Varii versus (Migne)

E Wikisource
 EPUB   MOBI   PDF   RTF   TXT
Varii versus
Saeculo V

editio: Migne
fons: Corpus Corporum

Migne Patrologia Latina Tomus 72

Varii versus


IN BASILICA.

(PL 72 0051C)
Post evangelicum bisseni dogma senatus,
Quod regnum Christi toto iam personat orbe,
Postque sacrum Pauli stylum, quo curia mundi
Victa suos tandem stupuit siluisse sophistas,
Arctous, Martine, tibi in extrema recessus
Panditur, inque via fidei patet invia tellus.
Virtutum signis, meritorum et laude tuorum,
Excitat affectum Christi Germania frigens,
Flagrat et accenso divini Spiritus igne,
Solvit ab infenso strictas Aquilone pruinas.
Immanes, variasque pio sub foedere Christi
Asciscis gentes. (0051D) Alamannus, Saxo, Toringus,
Pannonius, Rugus, Sclavus, Nara, Sarmata, Datus,
Ostrogothus, Francus, Burgundio, Dacus, Alanus,
Te duce nosse Deum gaudent. Tua signa Sueves
Admirans didicit fidei quo tramite pergat,
Devotusque tuis meritis haec atria claro
Culmine sustollens, Christi venerabile templum
Constituit, quo clara vigens, Martine, tuorum
Gratia signorum votis te adesse precatur. (0052C)
Electum, propriumque tenet te Gallia gaudens
Pastorem, teneat Gallaecia tota patronu


(PL 72 0052C) EIUSDEM IN REFECTORIO.


Non hic auratis ornantur prandia fulcris:
 Assyrius murex nec tibi sigma dedit.
Nec per multiplices abaco splendente cavernas,
 Ponentur nitidae codicis arte dapes.
Nec scyphus hic dabitur, rutilo cui forte metallo
 Crustatum stringat tortilis ansa latus.
Vina mihi non sunt Gazetica, Chia, Falerna,
 Quaeque Sarapteno palmite missa bibas.
Sed quidquid tenuis non complet copia mensae,
 Suppleat hoc petimus gratia plena tibi.




(PL 72 0052C) EPITAPHIUM EIUSDEM.

(0052D)
Pannoniis genitus, transcendens aequora vasta,
Galliciae in gremium divinis nutibus actus,
Confessor, Martine, tua hac dicatus in aula
Antistes, cultum instituit ritumque sacrorum;
Teque, patrone, sequens famulus Martinus eodem
Nomine, non merito, hic in Christi pace quiesco.