclesiae, auctore et collectore Flodoardo, illius quondam canonico, exinde monacho. Mutatio status, et ex canonico factum fuisse monachum, indicat pietatem viri. Docte scripsit et diligenter. Plurima enim illius registri iis contuli quae hic in Vaticana asservantur, eaque fideliter exscripta inveni: abest ab eo veteratorum rubigo, et novorum auctorum asperitas. Et si nostri temporis 135.0023B| aerumnosa miseria non praeferret studio historiae lucrum vitae, nec magis consuleret avaritiae quam antiquitatis notitiae, dignus esset prelo auctor.
IV. Guillelmus Eysengrein in Catalogo testium veritatis orthodoxae matris Ecclesiae.
Flavaldus, Remensis Benedictinae professionis monachus, vir tam divinis quam profanis scripturis eruditus, historicus perfectus, theologus vero profundus, 135.0024A| gesta Remensium pontificum, ab urbe Remis condita, quam milites Remi a fratre Romulo necati fugatos, ob memoriam Domini sui construxisse commemorant, usque ad sua tempora tribus voluminibus, quibus complures SS. martyrum historias recitat, deduxit.
V. Papirius Massonus lib. II Annalium Francorum in CAROLO MAGNO.
Frodoardus sub Carolo Simplice et Ludovico floruit, Vitasque pontificum Remensium diligentissime scriptas ad posteros transmisit, cujus operis exemplaria aliquot Lutetiae vidimus.
VI. Idem in CAROLO SIMPLICE.
Sequenti anno (hoc est 920) magni motus in Gallia sunt exorti, de quibus et aliis publicis negotiis dicemus ex Chronicis ejusdem Frodoardi (quem alii 135.0024B| Flodoardum vocant) Remensis Ecclesiae presbyteri. Is enim auctor praeter Vitas pontificum Remensium scripsit chronica ab anno nongentesimo decimo nono usque ad annum nongentesimum sexagesimum sextum, quo excessit e vita quinto Kalendas Aprilis septuagesimo sexto [ dicendum tertio] aetatis anno: nosque illum scriptorem deinceps in Carolo, Roberto, Rodulpho, Ludovico et Lotario sequemur, praeteritis Vitichindo, et aliis minoris diligentiae ac fidei scriptoribus.
(no apparatus)